JOB 2 - Hakcipta - Biatah Bidayuh

Shetan Suba Job Dinge

¹ Kan andu adi ngga bara malaikat tikuruk di sirung jawin TUHAN dinge, Shetan agi sua di dupan ngara.

² TUHAN siken ayŭh, “So ki kuu?” Shetan nam, “Aku agi panu kamati kamanŭ, bidandong di ong.”

³ “Agi kuu kiris urun Ku Job?” TUHAN siken. “Mating daya di ong re tŭtŭd buang kana mun ayŭh. Ayŭh nyambah Aku ka mbŭh nakit ngga adŭp-i dŭh re ndai kayuh arap. Kuu ngasu Aku bada nyibandar kuu nyerang ayŭh ngga dŭh biyŭn pada, pak Job taŭn-i babŭ tŭtŭd.”

⁴ Shetan nam, “Daya dŭh re piduri ani ani ramŭn-i an dapŭd tui udip.

⁵ Pak nyamtadar-i Kaam kinaman pŭrŭng-i, ayŭh re tatu bandar bandar mangu Kaam!”

⁶ Jadi TUHAN nang di Shetan, “Bisa, ayŭh inŭh darŭm tangan mu, pak kuu dŭh siŭn siŭ ayŭh.”

⁷ Komŭnŭ Shetan ruah so yŭn TUHAN ka bada pŭrŭng ganan Job puno ngga gadag.

⁸ Job di guru sindŭk tugung sapok ka tambit ndi supek pape priok ngga ngikis gadag-i.

⁹ Sawŭn-i nang di ayŭh, “Gibabŭ kah kuu tŭtŭd di Tapa? Mangu adŭ Tapa ka kabŭs adŭ nŭŭh!”

¹⁰ Job nam, “Budo pinganang mu anŭ! Kan Tapa pait ka ata kayuh kana, ata trima-i. Simuki meh ata re mingungut kan Ayŭh pait ka ata pinyusah?” Sunggu Job sangsara, ayŭh mating nang ani ani rawan Tapa.

Bara Jerā Job Mandŭg

¹¹ Taruh naan jerā Job anŭ, inŭh Eliphaz so kupo Teman, Bildad so tarun tana Shuah, ka Zophar so tarun tana Naamah. Kan ngara dingah munki masam Job mbŭh sangsara, ngara ndai pikir ngara ka mandŭg di nyaduh ayŭh.

¹² Darŭm ngara gibabŭ jo ngara kiris Job, pak dŭh natŭng ayŭh. Kan ngara natŭng ayŭh, ngara rasu nangŭng sien, nyiratak piraka ngara darŭm susah buang taran dabu di au-tarun ka di tunduh ubak ngara.

¹³ Komŭnŭ ngara guru diginŭ di tana ayō ayŭh ju andu ju ngarŭm dŭh nang ani ani, sabab ngara kiris munki masam ayŭh mbŭh sangsara.