MAZMUR 31 - Hakcipta - Biatah Bidayuh

Dua yŭn Sabah di Tapa

¹ Aku di ka Kaam, TUHAN, yŭn pinyigrindung; dŭhnyah bada aku dog ngarah. Kaam inŭh Tapa adi tŭnggŭn; nyiramat aku, aku bidua!

² Dingah aku! Nyiramat aku madin! Jadi yŭn ku bisukan ka grindung aku; pingibān adi nyiramat aku.

³ Kaam inŭh yŭn ku bisukan ka ngibān aku; nyiruton ka nguru aku nanyam adi mbŭh Mai janji.

⁴ Bada aku siramat so jarat adi mbŭh dog tŭŭn ngga nakap ku; grindung aku so pinyusah.

⁵ Aku na adŭp ku ka darŭm tangan Mai. Kaam re nyiramat aku, TUHAN; Kaam Tapa adi tŭtŭd.

⁶ Kaam tiru di ngara adi nyambah tibudo, pak aku sabah di Kaam.

⁷ Aku re gaŭn ka pawŭn sabab pinyirindu Mai adi dŭh bisa birubah. Kaam kiris sangsara ku; Kaam puan pinyusah ku.

⁸ Kaam dŭh bada pinganyu ku nakap aku; Kaam mbŭh nyibandar aku panu di barang yŭn aku raan.

⁹ Masi di aku, TUHAN amai aku darŭm susah; batŭh ku mbŭh kawŭk sabab ari sien; aku mbŭh kirarah.

¹⁰ Aku mbŭh rarah bada pinyusah, ka sien mbŭh bada udip ku purok. Aku ramah bada sopŭrŭg pinyusah ku; ndŭg ka turang ku jadi tare.

¹¹ Sopŭrŭg pinganyu ku, ka rabis-i bara rasū ku, mbŭh ngamun aku; ngara adi puan aku mbŭh taru di aku; kan ngara kiris aku di aran, ngara bikaduh bu.

¹² Sopŭrŭg daya mbŭh kambŭt aku, rah-i aku ati mbŭh kabŭs. Aku keya ka kayuh adi mbŭh dog taran.

¹³ Aku dingah bagŭ pinganyu sigayas; pinyitaru mbŭh sopŭrŭg-i maning aku. Ngara bisatur an rawan aku, bipekat an siŭ aku.

¹⁴ Pak atin sabah ku inŭh di Kaam, O TUHAN; Kaam inŭh Tapa ku.

¹⁵ Aku ari dog kingat Mai; nyiramat aku so pinganyu ku, so ngara adi kisiis aku.

¹⁶ Tingga urun Mai ngga mandis; nyiramat aku amai pinyirindu Mai adi dŭh bisa birubah.

¹⁷ Aku bagan Kaam, TUHAN; dŭhnyah bada aku dog pimangŭh. Isa-i bara adi ginaka dog pimangŭh; isa-i ngara pajam mūn ka sibayan.

¹⁸ Bada pajam ngara anŭ adi pingadong — sopŭrŭg adi sambuh ngga adi miruap adi ngamun daya tŭnggŭn.

¹⁹ Munki masam bās-i kayuh kana adi nyikŭn Mai yŭn ngara adi stabi di Kaam! Barang naan puan munki masam kana-i Kaam, munki masam siramat-i ngara adi Kaam grindung adi sabah di Kaam.

²⁰ Kaam sukan ngara di yŭn pinyirŭŭ Mai so pekat daya; darŭm pinyigrindung adi siramat Kaam sukan ngara so dog pimangŭh pinganyu ngara.

²¹ Puji ka TUHAN! Munki masam mandis-i Ayŭh kiren pinyirindu-I yŭn ku kan aku dog kirurung ka dog nyerang!

²² Aku taru ka bipikir nang Ayŭh mbŭh pibu aku so yŭn pinyirŭŭ-I. Pak Ayŭh dingah sirŭŭn ku, kan aku bagan mite turung so Ayŭh.

²³ Rindu TUHAN sopŭrŭg daya-I adi tŭtŭd. TUHAN grindung daya adi tŭtŭd, pak maras ngara adi sambuh.

²⁴ Jadi bake ka birani meh, sopŭrŭg ngan adi harap di TUHAN.