LEVITICUS 2 - Hakcipta - Biatah Bidayuh

Sadis Ruwang Kayuh

¹ Kan tadŭ tadŭ so angān jugan sadis ruwang kayuh ka TUHAN, dŭh siŭn dŭh sibungas-i angān an ngisar-i da jadi tibaduk. Angān dŭh siŭn dŭh na inyo kanā ka kimanyan di tunduh-i,

² ka taban-i ka yŭn bara imam adi sesang Aaron. Imam adi dapu kraja di tika anŭ an tambit ndi agŭm so tibaduk anŭ ngga inyo kanā samŭn sopŭrŭg kimanyan, ka badang-i di tunduh mija-sambah jadi tandā sopŭrŭg kayuh anŭ mbŭh dog jugan ka TUHAN. Dagŭn sadis pinguman anŭ pimunos asŭng TUHAN.

³ Jadi tadŭh sadis ruwang kayuh anŭ bara imam dapu; anŭ kayuh adi raru kudus, amai-i mbŭh dog tambit so pinguman adi mbŭh dog jugan ka TUHAN.

⁴ Kambŭi pinganggen anŭ ruti adi dog ndai ngga oven-tana, dŭhsah-i biragi. Bait-i ruti adi bibaru adi dog ndai so tibaduk bigaur ngga inyo kanā, puan kah biskit adi dog susen inyo kanā dieh.

⁵ Kambŭi pinganggen anŭ ruti adi dog mipi di darŭm kuari adi dadas, ruti anŭ an bigaur ngga inyo kanā pak dŭhsah biragi.

⁶ Nyiratak-i bada anŭk ka ren inyo kanā di tunduh-i kan angān jugan-i.

⁷ Kambŭi pinganggen anŭ ruti adi dog mipi di darŭm kuari, ayŭh an dog ndai so tibaduk ngga inyo kanā.

⁸ Taban ndu pinganggen ka TUHAN ka nggen di imam adi re taban-i ka mija-sambah.

⁹ Imam anŭ re tambit pire-i ndu tandā-i muko dog jugan ka TUHAN, ka ayŭh re badang-i di tunduh mija-sambah. Dagŭn sadis pinguman anŭ pimunos asŭng TUHAN.

¹⁰ Jadi tadŭh pinganggen anŭ bara imam dapu; pinganggen anŭ raru kudus, amai-i dog tambit so pinguman adi muko dog jugan ka TUHAN.

¹¹ Sadis ruwang kayuh adi angān jugan ka TUHAN dŭh siŭn dog ndai ngga ragi; angān dŭh siŭn pakai ragi puan kah ju banyis di pinguman adi dog jugan ka TUHAN.

¹² Pinganggen buwa bungas adi siabo kana adi angān ngatŭm barang sawa an dog taban ka yŭn TUHAN, pak-i dŭh yŭn dog badang di tunduh mija-sambah.

¹³ Na garo di barang sadis ruwang kayuh, sabab garo inŭh tandā simanya ngan ngga Tapa. (Angān dŭh siŭn dŭh na garo di sopŭrŭg sadis ngan anŭ.)

¹⁴ Kan angān taban ka yŭn TUHAN pinganggen buwa bungas adi siabo kana adi angān ngatŭm, jugan anŭ adi muko dog nyirandang, puan kah anŭ adi muko dog pŭh bada anŭk.

¹⁵ Na inyo kanā ka na kimanyan di tunduh-i.

¹⁶ Imam anŭ re badang kada tibaduk anŭ samŭn inyo ndu tandā sopŭrŭg-i mbŭh dog jugan, ka sopŭrŭg kimanyan, ndu sadis pinguman ka TUHAN.