MAZMUR 96 - Hakcipta - Biatah Bidayuh

Tapa, Raja adi Siabo Bigatung

¹ Nang ragu bauh ka TUHAN! biragu yŭn TUHAN, ndi ong ong!

² Biragu yŭn TUHAN, ka muji Ayŭh! Piagah barang andu agah kana Ayŭh mbŭh nyiramat ata.

³ Piagah bragah-I di barang bangsa, pingandai bās-I di sopŭrŭg daya.

⁴ TUHAN inŭh bās ka patut dog muji; Ayŭh inŭh patut dog stabi rabis so tapa tapa adi bŭkŭn.

⁵ Tapa tapa sopŭrŭg bangsa bŭkŭn inŭh tibudo, pak TUHAN napa rangit.

⁶ Stabi ngga bragah inŭh jangi; kuasa ngga pinyiramus ngisi Ramin-I.

⁷ Muji TUHAN, sopŭrŭg daya di ong; muji bragah ka kuasa-I.

⁸ Muji adŭn bragah TUHAN; taban pinganggen ka mandŭg ka darŭm Ramin-I.

⁹ Mutu ubak di sirung jawin Ayŭh adi Kudus kan Ayŭh tatŭng; kimŭtŭr di sirung jawin-I, ndi ong ong!

¹⁰ Nang di sopŭrŭg bangsa, “TUHAN inŭh raja! Ong mbŭh dog bada tagap ka dŭh dapŭd dog ngugoh; Ayŭh re nggen bisara yŭn bara daya ngga pinyitŭnggŭn.”

¹¹ Gaŭn meh, ong ngga rangit! Magā meh, rawŭt, ngga barang dāng darŭm kuu.

¹² Gaŭn, ŭmŭh, ka sopŭrŭg kayuh darŭm kuu! Tŭngŭn tŭngŭn kayuh di tarun re nyirais amai gaŭn

¹³ kan TUHAN mandŭg di mritah ong. Ayŭh re mritah daya ong ngga pinyitŭnggŭn ka ngga patut.