MAZMUR 30 - Hakcipta - Biatah Bidayuh

Dua Trima Kaseh

¹ Aku muji Kaam, TUHAN, sabab Kaam mbŭh nyiramat aku ka dŭh bada pinganyu ku tawŭh aku.

² Aku bagan mite turung so Kaam, O TUHAN, Tapa ku, ka Kaam pibua aku.

³ Kaam pijo aku so rubang kubur. Aku mbŭh re mūn ka sibayan, pak Kaam pari kudip aku.

⁴ Nang ragu puji ka TUHAN, sopŭrŭg daya-I adi tŭtŭd! Ingat kayuh adi Ayŭh adi Kudus mbŭh ndai, ka nggen trima kaseh di Ayŭh!

⁵ Baji-I dŭh tui, Pinyikana-I tan sitŭkŭd umbur. Randang batŭh kadŭ-i pripasor singarŭm, pak pinyigaŭn mandŭg isan isan.

⁶ Aku kinyam adŭp ku pagŭng ka nang, “Aku dŭh re tia dog ngarah.”

⁷ Kaam kana ngga aku, TUHAN; Kaam grindung aku keya ka kuta di darŭd. Pak komŭnŭ Kaam sukan adŭp Mai so aku, ka aku mbŭh taru.

⁸ Aku bagan Kaam, O TUHAN; aku bandar mite turung so Kaam:

⁹ “Ani utung re Mai dapŭd so pinyikabŭs ku? Ani utung re Mai dapŭd kambŭi aku mŭrŭt rubang kubur? Tungang kah daya adi mbŭh kabŭs muji Kaam? Tungang kah ngara piagah pinyitŭtŭd Mai?

¹⁰ Dingah aku, TUHAN, ka masi di aku! Turung aku, O TUHAN!”

¹¹ Kaam mbŭh nukar pinyusah ku ngga tanda pinyipawŭn; Kaam mbŭh kadi pinyusah ku ka kirurung aku ngga pawŭn.

¹² Jadi aku dŭh re pajam; aku re nang ragu puji ka Kaam. TUHAN, Kaam inŭh Tapa ku; aku re nggen trima kaseh ka Kaam ndŭg situi tui.