ISAIAH 52 - Hakcipta - Biatah Bidayuh

Tapa re Nyiramat Jerusalem

¹ Jerusalem, pari bake ka bās dinge! Kupo adi kudus, kibarui adŭp mu ngga piraka mu adi sangŭn! Daya tami adi ko pirusag kupo kudus mu re dŭh tia mŭrŭt kuu dinge.

² Pirupas adŭp mu, Jerusalem! Makat so runas tana ka guru di takta mu! Matŭd parik basi adi ngabŭt kuu, kuu daya-takap di Zion!

³ TUHAN Raja nang di daya-I, “Di tika angān jadi urun, angān dŭh dog miris ngga duit; simŭnŭ gŭh di tika angān dog pirupas.

⁴ Di tika angān rŭŭ di Egypt jadi daya tami, angān rŭŭ diginŭ so ka pinyiraan adŭp ngan; pak Assyria nakap angān ngga dŭh biyŭn pada.

⁵ Ka madin di Babylonia simŭnŭ gŭh kayuh: angān dog nakap ngga dŭh biyŭn pada. Ngara adi mritah angān mingangŭn ka minyu sambuh ka marar ngamun Aku.

⁶ Di tika adi re mandŭg angān re ngaku nang Aku ati Tapa ka nang Aku mbŭh minyu di angān.”

⁷ Mbŭh raru kana inŭh nyam-i nŭŭh kiris pinyisung mandŭg mutas darŭd, taban agah kana, agah damai! Ayŭh kidaan pimanang ka nang di Zion, “Tapa mu inŭh raja!”

⁸ Ngara adi jaga kupo mbŭh nyirais, samah nyirais ngga gaŭn! ngara dapŭd kiris ngga batŭh adŭp ngara pinyipari TUHAN ka Zion!

⁹ Makat meh ka nyirais ngga gaŭn, angān rakang tibawang Jerusalem! TUHAN re nyiramat kupo-I ka nyaduh daya-I.

¹⁰ TUHAN re pakai kuasa kudus-I; Ayŭh re nyiramat daya-I, ka sopŭrŭg daya di ong re kiris-i.

¹¹ Panu meh! Bu so Babylonia, sopŭrŭg ngan adi taban pingakas Ramin TUHAN! Dŭhnyah tama kayuh adi dŭh siŭn dog tama; bada adŭp ngan bisig ka bu meh so nŭ.

¹² Kari ati angān dŭhsah bigaut bu; angān dŭhsah suba pirupas adŭp ngan. TUHAN adi Tapa ngan re nguru angān ka grindung angān so barang parad.

Urun adi Sangsara

¹³ TUHAN nang, “Urun Ku re mujur darŭm kraja-i; ayŭh re bandar dog stabi.

¹⁴ Bagŭ daya re gŭgŭh kan ngara kiris ayŭh, amai gayŭn-i mbŭh ruai rusak ndŭg ka dŭh mun manusia.

¹⁵ Pak madin bagŭ bangsa re nginga bada-i, ka raja raja re tŭŭp baba ngara amai mbŭh inga inga. Ngara re kiris ka mirati kayuh adi ngara bŭn puan.”