LUKE 20 - Hakcipta - Biatah Bidayuh

Pinyiken Pasar Kuasa Jesus

¹ Ndi andu kan Jesus ngajar daya ka nyuse Agah Kana di Ramin Tuhan, bara pingubak imam ngga bara gurū Ukum-adat Jahudi samŭn bara nyamba bangsa Jahudi mandŭg,

² ka nang di Ayŭh, “Kidaan di kieh, ani hak Mu ndai kayuh kayuh ati? Asi nggen di Kuu hak ngga ndai-i?”

³ Jesus nam ngara, “Aku gŭh an siken kayuh di angān. Kidaan di Aku,

⁴ hak John baptisa daya mandŭg so Tapa kah so manusia?”

⁵ Ngara rasu bikarit dupan adŭp-i, “Ani re ta nang? Kambŭi ata nang, ‘So Tapa,’ Ayŭh re nang, ‘Mani meh garang angān dŭh sabah John?’

⁶ Pak kambŭi ata nang ‘So manusia,’ bara daya ati re manjan ata ngga batuh, sabab ngara sabah John mbŭh nabi.”

⁷ Jadi ngara nam, “Kieh dŭh puan.”

⁸ Ka Jesus nang di ngara, “Dŭh gŭh Aku re kidaan di angān ani hak Ku ndai sopŭrŭg kayuh ati.”

Upama Pasar bara Pinyewa Teya Anggor

⁹ Jesus nyidundan upama ati di bara daya: “Agi ndi sidah, ndi naan daya ndai teya anggor, nyewa-i ka daya, ka rasu matak ka rais bŭkŭn mua tian-i.

¹⁰ Kan-i mbŭh tika adi ngga daya sun buwa anggor, ayŭh pait ndi naan urun ka yŭn bara pinyewa teya anggor an kambat jangi utung. Pak pinyewa teya mukong urun anŭ ka pibu ayŭh da mari bŭrŭh.

¹¹ Jadi ayŭh pait urun adi bŭkŭn; pak ngara mukong gŭh ayŭh, pimangŭh ayŭh, ka pibu ayŭh da mari bŭrŭh.

¹² Komŭnŭ ayŭh pait urun adi numbor taruh; pak pinyewa teya bada ayŭh biragan gŭh, ka taran ayŭh ka sapa teya anggor.

¹³ Ka ayŭh adi dapu teya anggor nang, ‘Ani meh patut ku ndai? Aku re pait anak nyirot adŭp ku, amai tatu ngara re stabi di ayŭh!’

¹⁴ Pak kan ngara kiris ayŭh, ngara nang dupan adŭp-i, ‘Siati inŭh anak daya adi dapu teya. Ja ata siŭ ayŭh, isa buat rata-i jadi jata!’

¹⁵ Jadi ngara taran ayŭh ka sapa teya anggor ka siŭ ayŭh. Ka Jesus siken, “Ani meh, re ayŭh adi dapu teya anggor ndai di bara pinyewa teya anggor anŭ?”

¹⁶ “Ayŭh re mandŭg ka siŭ ngara, ka nyewa teya anggor anŭ ka daya bŭkŭn.” Kan bara daya dingah kayuh anŭ, ngara nang, “Kayuh adi mun ati dŭh siŭn jadi!”

¹⁷ Jesus tingga ngara ka siken, “Ani meh garang rati pinganang Surat-kudus ati? ‘Batuh adi tukang ramin taran mbŭh jadi anŭ adi siabo biguna.’

¹⁸ Barang naan daya adi rabu di tunduh batuh anŭ re asur; ka kambŭi batuh anŭ rabu nyatŭk daya, daya anŭ re randŭk jadi dabu.”

Pinyiken pasar Bayar Suke

¹⁹ Bara gurū Ukum-adat Jahudi ka bara pingubak imam suba an nakap Jesus jam anŭ gŭh, sabab ngara puan Ayŭh nyidundan upama anŭ pasar ngara; pak ngara taru daya.

²⁰ Jadi ngara kajŭn pluang. Ngara nyuap daya da ngakar mun daya adi tŭnggŭn atin-i, ka pait ngara da kudog Jesus ngga piminyu pinganang, isa ngara bisa nyerah Ayŭh ka darŭm tangan ngga kuasa gabenor pritah Rome.

