JAMES 1 - Hakcipta - Biatah Bidayuh

¹ So James, adi urun Tapa ngga Tuhan Jesus Kristus: Tabi ka sopŭrŭg daya adi Tapa mbŭh mien adi papar sasah di ndi ong ong.

Pinyabah ngga Pinyibijak

² Bara dingan ku, nyirundeng adŭp ngan mbŭh binasip kan barang masam pisuba dog angān,

³ amai angān puan nang kan pinyabah ngan bās ndŭg ka ngarah pisuba, pimanang ngan pijadi atin tŭtŭd.

⁴ Dŭh kambŭt pikanyet adŭp ngan ngga pinyitŭtŭd atin di sopŭrŭg kayuh, isa angān bisa jadi sukup kana ngga sipuno-i, buang dŭh kurang ani ani.

⁵ Pak kambŭi agi so angān dŭh biyŭn pinyibijak, ayŭh patut bidua ka Tapa, adi an nggen-i di ayŭh; sabab Tapa inŭh adi an nggen ngga siabo asŭng-I di sopŭrŭg daya.

⁶ Pak kan angān simayang, angān dŭh siŭn dŭh sabah. Dŭh siŭn kurang sabah, sabab daya adi kurang sabah agi keya ka girumbang di rawŭt adi dog poh sabak kamati kamanŭ.

^7-8 Kambŭi angān mun anŭ, dŭh pandai ndai pikir ngan ka dŭh pandai natu adŭp ngan di sopŭrŭg kayuh adi angān ndai, dŭhnyah pikir adŭp ngan re dapŭd kayuh so Tuhan.

Sirata ngga Pinyikaya

⁹ Daya Kristen adi sirata dŭh siŭn dŭh an gaŭn kan Tapa katuh ngara,

¹⁰ ka daya Kristen adi kaya dŭh siŭn dŭh an gaŭn kan Tapa pirapat ngara. Amai daya kaya re manyap mun rarak bunga tarun.

¹¹ Batŭh andu nusak ka ngga sura-i adi bisā pirayu bunga anŭ; rarak-i rabu, ka ramus-i asab. Simŭnŭ gŭh daya kaya re dog pirusak darŭm ngara ndai kraja ngara.

Pisuba ngga Pinyisuba

¹² Sanang inŭh ngara adi tŭtŭd darŭm ngara dog suba, sabab kan ngara manang ngarah pisuba anŭ, ngara re kambat upah-i, anŭ inŭh udip adi sawŭ adi Tapa mbŭh bijanji an nggen di sinadan daya adi rindu di Ayŭh.

¹³ Kambŭi ata rabu da pisuba, ata dŭh siŭn nang, “Pinyisuba ati mandŭg so Tapa.” Amai Tapa dŭh-I bisa dog suba ngga arap, ka adŭp-I dŭh suba daya.

¹⁴ Pak ata dog suba kan ata dog tarik ka dog mirakap pinyiripong ta adi arap.

¹⁵ Komŭnŭ kan ata nurut pinyiripong ta adi arap anŭ, dosa timbur; ka dosa, kan-i mbŭh jadi bās, ayŭh taban pinyikabŭs.

¹⁶ Dŭhnyah budo, angān adi aku rindu!

¹⁷ Sopŭrŭg pinganggen adi sukup kana mandŭg so shorga; ayŭh mūn so Tapa adi Pinapa jawa shorga. Ayŭh Tapa adi dŭh birubah ka bŭn re kinarŭm darŭm-I marik adŭp-I.

¹⁸ So ka pinyiraan adŭp-I Ayŭh mbŭh napa ata ngga pinganang-I adi sawŭ, isa ata bisa jadi numbor ndi di dupan sopŭrŭg adi-I ko napa.

Dingah ngga Ndai

¹⁹ Ingat ati, angān adi aku rindu! Barang naan dŭh siŭn dŭh an rikas dingah, pak sais minyu ka sais baji.

²⁰ Baji manusia dŭh bisa ndai pinŭtŭn pinŭnggŭn Tapa.

²¹ Jadi taran meh pimudip adi sembar ka urah adi ginaka. Jugan adŭp ngan ka darŭm tangan Tapa ka kambat pinganang adi-I purun darŭm atin ngan, adi dapŭd nyiramat angān.

²² Dŭhnyah kadong adŭp ngan batur an dingah pinganang-I adŭ, pak ndai nanyam adi angān dingah.

²³ Kambŭi angān dingah pinganang Tapa, pak dŭh ndai-i angān agi keya ka daya adi nyiramin adŭp-i di siramin.

²⁴ Ngara tingga adŭp-i dieh ka komŭnŭ bu buang rasu kambŭt munki raŭn-i.

²⁵ Pak kambŭi angān nakit tingga ukum-adat adi sukup kana adi pirupas daya, ka nakit pirati-i ka dŭh dingah adŭ ka rasu kambŭt, pak ndai-i; mun anŭ angān re dog nyiberkat Tapa darŭm kraja pingandai ngan.

²⁶ Agi kah so angān adi nang adŭp-i puno darŭm adat? Kambŭi angān dŭh jaga jura ngan, adat ngan dŭh biguna ka angān mbŭh kadong adŭp ngan.

²⁷ Adat adi Tapa Sama nyirundeng bisig buang sawŭ batur inŭh simuti: kingat jaga ngara adi tumang ka dayung uban di pinyusah ngara, ka jaga adŭp ngan so dog kinais ong ati.