LEVITICUS 14 - Hakcipta - Biatah Bidayuh

Adat Pibisig ripas ko dog Andam Kurit adi Bisā.

¹ TUHAN nggen di Moses,

² atur-adat ati yŭn adat pibisig daya adi mbŭh bua so andam kurit adi bisā: Andu adi ngga daya re dog pikadŭn bisig daya anŭ dŭh siŭn dŭh dog taban ka yŭn imam.

³ Jadi imam anŭ siŭn taban daya anŭ ngga ka sapa tarun yŭn bibari ka piruh ayŭh. Kambŭi andam anŭ sawŭ mbŭh bua,

⁴ imam anŭ siŭn bada duwŭh manuk adi bisig nanyam ka adat dog taban ka yŭn adŭp-i, samŭn supek kayuh sedar, taris adi bireh, ka anak tugu kayuh hyssop.

⁵ Komŭnŭ, ayŭh bada ndi so manuk anŭ dog siŭ da nyirungan makuk tana adi birisi ngga piin bisig adi so rubang piin.

⁶ Ayŭh siŭn tambit manuk anŭ adi ndi ka siruman-i biramah ngga supek sedar, taris anŭ adi bireh ka samah tugu hyssop, di deya manuk anŭ adi muko dog siŭ.

⁷ Ayŭh masik deya anŭ pikuju kari di daya anŭ adi an dog pibisig so andam kurit-i ka pikadŭn ayŭh mbŭh bisig. Ka imam anŭ piruah manuk anŭ adi udip bada mikabur bu.

⁸ Daya anŭ siŭn ngu piraka-i, kubo gumbak ubok-i ka mamuh; nŭ ka ayŭh sawŭ mbŭh bisig nanyam ka adat. Ayŭh siŭn mŭrŭt tarun yŭn bibari, pak ayŭh dŭh siŭn dŭh an rŭŭ di sapa bari-i sitŭkŭd ju andu.

⁹ Ngga andu adi ju, ayŭh siŭn nundo ubak-i dinge, gumbak gagap-i, buruh kaning-i, samŭn buruh buruh adi agi di pŭrŭng-i. Ayŭh siŭn ngu piraka-i ka mamuh, ko anŭ nŭ ka ayŭh jadi bisig nanyam ka adat.

¹⁰ Di andu adi mai ayŭh siŭn taban duwŭh anak biri adi dari ngga ndi anak biri adi dayung samah mbŭh ndi sawa umbur-i ka adi pidanah, taruh kilogram tibaduk adi dog gaur ngga inyo kanā, ka ndi utung so taruh sukad lita inyo kanā.

¹¹ Imam siŭn taban ayŭh samŭn dudu pinganggen anŭ ka tiban Bari Tuhan.

¹² Komŭnŭ imam siŭn tambit ndi so dari biri anŭ, samŭn ndi utung so taruh sukad lita inyo anŭ, ka jugan-i ndu sadis bayar gati rugi. Ayŭh siŭn jugan-i ndu pinganggen adi grua ka TUHAN.

¹³ Ayŭh siŭn siŭ anak biri anŭ di tarun yŭn adi kudus adi yŭn dāng dāng dog siŭ ndu sadis taran dosa ka sadis badang. Ayŭh dŭh siŭn dŭh ndai simŭnŭ sabab sadis bayar gati rugi, nimun ka sadis taran dosa, mbŭh tah tung imam, ka mbŭh raru kudus.

¹⁴ Imam siŭn tambit kada deya biri anŭ ka susen-i di dawŭn kajit tauh, di sindŭ trinju tangan tauh, ka di sindŭ kaja tauh daya adi an dog pikadŭn bisig nanyam ka adat.

¹⁵ Imam siŭn tambit kada inyo kanā ka ren-i di pura tangan bait adŭp-i,

¹⁶ njug trinju tangan tauh-i dieh, ka masik-i pikuju kari di darŭm Bari TUHAN.

