MAZMUR 112 - Hakcipta - Biatah Bidayuh

Udip Sanang Daya adi Kana

¹ Muji meh TUHAN! Sanang inŭh daya adi stabi di TUHAN, adi gaŭn tunda pinganang-I.

² Bara anak-i re bikuasa di tarun tana ati; sesang-i re dog nyiberkat.

³ Rawang-i re jadi kaya, ka ayŭh re adu adu mujur.

⁴ Jawa nyekar di karŭm yŭn daya adi kana, yŭn ngara adi masi, kana, ka adi jujur;

⁵ Sanang inŭh daya adi dŭh sibut buang gagā nginjam duit ka daya, adi ndai kraja-i ngga jujur.

⁶ Daya adi kana dŭh re arah di pingandai-i; ayŭh re siraru dog ingat.

⁷ Ayŭh dŭh taru kambat agah arap; pinyabah-i tagap, ka ayŭh sabah di TUHAN.

⁸ Ayŭh dŭh susah bait kah taru; ayŭh re kiris ngga manŭn pinganyu-i arah.

⁹ Ayŭh nggen ngga siabo asŭng di daya adi sirata, ka atin mandis-i dŭh re arah; ayŭh re puno ngga kuasa buang dog stabi.

¹⁰ Daya ginaka kiris ati ka baji; ngara nyitŭrŭng darŭm tiru ka miyap; pingarap ngara mbŭh mating ndŭg situi tui.