JEREMIAH 42 - Hakcipta - Biatah Bidayuh

Bara Daya Mite Jeremiah Bidua yŭn Ngara

¹ Komŭnŭ sopŭrŭg pinguru tibaran bara soldadu anŭ, samŭn Johanan anak Kareah ka Azariah anak Heshaiah, mandŭg ngga bara daya adi bās ngga adi sŭ pangkat-i

² ka nang di aku, “Turung ndai kayuh adi kieh mite! Bidua ka TUHAN adi Tapa ta yŭn ami. Bidua yŭn sopŭrŭg ami adi siramat. Dawŭ-i kieh bagŭ; pak tingga madin, nisŭ adŭ kieh dŭm.

³ Bidua mite TUHAN adi Tapa ta kiren di kieh aran adi patut ami kadŭg ka kayuh adi patut ami ndai.”

⁴ Aku nam, “Bisa. Aku re bidua ka TUHAN adi Tapa ta, nimun pimite ngan, ka ani ani adi-I nang, aku re kidaan di angān. Aku dŭh re miman kayuh so angān.”

⁵ Komŭnŭ ngara nang di aku, “Isa-i TUHAN jadi saksi adi sawŭ ka adi tŭtŭd rawan kieh kambŭi kieh dŭh tunda sopŭrŭg pesan adi TUHAN adi Tapa ta nggen di kieh.

⁶ Bidua ka TUHAN yŭn ami. Ka pinyinam-I, bait-i adi pimunos asŭng puan kah adi dŭh pimunos asŭng, kieh re nundok di Ayŭh. Sopŭrŭg kayuh re kana yŭn ami kambŭi kieh dingah pinganang-I.”

Pinyinam TUHAN yŭn Dua Jeremiah

⁷ Simŭng andu ripas anŭ TUHAN minyu ngga aku;

⁸ Jadi aku bagan Johanan, sopŭrŭg pinguru tibaran bara soldadu-i, ka sopŭrŭg daya adi bŭkŭn.

⁹ Aku nang di ngara, “Angān bagan aku bada ndai pimite yŭn ngan. Ati inŭh pinganang-I:

¹⁰ ‘Kambŭi angān raan adu adu rŭŭ di tarun tana ati, Aku an pijog angān ka dŭh nyirubuh angān; Aku re purun angān ka dŭh dimbut angān. Pinyirusag adi Aku mbŭh bada nyatŭk angān mbŭh bada Aku susah.

¹¹ Dŭh tia taru raja Babylonia. Aku agi ngga angān, ka Aku re nyiramat angān so kuasa-i.

¹² Sabab Aku masi, Aku re bada ayŭh masi di angān ka bada angān mari. Aku, adi TUHAN, mbŭh minyu.’

^13-15 “Pak angān adi babŭ di Judah dŭh siŭn nyibireu pinganang TUHAN adi Tapa ngan bait abah rŭŭ di tarun tana ati. Angān dŭh siŭn nang, ‘Dŭh, kieh re di ka Egypt ka rŭŭ diginŭ, di yŭn ami re dŭh tia kiris perang, bait dingah trompet dog mambak bagan daya bada di biperang, bait sibŭrŭk.’ Kambŭi angān nang sakanŭ, TUHAN Bisa-pŭrŭg, adi Tapa Israel, nang, ‘Kambŭi angān bigŭtŭ raan di ka Egypt ka rŭŭ diginŭ,

¹⁶ perang adi angān taru re tudu angān, ka pimudip sikirau re tunda angān, ka angān re kabŭs diginŭ di Egypt.

¹⁷ Sopŭrŭg adi bigŭtŭ raan rŭŭ di Egypt re kabŭs darŭm perang, bait kabŭs sikirau, bait kabŭs dog andam. Ndi naan mating gŭh re siramat, ndi naan mating gŭh re dapŭd pirupas adŭp-i so pinyirusag adi Aku re bada nyatŭk ngara.’

¹⁸ “TUHAN, adi Tapa Israel, nang, ‘Nimun baji bangok Ku mbŭh nyatŭk daya Jerusalem, simŭnŭ inŭh bangok Ku re nyatŭk angān kambŭi angān di ka Egypt. Angān re tikŭnŭd daya kiris; daya re ngamun angān ka pakai dŭn ngan ndu pangu. Angān re dŭh tia kiris tarun yŭn ati dinge.’ ”

¹⁹ Aku nang dinge, “TUHAN mbŭh bada angān adi babŭ di Judah dŭh di ka Egypt. Ngapŭi meh aku bakan angān madin

²⁰ nang angān mbŭh ndai sarah bās. Angān mite aku bidua ka TUHAN adi Tapa ta yŭn ngan, ka angān bijanji nang angān an ndai sopŭrŭg kayuh adi Ayŭh pesan.

²¹ Aku muko kidaan di angān, pak angān nyibireu sopŭrŭg kayuh adi TUHAN Tapa ta mbŭh bada aku kidaan di angān.

²² Ngapŭi meh, ingat ati: angān re kabŭs darŭm perang, bait sabab sikirau, bait sabab andam, di tarun tana adi angān raan rŭŭ dieh.”