MAZMUR 62 - Hakcipta - Biatah Bidayuh

Atin Sabah di Pinyigrindung Tapa

¹ Aku kajŭn, ngga atin tŭtŭd, Tapa nyiramat aku; aku bisangan di Ayŭh sadi.

² Ayŭh sadi adi grindung ka nyiramat aku; Ayŭh inŭh pingibān ku, ka aku dŭh re tungang dog ngarah.

³ Ndŭg sinde sopŭrŭg ngan nyerang daya adi mbŭh dŭh mbŭh so pinyibake buwang adi mbŭh rubuh?

⁴ Kaŭs angān raan bada ayŭh rabu so yŭn-i adi dog stabi; angān munos asŭng di pinganang kadong. Angān piruah pinganang berkat, pak darŭm asŭng ngan angān mangu ayŭh.

⁵ Aku bisangan di Tapa sadi; aku na pingarap ku di Ayŭh.

⁶ Ayŭh sadi adi grindung ka nyiramat aku; Ayŭh inŭh pingibān ku, ka aku dŭh re dog ngarah.

⁷ Pinyiramat ku ngga stabi ku bisangan di Tapa; Ayŭh inŭh pingibān ku adi bake; Ayŭh inŭh bari ku.

⁸ Ari sabah di Tapa, daya ku. Kidaan di Ayŭh sopŭrŭg pinyusah ngan, amai Ayŭh inŭh adi grindung aku.

⁹ Manusia mbŭh keya ka abus asŭng; bās ngga adi sŭ brimun adŭ dŭh biguna. Na ngara di timbang, ka taŭn dŭh adŭ brega; ngara mbŭh jangan so abus asŭng.

¹⁰ Dŭhnyah sabah di pinyiganas; dŭhnyah harap adŭp ngan dapŭd utung so kraja taku; sunggu pinyikaya ngan bitambah, dŭhnyah bisangan dieh.

¹¹ Rabis so ndi sidah aku mbŭh dingah Tapa nang kuasa anŭ inŭh tung jangi

¹² ka pinyirindu-I dŭh bisa birubah. Adŭp Mai, O TUHAN, ngupah barang naan daya nanyam ka kayuh adi mbŭh-i ndai.