JONAH 4 - Hakcipta - Biatah Bidayuh

Jonah Baji ka Tapa Masi

¹ Jonah dŭh munos asŭng-i di kayuh adi mbŭh jadi ka mbŭh baji.

² Ayŭh bidua, “TUHAN, dŭh kah aku agi nang sibayuh aku matak tingge ramin arŭn ku, nang ati inŭh kayuh adi re Mai ndai? Anŭ inŭh sabab aku rikas di ka Spain! Aku puan Kaam inŭh Tapa adi rindu ka adi masi, ari sabar, ari mandis, ka ari sidia an nukar pikir ka dŭh jadi ngukum.

³ Madin, TUHAN, bada aku kabŭs. Kana dŭ aku kabŭs.”

⁴ TUHAN nam, “Ani hak mu baji?”

⁵ Jonah di ka parad timor kupo anŭ ka guru. Ayŭh ndai ndi bari yŭn adŭp-i ka guru di sayung-i, kajŭn ka tingga ani re jadi di Nineveh.

⁶ Komŭnŭ TUHAN Tapa bada anak tŭngŭn kayuh-udip timbu ka bigatung ngga nyayung ayŭh, isa ayŭh rabis munos asŭng-i diginŭ. Jonah mbŭh raru munos asŭng-i ngga anak tŭngŭn kayuh-udip anŭ.

⁷ Pak awar isan isan andu jawa ndi, so pinganang Tapa, ŭrŭd nyerang anak tŭngŭn kayuh-udip anŭ, ka-i kabŭs.

⁸ Kan batŭh andu mbŭh makat, Tapa pait sabak adi paras so timor, ka Jonah batang re mijŭp bada paras batŭh andu adi dog ubak-i. Jadi Ayŭh kira adŭp-i mbŭh kana dŭ kabŭs. “Kana dŭ aku kabŭs so aku udip,” ayŭh nang.

⁹ Pak Tapa nang di ayŭh, “Ani hak mu baji pasar anak tŭngŭn kayuh-udip anŭ?” Jonah nam, “Aku biyŭn hak baji — mbŭh sukup baji ndŭg ka aku an kabŭs!”

¹⁰ TUHAN nang di ayŭh, “Anak tŭngŭn kayuh anŭ timbu bigatung ndi ngarŭm ka miyap andu andi; kuu mating ndai ani ani yŭn-i, ka kuu mating bada-i timbu — pak kuu ruai nyibara-i!

¹¹ Rabis meh dinge, Aku patut masi di Nineveh, kupo bās anŭ. Kupo anŭ biyŭn rabis so 120,000 naan anak-sŭ adi dŭh biyŭn sarah, ka simŭnŭ gŭh dāng dāng!”