JEREMIAH 37 - Hakcipta - Biatah Bidayuh

Pimite Zedekiah di Jeremiah

¹ Raja Nebuchadnezzar so Babylonia bada Zedekiah anak Josiah jadi raja Judah ngga gati Jehoiachin anak Jehoiakim.

² Pak Zedekiah ngga bara pinurung-i ngga rayat-i dŭh tunda pinganang adi TUHAN mbŭh nggen di aku.

³ Raja Zedekiah pait Jehucal anak Shelemiah ngga imam Zephaniah anak Maaseiah bada mite aku bidua ka TUHAN adi Tapa ta ngga ngarun bangsa ta.

⁴ Aku gibayuh dog na darŭm jer ka gibabŭ suka asŭng ku panu kamati kamanŭ dupan bara daya.

⁵ Tibaran bara soldadu daya Babylonia mbŭh nyikapung Jerusalem, pak kan ngara dingah tibaran bara soldadu daya Egypt mbŭh mutas baat Egypt, ngara ngundur.

⁶ Komŭnŭ TUHAN, adi Tapa Israel, bada aku

⁷ nang di Zedekiah, “Tibaran bara soldadu daya Egypt mbŭh mandŭg re turung kuu, pak ngara re pari.

⁸ Ko anŭ daya Babylonia re pari, nyerang kupo ati, sirabut-i, ka badang-i.

⁹ Aku, adi TUHAN, mbŭh bakan kuu dŭhnyah kadong adŭp mu nang daya Babylonia re dŭh pari; ngara anŭ sawŭ re pari.

¹⁰ Sunggu kuu ngarah sopŭrŭg soldadu daya Babylonia bait kani, ndŭg ka ngara adi biragan adŭ dŭm prigatang darŭm bari ngara, ngara anŭ babŭ gŭh re makat ka sigot kupo ati ndŭg ka rŭpŭg.”

Jeremiah dog Nakap ka dog Jer

¹¹ Tibaran bara soldadu Babylonia ngundur so Jerusalem sabab tibaran bara soldadu daya Egypt masang mandŭg tudu kupo anŭ.

¹² Jadi aku re an bu so Jerusalem di ka utung tarun tana Benjamin di tambit tung jaku utung di buat-rata rawang.

¹³ Pak kan aku mbŭh ndŭg Tiban Benjamin, ndi naan pingubak bara soldadu adi tukang jaga diginŭ, dŭn Irijah anak Shelemiah ka sukuh Hananiah, bada aku rŭŭ ka nang, “Kuu re bu ka parad daya Babylonia!”

¹⁴ Aku nam, “Dŭh! Aku dŭh bu ka parad kamanŭ.” Pak Irijah dŭh an dingah aku. Ayŭh tanŭ ka nakap aku ka taban aku ka yŭn bara pinurung soldadu.

¹⁵ Ngara raru baji di aku ka nggen ukum bada aku dog mukong ka dog kurung di ramin Jonathan, adi tukang pinuris; ramin anŭ mbŭh dog bada jadi ramin jer.

¹⁶ Aku dog na darŭm birit adi di darŭm tana ka dog tandah diginŭ mua tui-i.

¹⁷ Ripas anŭ Raja Zedekiah bada aku dog taban ka yŭn adŭp-i, ka diginŭ di istana ayŭh siken di aku darŭm bisukan, “Agi kah pinganang so TUHAN?” “Agi”, aku nam, ka aku nang, “Kuu re dog nggen ka darŭm tangan raja Babylonia.”

¹⁸ Komŭnŭ aku siken, “Ani sarah adi aku mbŭh ndai rawan kuu ka rawan bara pinurung mu ka bara daya mu, adi bada kuu na aku darŭm jer?

¹⁹ Diki bara nabi mu adi kidaan di kuu nang raja Babylonia dŭh re nyerang kuu bait rais mu?

²⁰ Jadi madin, Tuan Raja, aku mite kuu dingah aku ka ndai kayuh adi aku mite. Turung dŭhnyah pait aku pari ka ramin jer Jonathan. Kambŭi kuu pait aku pari kamanŭ, aku manŭn re kabŭs diginŭ.”

²¹ Jadi Raja Zedekiah nggen ukum bada aku dog kurung di badag istana. Aku rŭŭ diginŭ, ka barang andu aku dog nggen ndi baru ruti so yŭn daya ndai ruti ndŭg ka sopŭrŭg ruti di kupo mbŭh abo.