²¹ Bara pinyiong anŭ nang di Jesus, “Gurū, kieh puan kayuh adi Kaam nang ka ngajar agi batur. Kieh puan Kaam dŭh piduri pangkat daya, pak ngajar pinyiraan Tapa yŭn manusia.

²² Kidaan di kieh, miranggar Ukum-adat kah dŭh ata bayar suke ka Caesar?”

²³ Pak Jesus puan akar ngara ka nang di ngara,

²⁴ “Kiren di Aku ndi kiping duit pirak. Raŭn asi ka dŭn asi ati?” “Caesar,” ngara nam.

²⁵ Jadi Jesus nang, “Nggen di Caesar kayuh adi Caesar dapu, ka nggen di Tapa kayuh adi Tapa dapu.”

²⁶ Diginŭ di sirung jawin daya bagŭ ngara dŭh tungang nakap Ayŭh di tadŭ kayuh; jadi ngara pirŭŭ adŭp-i, buang inga inga di pinyinam-I.

Pinyiken pasar Pinyimakat so Kabŭs

²⁷ Jadi kada daya Sadducee, adi dŭh sabah di pinyimakat so kabŭs, mandŭg tudu Jesus ka nang,

²⁸ “Gurū, Moses ko nuris ukum-adat ati yŭn ami: ‘kambŭi daya kabŭs ka tingge sawŭn-i buang dŭh biyŭn anak, jurud daya anŭ patut mbit ndu sawŭn uban jurud-i ngga pakat bine yŭn-i.’

²⁹ Agi ndi sidah ju naan bijurud; adi pinuai sawan pak kabŭs dŭh biyŭn anak.

³⁰ Ka adi duwŭh tambit uban anŭ ndu sawŭn,

³¹ komŭnŭ adi taruh. Ka simŭnŭ gŭh ngga so-ju madis ngara, kabŭs dŭh biyŭn anak.

³² Sikasŭn-i, adŭp dayung anŭ kabŭs.

³³ Jadi meh di andu daya makat so kabŭs, sawŭn asi ayŭh re? So-ju ngara ko tambit ayŭh ndu sawŭn.”

³⁴ Jesus nam ngara, “Dari dayung di jaman ati banan sawan,

³⁵ pak dari dayung adi patut makat so kabŭs ka udip di jaman adi re mandŭg, ngara dŭh re tia banan sawan.

³⁶ Ngara re mun malaikat ka dŭh bisa kabŭs. Ngara mbŭh bara anak Tapa, sabab ngara mbŭh makat so kabŭs.

³⁷ Ka adŭp Moses ko nakit kidaan nang daya adi mbŭh kabŭs re dog pakat udip bauh. Di dundan pasar anak tŭngŭn kayuh adi bijagu apui dieh, ayŭh minyu pasar Tuhan adi ‘Tapa Abraham, Tapa Isaac, ka Tapa Jacob.’

³⁸ Ayŭh inŭh Tapa daya adi udip, dŭh-I Tapa daya adi kabŭs, amai di Ayŭh taŭn sopŭrŭg udip.”

³⁹ Kada gurū Ukum-adat Jahudi nang, “Gurū, kana pinyinam Mai!”

⁴⁰ Amai ngara mbŭh dŭh tia birani re nggen pinyiken di Ayŭh.

Pinyiken pasar Kristus

⁴¹ Jesus siken ngara, “Simuki daya bisa nang Kristus sesang David?

⁴² Amai adŭp David agi nang di surat Mazmur, ‘Tuhan nang di Tuhan ku: Guru digiti tura ka tauh Ku

⁴³ ndŭg ka Aku mbŭh bada pinganyu Mu jadi bangan di ribo kaja Mu.’

⁴⁴ David bagan Ayŭh ‘Tuhan’; simuki meh Kristus ati bisa jadi sesang David?”

Jesus Bakan pasar Gurū Ukum-adat Jahudi

⁴⁵ Darŭm sopŭrŭg daya dingah Ayŭh minyu, Jesus nang di bara murid-I,

⁴⁶ “Jaga meh adŭp ngan so gurū Ukum-adat Jahudi. Ngara suka panu nēn piraka ambu, ka rindu kambat tabi so daya di arong passar. Ngara mien baku adi tura ka jawin di ramin simayang-Jahudi ka tarun yŭn adi rabis kana di tika gawai.

⁴⁷ Ngara nipu dayung uban ka sirapas ramin arŭn ngara, ka komŭnŭ nadar tui bidua! Tung ngara ukum re rabis bat!”