ISAIAH 6 - Hakcipta - Biatah Bidayuh

Tapa Bagan Isaiah bada Jadi Nabi

¹ Darŭm sawa adi ngga Raja Uzziah kabŭs, aku kiris TUHAN. Ayŭh guru di takta-I, bigatung ka bragah, ka jipo ambu-I ngisi ndi tarun tarun darŭm Ramin TUHAN.

² Maning Ayŭh agi bara serafim mijog, barang naan ngara biyŭn nŭm urad: duwŭh ngga-i nutu jawin-i, duwŭh ngga-i nutu pŭrŭng-i, ka duwŭh ngga-i mikabur.

³ Ngara bagan dingan-i sakati: “Kudus, kudus, kudus! TUHAN adi Bisa-pŭrŭg inŭh kudus! Bragah-I ngisi ong.”

⁴ Jawŭn sirŭŭn ngara bada pinagap-rasan Ramin TUHAN bigugoh buang adŭp Ramin TUHAN puno ngga asuh.

⁵ Aku nang, “Mating pingarap ku tia! Mŭmbŭh inŭh aku ati, sabab barang bang piminyu adi ruah so baba ku inŭh bidosa, ka aku udip bigaur ngga daya adi barang bang piminyu-i bidosa. Pak ngga batŭh adŭp ku, aku mbŭh kiris Raja, adi TUHAN Bisa-pŭrŭg!”

⁶ Komŭnŭ ndi so bara serafim anŭ mikabur ka yŭn ku taban bam apui adi-i tambit ngga satip so mija-sambah.

⁷ Ayŭh tama bibis ku ngga bam apui anŭ ka nang di aku, “Ati mbŭh dog bibis mu, ka madin sarah mu mbŭh mating, ka dosa mu mbŭh dog apun.”

⁸ Komŭnŭ aku dingah TUHAN nang, “Asi re Ku pait? Asi re jadi pinyisung ta?” Aku nam, “Aku! Pait aku!”

⁹ Jadi Ayŭh bada aku di nggen pinganang ati di daya bagŭ: “Munki masam angān bandar bandar nyiringa, angān dŭh re mirati. Munki masam angān bandar bandar tingga, angān dŭh re tungang puan ani adi mbŭh jadi”

¹⁰ Komŭnŭ ayŭh nang di aku, “Bada pikir bara daya ati madŭd, kajit ngara bangam, ka batŭh ngara karak, isa ngara dŭh dapŭd kiris, bait dingah, puan kah mirati. Kambŭi dŭh simŭnŭ, ngara re pari ka Aku, ka dapŭd bua.”

¹¹ Aku siken, “Ndŭg sinde kayuh ati re mun ati, TUHAN?” Ayŭh nam, “Ndŭg ka kupo kupo mbŭh rubuh ka mating ani ani dieh, ndŭg ka ramin ramin mbŭh mating daya rŭŭ dieh, ndŭg ka tarun tana anŭ mbŭh jadi tarun adi pajam.

¹² Aku re taran bara daya anŭ ka tarun yŭn adi jo ka bada ndi tarun tana anŭ pajam muog.

¹³ Kambŭi ndi naan bait kani so simŭng naan babŭ di tarun tana anŭ, ayŭh gŭh re dog pirabur; ayŭh re keya ka tŭŭd tŭngŭn oak adi muko dog tabŭng.” (Tŭŭd inŭh tandā pimudip bauh yŭn daya Tapa.)