MAZMUR 53 - Hakcipta - Biatah Bidayuh

Arap Manusia

¹ Sibudo nang di adŭp ngara, “Mating Tapa.” Sopŭrŭg ngara mbŭh madam di pikir-kira ngara, ka ngara mbŭh ndai kayuh adi sipŭ; mating inŭh daya adi ndai kayuh adi batur.

² Tapa tingga rayat manusia so shorga an tingga agi kah mating daya adi bijak, adi nyambah Ayŭh.

³ Pak ngara sopŭrŭg mbŭh miriseu buang manyap; sopŭrŭg ngara mbŭh samah arap. Mating inŭh ngara adi ndai kayuh adi batur, ndi naan mating gŭh.

⁴ “Dŭh kah ngara puan?” Tapa siken. “Ngara adi arap ati dŭh puan kah? Ngara mirupak daya Ku ngga kudip adŭp-i, ka ngara bŭn bidua ka Aku.”

⁵ Pak komŭnŭ ngara re taru, ka bŭn inŭh ngara taru mun anŭ, amai Tapa re bada mingare turang bara pinganyu daya-I. Tapa mbŭh tirawan ngara, ka simŭnŭ inŭh Israel re batur batur ngarah ngara.

⁶ Aku bidua mite pimanang mandŭg ka Israel so Zion. Sanang inŭh daya Israel re kan Tapa bada ngara mujur dinge!