MAZMUR 88 - Hakcipta - Biatah Bidayuh

Dua Mite Turung

¹ TUHAN Tapa, adi pinyikudip ku, aku bagan ndi andu andu, ka singarŭm aku mandŭg ka sirung jawin Mai.

² Dingah dua ku; dingah sirŭŭn ku mite turung!

³ Bagŭ pinyusah mbŭh nyatŭk aku ka aku mbŭh sindŭk re kabŭs.

⁴ Aku mbŭh keya ka daya adi mbŭh re kabŭs; sopŭrŭg pinyibake ku mbŭh mating.

⁵ Aku dog tagan di ruang daya adi mbŭh kabŭs; aku mun daya adi dog siŭ guring darŭm rubang kubur, daya adi Kaam mbŭh batur batur kambŭt, adi dŭh Kaam tungang turung.

⁶ Kaam mbŭh taran aku ka rasan rubang kubur, ka darŭm rubang adi siabo tŭrŭp ka siabo karŭm.

⁷ Baji Mai nanuh aku, ka aku mbŭh asur di ribo girumbang-i.

⁸ Kaam bada bara jerā ku tagan aku; Kaam mbŭh bada ngara sidōt di aku. Aku dog ngabŭt ka dŭh tungang pirupas adŭp ku;

⁹ batŭh ku ramah amai sangsara. TUHAN, barang andu aku bagan Kaam ka pakat tangan ku ka Kaam darŭm bidua.

¹⁰ Ndai Mai kah pingandai-nginga yŭn daya kabŭs? Makat kah ngara rasu muji Kaam?

¹¹ Agi kah pinyirindu Mai adi dŭh bisa birubah dog nyabŭt darŭm kubur puan kah pinyitŭtŭd Mai dog nyabŭt di tarun yŭn pinyirusag?

¹² Agi kah pingandai-nginga Mai dog kiris di tarun karŭm puan kah pinyikana Mai dog kiris di tarun tana daya adi dog kambŭt?

¹³ TUHAN, aku bagan mite turung so Kaam; barang isan aku bidua ka Kaam.

¹⁴ Mani Kaam tirawan aku, TUHAN? Mani Kaam bu so aku?

¹⁵ So aku gi-sŭ, aku sangsara ka mbŭh sindŭk re kabŭs; aku mbŭh rarah so jera ukum Mai.

¹⁶ Triyŭn baji Mai bada aku asur; serang Mai adi bisā pirabur aku.

¹⁷ Ndi andu andu ngara kirurung aku keya ka uba; ngara tudu aku so barang parad.

¹⁸ Kaam mbŭh bada ndŭg ka jerā rapat ku tagan aku, ka karŭm sadi adŭ jerā ku.