JOB 4 - Hakcipta - Biatah Bidayuh

Sibungas Kirakar 4.1—14.22 Eliphaz

^1-2 Job, dŭh kah kuu tuas kambŭi aku minyu? Aku mbŭh dŭh tan re adu adu pirŭŭ adŭp ku.

³ Kuu mbŭh ngajar bagŭ daya ka mbŭh nggen pinyibake di tangan adi ramah.

⁴ Kan daya rabu, ramah ka kawŭk, pinganang mu ngatat ayŭh bada mijog.

⁵ Madin kuu inŭh adi dog nyatŭk pinyusah, ka kuu mbŭh tikaran nura-i.

⁶ Kuu nyambah Tapa, ka pimudip mu dŭh biyŭn sarah; ngapŭi kuu an biyŭn atin sabah ngga pingarap.

⁷ Suba kuu kira, mbŭh kah daya adi tŭnggŭn dog nyatŭk pinyusah.

⁸ Aku mbŭh kiris daya majak ŭmŭh pimudip arap ka purun pimudip ginaka keya ka bine; madin ngara ngatŭm pimudip ginaka ngga arap.

⁹ Mun sabak ribut, Tapa pirabur ngara darŭm baji-I.

¹⁰ Ngara adi ginaka nyidaong ka ngŭr mun singah, pak Tapa bada ngara pajam ka mata jipŭh ngara.

¹¹ Mun singah mating re-i siŭ ka man, ngara kabŭs, ka sopŭrŭg anak ngara basak basik.

¹² Agi ndi sidah pinganang mandŭg ka aku keya ka dog sigayas di kajit ku.

¹³ Keya ka pŭmŭh adi arap ngaso aku bŭŭs.

¹⁴ Pŭrŭng ku kimŭtŭr ka bigagar; ndi pŭrŭng ganan ku kimŭtŭr ngga taru.

¹⁵ abus sabak murah jawin ku, ka buruh ku mijog amai taru.

¹⁶ Aku kiris kayuh mijog diginŭ; aku nakit tingga, pak aku dŭh puan ani anŭ. Komŭnŭ buang tarun pajam aku dingah sirŭŭn:

¹⁷ “Dapŭd kah daya jadi tŭnggŭn di batŭh Tapa puan kah jadi bisig di jawin Pinapa-I?

¹⁸ Tapa dŭh sabah bara urun-I di shorga; Ayŭh dapŭd malaikat malaikat-I sarah.

¹⁹ Kuu pikir Ayŭh re sabah kayuh adi dog ndai so tana, kayuh so dabu adi bisa dog pirandŭk mun brembang?

²⁰ Daya anŭ udip isan isan, pak kabŭs dŭh dog puan ngga arong singumi andu.

²¹ Sopŭrŭg adi-i biyŭn manyap; ayŭh kabŭs, gibayuh sukup bijak.”