PHILEMON 1 - Hakcipta - Biatah Bidayuh

¹ So Paul, adi mbŭh dog jer amai Kristus Jesus, ka so dingan ta Timothy, nuju Philemon adi dingan ka daya adi samah ngga nyiraja;

² samŭn daya eklisia adi siraru tikuruk di ramin mu, Apphia adi dingan dayung ta, ka Archippus dingan ta adi samah keya ka soldadu darŭm piagah Agah Kana:

³ Isa-i Tapa adi Sama ta ngga Tuhan Jesus Kristus nggen di angān pinyirasi-mandis ngga damai.

Pinyirindu ngga Pinyabah Philemon

⁴ Dingan ku Philemon, tiap kari aku simayang, aku nyabŭt kuu ka nggen trima kaseh di Tapa ku.

⁵ Amai aku dingah pasar pinyirindu mu di sopŭrŭg daya adi Tapa mbŭh mien ka pinyabah mu di Tuhan Jesus.

⁶ Aku simayang mite ata adi samah sabah di Jesus bisa rabis mirati sopŭrŭg berkat adi ata biyŭn darŭm udip ndi ngga Kristus.

⁷ Pinyirindu mu, dingan ku, mbŭh bada aku gaŭn buang ngatat aku! Kuu mbŭh nyanang asŭng sopŭrŭg daya adi Tapa mbŭh mien.

Pimite Paul yŭn Onesimus

⁸ Sabab anŭ aku pus, nimun dingan mu darŭm Kristus, mritah kuu da ndai kayuh adi patut dog ndai.

⁹ Pak sabab aku rindu kuu, aku ndai pimite adŭ. Aku ndai simŭnŭ sunggu aku ati Paul, pinyisung Kristus Jesus, ka madin gŭh mbŭh dog jer amai Ayŭh.

¹⁰ Jadi aku ndai pimite ku di kuu ngga ngarun Onesimus, adi anak ku darŭm Kristus; amai sitadŭn darŭm jer aku mbŭh jadi sama di ayŭh darŭm roh.

¹¹ Ayŭh ko dŭh biguna yŭn mu, pak madin ayŭh mbŭh biguna yŭn ata duwŭh.

¹² Madin aku pait ayŭh pari ka kuu, ayŭh adi aku rindu.

¹³ Sibandar-i aku babŭ raan ayŭh agi digiti ngga aku, turung piagah Agah Kana gati kuu sitadŭn aku darŭm jer.

¹⁴ Pak sunggu mŭnŭ, dŭh aku an takan kuu da turung aku, pak isa-i kuu turung aku nanyam ka pinyiraan adŭp mu. Jadi aku dŭh re ndai ani ani kambŭi kuu dŭh situju.

¹⁵ Kadŭ-i, Onesimus ko dŭh tui jo so kuu isa kuu bisa tambit ayŭh pari da tui rŭŭ ngga adŭp mu.

¹⁶ Madin ayŭh dŭh-i urun adŭ, pak mbŭh rabis so urun: ayŭh inŭh dingan darŭm Kristus adi aku rindu. Ayŭh inŭh adi aku raru siŭt! Ka rabis so anŭ ayŭh re di kuu urun ka dingan darŭm Tuhan!

¹⁷ Jadi kambŭi kuu nyirundeng aku dingan darŭm kraja, kambat meh ayŭh pari keya ka kambat aku.

¹⁸ Kambŭi ayŭh agi ndai sarah di tunduh mu puan kah birutang di kuu, kidaan di aku isa aku bayar kuu.

¹⁹ Tingga, kayuh adi adŭp ku nuris: Aku, Paul, re bayar kuu. (Dŭh aku sah kidaan da kuu ingat nang adŭp mu mbŭh birutang di aku darŭm pimudip Kristen mu.)

²⁰ Jadi meh, dingan ku, aku mite so kuu ngga adŭn Tuhan; kuu adi dingan ku darŭm Kristus, nyanang meh asŭng ku!

²¹ Aku puan, darŭm aku nuris surat ati, kuu re ndai pimite ku; sibandar-i aku taŭn puan kuu re ndai-i rabis so adi aku bada.

²² Pak sidia gŭh birit yŭn ku, sabab aku harap Tapa re nam simayang ngan ka bada aku pari ka angān.

Sikasŭn Tabi

²³ Epaphras, adi samah darŭm jer ngga aku sabab-i pinunda Kristus Jesus, pait tabi ka kuu,

²⁴ ka simŭnŭ gŭh ngara adi samah nyiraja ngga aku, mun Mark, Aristarchus, Demas, ka Luke.

²⁵ Isa-i pinyirasi-mandis Tuhan ta Jesus Kristus agi ngga sopŭrŭg ngan.