NEHEMIAH 4 - Hakcipta - Biatah Bidayuh

Nehemiah Ngarah Ngara adi Nyakar Kraja

¹ Kan Sanballat dingah kieh daya Jahudi pari pijog sindung kupo, ayŭh baji ka piguru ngamun kieh.

² Di jawin bara adi ayō ayŭh ngga bara soldadu daya Samaria ayŭh nang, “Ani anŭ adi bara daya Jahudi adi budo anŭ ndai? Ngara an pari pijog kupo anŭ kah? Ngara pikir ngara tungang ngamas kraja ngara darŭm ndi andu amai mbŭh jugan sadis kah? Dapŭd kah ngara pakai tugung batuh adi mbŭh sau anŭ ngga piramin?”

³ Tobiah mijog sindŭk ayŭh diginŭ, ka ayŭh sua minyu, “Sindung adi munki dapŭd ngara pijog? Dog nyingŭg kasong tarun, rubuh gŭh!”

⁴ Aku bidua, “Dingah ngara ngamun kieh, O Tapa! Isa kayuh adi ngara nang nyatŭk adŭp ngara. Isa sopŭrŭg kayuh adi ngara biyŭn dog sirapas so ngara, ka isa ngara dog taban ka rais tami jadi daya-takap.

⁵ Dŭhnyah apun arap adi ngara ndai ka dŭhnyah apun dosa ngara, amai ngara mbŭh pimangŭh kieh adi ndai kraja ati.”

⁶ Jadi kieh pijuu ndai kraja ami, ka dŭh tui sindung anŭ mbŭh sitangah re kamas, sabab bara ndai kraja ngga atin graŭh.

⁷ Sanballat, Tobiah, ngga bara daya Arab, Ammon, ka Ashdod dingah kieh mbŭh re rikas ngamas pari pijog sindung Jerusalem ka rubang rubang di sindung mbŭh abo dog nabat; ka ngara mbŭh raru baji.

⁸ Jadi sopŭrŭg ngara bipekat an nyerang Jerusalem ka ndai pito,

⁹ pak kieh bidua ka Tapa ami ka bada daya ami bijaga sandu ngga singarŭm.

¹⁰ Bara daya Judah nang ndi ragu: “Kieh bitambah ramah kabis pinyirabis; Mbŭh raru bagŭ sapok an dog taran. Simuki kieh re pijog sindung andu ati?”

¹¹ Pinganyu ami pikir kieh dŭh kiris ngara bait dŭh puan ani ani ndŭg ka ngara mbŭh nyerang kieh, siŭ kieh ka katang kraja ami.

¹² Pak daya daya Jahudi adi rŭŭ di dupan pinganyu ami ari bakan kieh pasar pusar adi bara pinganyu ami mbŭh ndai ngga rawan kieh.

¹³ Jadi aku bada rayat ku sidia adŭp ngara ngga pedang, jarok, ka bawŭh panah, ka ngatur ngara nanyam ka manak di punok sindung, di barang yŭn-i gibayuh kamas dog pijog.

¹⁴ Aku kiris rayat mbŭh susah, jadi aku nang di ngara ngga di bara pinguru ka pingubak ngara, “Dŭhnyah taru pinganyu ta. Ingat munki masam bās ka bikuasa inŭh TUHAN, ka birawan meh yŭn dingan ngan adi samah bangsa, yŭn anak ngan, sawŭn ngan, ka ramin arŭn ngan.”

¹⁵ Pinganyu ami dingah kieh mbŭh puan pasar pekat ngara, ka ngara mbŭh puan Tapa mbŭh ngarah pusar ngara. Komŭnŭ sopŭrŭg kieh pari ndai kraja ami, pari pijog sindung.

¹⁶ So nganŭ sitangah bara daya ku nyiraja, ka sitangah tukang bijaga, nēn piraka perang ka bisinyata jarok, pinangin, ka bawŭh panah. Ka bara pinguru ami nggen puno pinyibatu di ngara

¹⁷ adi pari pijog sindung kupo. Ngara adi tukang ngakut pakai ndi tangan ngga muat preka piramin, ka ndi tangan digŭng sinyata,

¹⁸ ka barang naan adi kraja bitakin pedang. Daya adi tukang mambak trompet ngga kidaan agi serang agi ngapid aku.

¹⁹ Aku kidaan di rayat ngga bara pinurung ka pinguru ngara, “Buka kraja ta ati paŭh bayah ka ambu, ka ata meh paŭh jo so dingan ta di sindung.

²⁰ Kambŭi angān dingah trompet dog mambak, angān an tikuruk maning aku. Tapa ta re birawan yŭn ta.”

²¹ Jadi meh, barang andu so isan isan ndŭg ka bitang tatŭng singarŭm, sitangah so kieh nyiraja di sindung, darŭm sitangah adi bŭkŭn bijaga ngga jarok ngara.

²² Di tipuh anŭ aku kidaan di ngara adi nguasa kraja nang ngara ngga sopŭrŭg pinurung ngara an rŭŭ di Jerusalem singarŭm, isa kieh bisa jaga kupo singarŭm ka nyiraja sandu.

²³ Aku dŭh nyambi piraka ku kan mbŭh singarŭm ani, simŭnŭ gŭh bara dingan ku ngga bara daya-gaji ku samŭn pingibān ku.