MAZMUR 138 - Hakcipta - Biatah Bidayuh

Dua Trima Kaseh

¹ Aku nggen trima kaseh di Kaam, TUHAN, ngga siabo atin ku; aku nang ragu puji ka Kaam di sirung jawin bara tapa.

² Aku nura Ramin Mai adi kudus, mutu ubak ku, ka muji adŭn Mai sabab pinyirindu Mai adi dŭh bisa birubah ngga pinyitŭtŭd Mai, sabab Kaam mbŭh kiren nang adŭn ngga pesan Mai siabo bās.

³ Kaam nam aku kan aku bagan Kaam; ngga pinyibake Mai Kaam nyibake aku.

⁴ Sopŭrŭg raja di ong re muji Kaam, TUHAN, sabab ngara mbŭh dingah janji Mai.

⁵ Ngara re biragu pasar kayuh adi Kaam mbŭh ndai ka pasar bragah bās Mai.

⁶ Sunggu Kaam adi siabo bigatung, Kaam rada ngara adi pirapat adŭp-i, ka adi sambuh dŭh dapŭd bisukan so Kaam.

⁷ Kan aku dog kirurung pinyusah, Kaam grindung aku. Kaam nyakar bara pinganyu ku ka nyiramat aku ngga kuasa Mai.

⁸ Kaam re ndai sopŭrŭg adi Kaam mbŭh bijanji; TUHAN, pinyirindu Mai tan adu adu. Ngamas kraja adi Kaam mbŭh piguru.