ISAIAH 49 - Hakcipta - Biatah Bidayuh

Israel, Jawa Bangsa Bangsa

¹ Dingah aku, bangsa bangsa adi jo, angān daya adi rŭŭ di rais adi jo! Diŭ so aku dog biranak, TUHAN mien aku ka tijuan aku bada jadi urun-I.

² Ayŭh bada pinganang ku reja mun pedang. Ngga tangan adŭp-I Ayŭh grindung aku. Ayŭh ndai aku bada mun reja-panah, reja ka mbŭh sidia yŭn dog pakai.

³ Ayŭh nang di aku, “Israel, kuu inŭh urun Ku; sabab kuu, daya re muji Aku.”

⁴ Aku nang, “Aku mbŭh nyiraja, pak dŭh biyŭn rati! Aku mbŭh kubo pakai pinyibake ku, pak mating ani ani jadi.” Pak aku sabah di TUHAN bada ngarun aku; Ayŭh re ngupah aku yŭn kayuh adi aku mbŭh ndai.

⁵ Diŭ so aku dog biranak, TUHAN mbŭh tijuan aku; Ayŭh bada aku jadi urun-I adi taban daya-I ngga pari, adi taban ngga pari daya Israel adi mbŭh papar sasah. TUHAN nggen di aku stabi; Ayŭh inŭh atak pinyibake ku.

⁶ TUHAN nang di aku, “Aku biyŭn kraja adi rabis bās yŭn mu, urun Ku. Dŭh-i kuu re bada pari bās adŭ daya Israel adi babŭ udip, pak Aku re bada kuu jadi jawa ani yŭn bangsa bangsa; isa sopŭrŭg daya di ong dapŭd dog nyiramat.”

⁷ Pinyikudip ngga Tapa kudus Israel nang di sianŭ adi bandar dog ngamun, adi tiru bangsa bangsa dieh ka adi urun bara pimritah: “Raja raja re kiris kuu dog pirupas ka re makat yŭn kiren stabi ngara; bara pinguasa gŭh re kiris-i, ka ngara mutu ubak ngara stabi di kuu.” Kayuh re jadi sabab TUHAN mbŭh mien urun-I; Tapa Israel, Tapa adi kudus sita janji-I.

Jerusalem Pari dog Pijog

⁸ TUHAN nang di daya-I, “Kan tika-i mbŭh mandŭg ngga nyiramat angān, Aku re ndai kana di angān ka nam sirŭŭn ngan mite turung. Aku nguan angān ka grindung angān ka so angān Aku re ndai simanya ngga sopŭrŭg daya. Aku re bada angān rŭŭ dinge di tarun tana ngan adi madin mbŭh jadi tibawang.

⁹ Aku re nang di bara daya-takap, ‘Ruah meh!’ ka di ngara adi darŭm karŭm, ‘Ruah ka yŭn jawa!’ Ngara re keya ka kaban biri adi man kupai di sandah;

¹⁰ ngara re dŭh sibŭrŭk bait badŭh asŭng. Paras batŭh andu ngga paras tarun tana-pajam dŭh re bada ngara kinaman, amai ngara re dog nguru sianŭ adi rindu ngara. Ayŭh re nguru ngara ka rubang rubang piin.

¹¹ “Aku re ndai aran raya mutas darŭd ka sidia aran yŭn daya Ku panu.

¹² Daya Ku re mandŭg so tarun adi jo, so utara ngga barat, ka so Aswan di siratan.”

¹³ Biragu meh, rangit! Nyirais amai gaŭn, ong! Isa darŭd darŭd biragu ngga gaŭn! TUHAN re nyaduh daya-I; Ayŭh re masi di daya-I adi sangsara.

¹⁴ Pak daya Jerusalem nang, “TUHAN mbŭh tagan ata! Ayŭh mbŭh kambŭt ata.”

¹⁵ Jadi TUHAN nam, “Bisa kah dayung kambŭt sipira adŭp-i ka dŭh rindu anak adi-i ruwan? Pak kambŭi sindŭ daya kapang kambŭt anak-i, Aku dŭh re kambŭt angān.

¹⁶ Jerusalem, Aku dŭh dapŭd kambŭt kuu! Aku mbŭh nuris dŭn mu di pura tangan Ku.

¹⁷ “Ngara adi re pari pijog kuu mbŭh re rikas mandŭg, ka ngara adi nyirubuh kuu re bu.

¹⁸ Tingga bait tauh mu kayuh adi mbŭh jadi! Daya mu piguru tikuruk; ngara mbŭh aŭn mari! Siragi Aku ati Tapa adi udip, kuu re sanang asŭng di daya mu, nimun pingaten dayung sanang di batuh batuh brega-i.

¹⁹ “Rais mu ko rusag ka mating daya dieh; pak madin rais mu re raru sŭ yŭn ngara adi re mandŭg ka rŭŭ dieh. Ka ngara adi ko nyirubuh kuu re bu jo so kuu.

²⁰ Daya mu adi dog biranak darŭm dog taran ka rais tami re agi nang di kuu, ‘Tarun tana ati paŭh sŭ; kieh raan tarun yŭn rŭŭ adi rabis bayah!’

²¹ Ka kuu re nang darŭm asