MAZMUR 28 - Hakcipta - Biatah Bidayuh

Dua Mite Turung

¹ O TUHAN, pingibān ku, aku bagan Kaam. Dingah sirŭŭn ku! Kambŭi Kaam dŭh nam aku, aku re sua ngga ngara mūn ka sibayan.

² Dingah aku kan aku mite turung so Kaam, kan aku pakat tangan ku nuju Ramin Mai adi kudus.

³ Dŭhnyah ngukum aku ngga daya adi ginaka, ngga ngara adi ndai arap — ngara adi mandis pinganang-i, pak adi agi pinyitiru di atin-i.

⁴ Ngukum ngara amai kayuh adi ngara mbŭh ndai, amai arap adi mbŭh ngara ndai. Ngukum ngara amai sopŭrŭg pingandai ngara. Maras ngara ngga sipatut-i.

⁵ Ngara dŭh mbit bat di kayuh adi TUHAN mbŭh ndai puan kah di kayuh adi mbŭh-I napa; jadi Ayŭh re ngukum ngara ka pirabur ngara adu adu.

⁶ Nggen puji ka TUHAN; Ayŭh mbŭh dingah sirŭŭn ku mite turung.

⁷ TUHAN grindung ka ngibān aku; aku sabah di Ayŭh. Ayŭh turung aku ka bada aku gaŭn; aku muji Ayŭh ngga ragu gaŭn.

⁸ TUHAN grindung daya-I; Ayŭh ngibān ka nyiramat raja adi-I mien.

⁹ Nyiramat daya Mai, TUHAN, ka nyiberkat ngara adi tung jamai. Jadi pingingat ngara, ka kingat ngara adu adu.