JEREMIAH 40 - Hakcipta - Biatah Bidayuh

Jeremiah Rŭŭ ngga Gedaliah

¹ TUHAN minyu ngga aku ripas Nebuzaradan, adi pingibās soldadu, mbŭh pirupas aku di Ramah. Aku dog taban kamanŭ dog muak ngga parik basi, samah sopŭrŭg daya Jerusalem ngga daya Judah adi dog taban ngga bu jadi daya-takap ka Babylonia.

² Pingibās soldadu anŭ taban aku ka bŭngŭn ka nang, “TUHAN adi Tapa mu muko bakan nang adŭp-I re taban pinyirusag bada nyatŭk tarun tana ati,

³ ka madin Ayŭh mbŭh ndai anŭ adi-I nang adŭp-I an ndai. Sopŭrŭg kayuh anŭ jadi sabab daya mu bidosa rawan TUHAN ka dŭh tunda pinganang-I.

⁴ Madin, Aku kadi parik basi so tangan mu ka pirupas kuu. Kambŭi kuu raan di ka Babylonia ngga aku, kuu siŭn, ka aku re kingat kuu. Pak kambŭi kuu dŭh raan, anŭ sŭn adŭp mu nang. Di ndi tarun tarun tana rais ati kuu siŭn panu kamaki maki kuu raan.”

⁵ Kan aku dŭh nam, Nebuzaradan nang, “Panu di ka Gedaliah, adi anak Ahikam ka sukuh Shaphan, adi raja Babylonia mbŭh bada jadi gabenor di kupo kupo Judah. Kuu bisa rŭŭ ngga ayŭh ka bigaur ngga rayat, puan kah di ka tadŭ yŭn mu pikir kuu patut di.” Komŭnŭ ayŭh nggen di aku pinganggen ngga inged, ka rasu pirupas aku.

⁶ Aku di ka rŭŭ ngga Gedaliah di Mizpah ka bigaur ngga rayat adi babŭ di rais anŭ.

⁷ Agi kada pingubak ngga kada soldadu daya Judah adi dŭh nyerah adŭp ngara. Ngara dingah raja Babylonia mbŭh bada Gedaliah jadi gabenor di rais anŭ ka bada ayŭh nguasa sopŭrŭg daya adi siabo sirata adi dŭh dog taban ngga bu ka Babylonia.

⁸ Jadi Ishmael anak Nethaniah, Johanan anak Kareah, Seraiah anak Tanhumeth, anak anak Ephai so Netophah, ngga Jezaniah so Maacah di ngga bara daya ngara ka Gedaliah di Mizpah.

⁹ Gedaliah nang di ngara, “Aku jamen nang angān dŭhsah taru nyerah adŭp ngan di daya Babylonia. Rŭŭ di tarun tana ati, bituan di raja Babylonia, ka angān re siramat.

¹⁰ Adŭp ku re rŭŭ di Mizpah ka jadi pingarun ngan kan daya Babylonia mandŭg kamati. Pak angān siŭn nyikŭn wain, buwa buwa pimuruh, ka inyo kanā, ka rŭŭ di anak anak kupo adi angān ngisi.”

¹¹ Atan anŭ, sopŭrŭg daya Israel adi di Moab, Ammon, Edom ka di rais rais adi bŭkŭn, dingah raja Babylonia mbŭh nyibandar kada daya Israel babŭ rŭŭ di Judah ka mbŭh bada Gedaliah jadi gabenor ngara.

¹² Jadi ngara bu tingge tarun adi yŭn ngara mbŭh papar sasah, ka pari ka Judah. Ngara mandŭg ka Gedaliah di Mizpah, ka diginŭ ngara nyikŭn raru bagŭ wain ngga buwa buwa pimuruh.

Gedaliah dog Siŭ

¹³ Ripas anŭ, Johanan ngga pinguru pinguru bara soldadu adi dŭh nyerah adŭp ngara mandŭg ka yŭn Gedaliah di Mizpah

¹⁴ ka nang di ayŭh, “Dŭh kah kuu puan nang Raja Baalis so Ammon mbŭh pait Ishmael bada siŭ kuu?” Pak Gedaliah dŭh sabah.

¹⁵ Komŭnŭ Johanan nang di ayŭh darŭm bisukan, “Bada aku di siŭ Ishmael. Mating daya re puan asi siŭ ayŭh. Mani ayŭh sanang dog bada di siŭ kuu? Anŭ re bada sopŭrŭg daya Jahudi adi mbŭh nguruk adŭp ngara maning kuu papar sasah, ka-i re taban pinyirusag di sopŭrŭg daya adi babŭ di Judah.”

¹⁶ Pak Gedaliah nam, “Dŭhnyah! Kayuh adi kuu nang pasar Ishmael dŭh inŭh sawŭ!”