MAZMUR 111 - Hakcipta - Biatah Bidayuh

Puji Yŭn TUHAN

¹ Muji meh TUHAN! Ngga siabo atin ku aku re nggen trima kaseh ka TUHAN di tika daya-I tikuruk.

² Munki masam saruh-i kayuh adi TUHAN ndai! Sopŭrŭg adi suka pingandai-I anŭ raan mirati-i.

³ Sopŭrŭg pingandai-I inŭh puno ngga stabi ngga kuasa; pinŭnggŭn-I inŭh tan adu adu.

⁴ TUHAN dŭh bada ata kambŭt pingandai saruh-I; Ayŭh inŭh mandis buang masi.

⁵ Ayŭh nggen pinguman di ngara adi stabi di Ayŭh; Ayŭh bŭn kambŭt simanya-I.

⁶ Ayŭh mbŭh kiren kuasa-I di daya-I darŭm-I nggen tana daya saruh di ngara.

⁷ Ayŭh tŭtŭd buang tŭnggŭn darŭm sopŭrŭg pingandai-I; sopŭrŭg pesan-I bisa yŭn bisangan.

⁸ Sopŭrŭg-i tan adu adu; sopŭrŭg-i dog nggen ngga pinyawŭ ka pinŭnggŭn.

⁹ Ayŭh pirupas daya-I ka ndai simanya adi tan adu adu ngga ngara. Kudus buang bikuasa inŭh Ayŭh!

¹⁰ Aran ngga jadi bijak inŭh stabi di TUHAN; Ayŭh nggen atin mirati di ngara adi dingah pesan-I. Ayŭh dog stabi ndŭg situi tui.