¹⁷ Ayŭh siŭn tambit kada inyo adi di pura tangan-i ka kada deya biri ka susen-i di dawŭn kajit tauh, di sindŭ trinju tangan tauh, ka di sindŭ kaja tauh daya adi an dog pikadŭn bisig.

¹⁸ Ayŭh siŭn gurai tadŭh inyo anŭ adi agi di pura tangan-i di tunduh ubak daya anŭ. Simŭnŭ inŭh ayŭh siŭn pimanu adat pibisig.

¹⁹ Komŭnŭ, imam siŭn jugan sadis taran dosa, ka pimanu adat pibisig. Ripas anŭ, ayŭh siŭn siŭ dāng anŭ yŭn sadis badang,

²⁰ ka jugan-i samah ngga sadis ruwang kayuh di tunduh mija-sambah. Simŭnŭ inŭh imam anŭ siŭn pimanu adat pibisig, ka daya anŭ siŭn jadi bisig.

²¹ Kambŭi daya anŭ sirata ka dŭh tungang nggen dinge, ayŭh siŭn taban yŭn adat pibisig-i ndi anak biri adi dari ndu sadis bayar gati rugi, pinganggen adi grua ka TUHAN yŭn imam. Ayŭh siŭn taban gŭh ndi kilogram tibaduk dog gaur ngga inyo kanā yŭn sadis ruwang kayuh samŭn ndi utung so taruh sukad lita inyo kanā.

²² Ayŭh siŭn taban gŭh duwŭh manuk asang, puan kah duwŭh pŭrŭng manuk tikukur, ndi yŭn sadis taran dosa, ka ndi yŭn sadis badang.

²³ Di andu adi mai adat pibisig-i ayŭh siŭn taban manuk manuk anŭ ka imam di tiban Bari TUHAN.

²⁴ Imam siŭn tambit anak biri anŭ samŭn inyo kanā ka jugan-i ndu pinganggen adi grua ka TUHAN, ka anŭ mbŭh tah tung imam anŭ.

²⁵ Ayŭh siŭn siŭ anak biri anŭ ka tambit kada deya-i ka susen-i di sagān dawŭn kajit tauh daya anŭ, di sindŭ tangan tauh-i, ka di sindŭ kaja tauh-i gŭh.

²⁶ Imam siŭn ren kada inyo di pura tangan bait adŭp-i,

²⁷ ka ngga trinju tangan tauh-i ayŭh masik kada deya anŭ pikuju kari diginŭ di darŭm Bari TUHAN.

²⁸ Imam siŭn susen kada inyo anŭ di yŭn-i ko susen deya: di sagān dawŭn kajit tauh daya anŭ, di sindŭ trinju tangan tauh-i, ka di sindŭ kaja tauh-i gŭh.

²⁹ Jadi tadŭh inyo adi agi di pura tangan-i, imam siŭn susen di tunduh ubak daya anŭ; ka simŭnŭ inŭh imam anŭ pimanu adat pibisig.

³⁰ Komŭnŭ, ayŭh siŭn jugan ndi so manuk asang puan kah manuk tikukur anŭ

³¹ ndu sadis taran dosa, ka manuk anŭ ndi siŭn dog pakai ndu sadis badang adi imam badang samah ngga sadis ruwang kayuh. Simŭnŭ inŭh imam anŭ pimanu adat pibisig.

³² Ati inŭh ukum-adat yŭn daya adi mbŭh dog andam kurit adi bisā, pak adi dŭh tungang nggen nanyam ka anŭ adi patut dog jugan yŭn adat pibisig-i.

Kurat darŭm Ramin

³³ TUHAN nggen di Moses ngga Aaron,

³⁴ atur-adat ati pasar ramin adi dog kurat adi papah: (Atur-adat ati siŭn dog pakai ripas daya Israel mŭrŭt tarun tana Canaan adi TUHAN an nggen di ngara ndu bisaka.)

³⁵ Kambŭi daya nang TUHAN mbŭh pait kurat bada timbu di ramin-i, ayŭh dŭh siŭn dŭh di kidaan di imam.

