MAZMUR 37 - Hakcipta - Biatah Bidayuh

Pinŭbŭn Udip Daya Ginaka ngga Daya Kana

¹ Dŭhnyah susah pasar pingandai daya adi ginaka; dŭhnyah sina di ngara adi ndai sarah.

² Ngara re miyap mun uduh adi mbŭh pisŭk; ngara re kabŭs mun anak kayuh adi rayu.

³ Sabah di TUHAN ka ndai pingandai kana; rŭŭ di tarun tana ati ka angān re siramat.

⁴ Jiroh udip sanang ngan di TUHAN, ka Ayŭh re nggen di angān pinyiraan atin ngan.

⁵ Nggen adŭp ngan di TUHAN; sabah di Ayŭh, ka Ayŭh re turung angān;

⁶ Ayŭh re bada pinŭnggŭn ngan nyirinyak mun batŭh andu di yun andu.

⁷ Tŭtŭd ka kajŭn TUHAN ndai kraja-I; dŭhnyah susah pasar ngara adi mujur puan kah pasar ngara adi mujur di pusar arap ngara.

⁸ Dŭhnyah udah bipito puan kah baji; anŭ batur-i taban pinyusah adŭ.

⁹ Ngara adi sabah di TUHAN re dapu tarun tana ati, pak adi ginaka re dog pibu.

¹⁰ Dŭm dŭh tui adi ginaka re miyap; angān re jiroh ngara, pak angān dŭh re dapŭd ngara;

¹¹ adi pirapat adŭp-i re dapu tarun tana ati ka kinyam udip mujur ngga damai.

¹² Adi ginaka bipekat an rawan daya adi kana ka nyitŭrŭng ngara ngga atin tiru.

¹³ Pak TUHAN tawŭh daya adi ginaka, sabab Ayŭh puan ngara re rikas dog pirabur.

¹⁴ Adi ginaka nyitak pedang ngara ka pawŭt bawŭh panah ngara an siŭ daya adi sirata ngga adi susah, an ninong ngara adi ndai kayuh adi batur;

¹⁵ pak ngara re dog siŭ ngga pedang adŭp ngara, ka bawŭh panah ngara re dog mata.

¹⁶ Nisit kayuh adi daya kana dapu re rabis brega so pinyikaya sopŭrŭg daya adi ginaka,

¹⁷ sabab TUHAN re tambit pinyibake daya adi ginaka, pak grindung ngara adi kana.

¹⁸ TUHAN kingat jaga ngara adi tunda pinganang-I, ka tarun tana ati re jadi tung ngara ndŭg situi tui.

¹⁹ Ngara dŭh re sangsara di tika susah; ngara re biyŭn sukup di tipuh apag.

²⁰ Pak daya adi ginaka re kabŭs; bara pinganyu TUHAN re miyap mun bunga tarun; ngara re miyap mun asuh.

²¹ Adi ginaka nginjam ka bŭn gati, pak daya kana nggen ngga atin mandis-i.

²² Ngara adi dog nyiberkat TUHAN re dapu tarun tana ati, pak ngara adi dog mangu-I re dog pibu.

²³ TUHAN nyiruton daya di aran adi patut ngara kadŭg ka grindung ngara adi pimunos asŭng-I.

²⁴ Kambŭi ngara rabu, ngara dŭh re ruro, sabab TUHAN re turung ngara makat.

²⁵ Aku minyamba madin; aku mbŭh tui udip, pak aku bŭn kiris daya kana dog tagan TUHAN puan kah anak anak ngara nyidaris mite pinguman.

²⁶ Siraru ngara nggen bait nginjam kayuh ka daya bŭkŭn ngga sanang asŭng, ka anak anak ngara jadi berkat di ngara.

²⁷ Marik pimudip ngan so kayuh adi arap ka ndai kayuh kana, ka sesang ngan re ari udip di tarun tana ati;

²⁸ amai TUHAN rindu kayuh adi batur ka dŭh tagan daya-I adi tŭtŭd. Ayŭh grindung ngara ndŭg situi tui, pak sesang daya adi ginaka re dog pibu.

²⁹ Daya adi tŭnggŭn re dapu tarun tana ati ka adu adu rŭŭ dieh.

³⁰ Pinganang daya adi kana inŭh bijak, ka ngara gŭh ari dŭh marad.

³¹ Ngara nyikŭn ukum-adat Tapa ngara darŭm atin ngara ka bŭn miriseu so ukum-adat anŭ.

³² Daya adi ginaka nyibatŭh daya adi kana ka suba an siŭ ngara;

³³ pak TUHAN dŭh re tagan ngara ka darŭm tangan pinganyu ngara puan kah bada ngara dog nunggu kan ngara dog taban ngga bisara.

³⁴ Na pingarap ngan di TUHAN ka tunda pinyipesan-I; Ayŭh re nggen di angān tarun tana ati ngga-I stabi di angān, ka angān re kiris daya adi ginaka dog pibu.

³⁵ Aku mbŭh kiris daya adi ginaka kinanyuh daya; ayŭh bada adŭp-i bigatung keya ka kayuh sedar di Lebanon;

³⁶ ripas anŭ aku murah, ka ayŭh dŭh tia agi diginŭ; aku jiroh pak dŭh tungang dapŭd ayŭh.

³⁷ Nyibatŭh daya adi kana, ka ngatin daya tŭnggŭn; daya pinyidamai biyŭn sesang,

³⁸ pak daya adi bidosa abo dog pirabur, ka sesang ngara dog pirarap.

³⁹ TUHAN nyiramat daya tŭnggŭn ka grindung ngara di tipuh pito.

⁴⁰ Ayŭh turung ngara ka pirupas ngara; Ayŭh nyiramat ngara so daya adi ginaka, sabab ngara tudu Ayŭh yŭn pinyigrindung.