MAZMUR 144 - Hakcipta - Biatah Bidayuh

Raja Nggen Trima Kaseh di Tapa amai Mbŭh Manang

¹ Puji ka TUHAN, adi pinyigrindung ku! Ayŭh pirates aku yŭn biperang ka sidia aku yŭn perang.

² Ayŭh grindung ka ngibān aku, kuta ku ngga pinyikudip ku, di Ayŭh aku bisangan yŭn pinyigrindung. Ayŭh na bangsa bangsa di ribo kuasa ku.

³ TUHAN, ani manusia, ka Kaam kingat ngara; manusia adi bisa kabŭs, ka Kaam piduri ngara?

⁴ Ngara mbŭh keya ka abus sabak; tipuh ngara keya ka singangi.

⁵ O TUHAN, nyiratak rangit ka mūn ka sagān; tama darŭd, ka ngara re piruah asuh.

⁶ Bada kijat mikirab ka bada pinganyu Mai papar sasah; nimbak reja-panah Mai ka bada ngara bikaduh bu.

⁷ Nyapai ka sagān so sambu, tarik aku so piin tŭrŭp, ka nyiramat aku; nyiramat aku so kuasa daya tami,

⁸ adi bŭn kidaan kayuh adi sawŭ adi kadong sunggu-i ko bipayu.

⁹ Aku re nang ragu bauh yŭn Mai, O Tapa; aku re main kachapi ka biragu ka Kaam.

¹⁰ Kaam nggen pimanang di bara raja ka nyiramat urun Mai David.

¹¹ Nyiramat aku so tangan pinganyu ku; pirupas aku so kuasa daya tami, adi bŭn kidaan kayuh adi sawŭ ka kadong sunggu-i ko bipayu.

¹² Isa-i anak anak dari ta adi babŭ mara jadi keya ka anak kayuh timbu jadi tagap bake. Isa-i anak anak dayung ta jadi keya ka tiang tiang adi ramus adi ngabuh sikuh sikuh istana.

¹³ Isa-i panggau ta brisi ngga barang masam buwa pimuruh. Isa-i biri di ŭmŭh biranak bipuru ribu anak-i.

¹⁴ Isa-i sapi ta biranak bagŭ ka dŭh bubu puan kah manyap. Isa-i mating sien susah dog dingah di aran ta.

¹⁵ Sanang inŭh bangsa adi sawŭ mun anŭ; sanang inŭh daya adi Tapa-i TUHAN!