³⁶ Imam anŭ siŭn bada sopŭrŭg kayuh adi agi darŭm ramin anŭ dog kadi na ka sapa, diŭ so-i mŭrŭt di piruh kurat anŭ; sopŭrŭg kayuh anŭ dog kadŭn kais rai-i. Ko anŭ, ka ayŭh mŭrŭt ramin anŭ

³⁷ ka piruh kurat anŭ. Kambŭi agi tapo tapo adi barŭm puan kah bireh adi man sindung ramin anŭ,

³⁸ ayŭh siŭn ruah so ramin anŭ, ka ngabŭt-i yŭn tipuh ju andu.

³⁹ Di andu adi ju, ayŭh pari di piruh-i. Kambŭi kurat anŭ papah,

⁴⁰ ayŭh siŭn bada batuh batuh anŭ adi yŭn kurat anŭ dog dapŭd, dog kadi ka taran ka tarun adi kais di sapa kupo.

⁴¹ Ripas anŭ, sopŭrŭg sindung di parad ka darŭm dog ngiis ka sapok samen an dog taran di tarun adi kais di sapa kupo.

⁴² Komŭnŭ batuh batuh adi bŭkŭn siŭn dog pakai ngga gati adi muko dog kadi, ka samen adi bauh siŭn dog pakai ngga nutu sindung anŭ.

⁴³ Kambŭi kurat timbur dinge di ramin anŭ, ripas batuh sindung anŭ muko dog kadi, ka ramin anŭ muko gŭh dog ngiis ka dog nyamen bauh,

⁴⁴ imam siŭn di pirasa. Kambŭi kurat anŭ papah, ramin anŭ kais.

⁴⁵ Ramin anŭ dŭh siŭn dŭh dog nyirubuh, batuh batuh-i, kayuh kayuh-i, samŭn sopŭrŭg samen dŭh siŭn dŭh dog taban ruah ka sapa kupo, ka taran di tarun adi kais.

⁴⁶ Tadŭ tadŭ daya adi mŭrŭt ramin anŭ darŭm-i gibabŭ dog ngabŭt jadi kais ndŭg ka singumi andu.

⁴⁷ Tadŭ tadŭ daya adi guring puan kah man darŭm ramin anŭ dŭh siŭn dŭh ngu piraka-i.

⁴⁸ Kambŭi di tika imam mandŭg di pirasa ramin anŭ, ka kurat mating timbur dinge ripas-i muko dog nyamen bauh, imam anŭ siŭn pikadŭn ramin anŭ bisig, sabab kurat anŭ mbŭh abo dog kadi.

⁴⁹ Ngga pimanu adat pibisig di ramin anŭ, imam siŭn tambit duwŭh pŭrŭng manuk, kada supek kayuh sedar, taris bireh, ka tugu hyssop.

⁵⁰ Ayŭh siŭn siŭ ndi so manuk anŭ da nyirungan makuk tana adi birisi ngga piin bisig adi so rubang piin.

⁵¹ Komŭnŭ ayŭh siŭn tambit supek kayuh sedar, tugu hyssop, taris bireh, samŭn manuk anŭ adi babŭ udip ka siruman sopŭrŭg-i di deya manuk anŭ adi ko dog siŭ ka di piin bisig anŭ. Ka ayŭh siŭn masik ramin anŭ pikuju kari.

⁵² Simŭnŭ ayŭh pibisig ramin anŭ ngga deya manuk, piin bisig, manuk adi udip, supek kayuh sedar, tugu hyssop, ka taris bireh.

⁵³ Komŭnŭ, ayŭh siŭn piruah manuk anŭ bada mikabur ka sapa kupo di ka darŭm tarun. Simŭnŭ inŭh ayŭh pimanu adat pibisig yŭn ramin anŭ, ka-i jadi bisig nanyam ka adat.

⁵⁴ Ati inŭh ukum-adat yŭn andam kurit adi bisā;

^55-56 bakang, pirakis, bŭ bŭ; ka pasar kurat di piraka puan kah di ramin.

⁵⁷ Ukum-adat ati natu kidaan pasar kayuh adi kais ngga adi dŭh kais.