MAZMUR 12 - Hakcipta - Biatah Bidayuh

Dua Mite Turung

¹ Turung kieh, TUHAN! Mbŭh mating daya adi kana dŭm; daya adi jujur dŭh tia tungang dog dapŭd.

² Sopŭrŭg ngara kadong dingan-i; ngara nipu dingan ngga pinganang nganju.

³ Bada pajam jura adi nganju, O TUHAN! Mapot baba sambuh ngara adi nang,

⁴ “Ngga pinganang ami kieh dapŭd kayuh adi raan ami. Kieh re nang kayuh adi kieh raan, ka mating daya dapŭd nagah kieh.”

⁵ “Pak madin aku re mandŭg,” nang TUHAN, “sabab ngara adi sirata dog kinanyuh ka adi dog kisiis nyidaing amai mandam. Aku re nggen di ngara pinyipagŭng adi ngara gruwŭn.”

⁶ Janji TUHAN dapŭd dog sabah; sopŭrŭg-i manŭn keya ka pirak adi mbŭh dog pibisig ju kari ngga apui.

^7-8 Daya ginaka mbŭh di barang yŭn, ka barang naan daya muji kayuh adi arap. Bada kieh adu adu siramat, O TUHAN, Ka pijo kieh so daya adi mun anŭ.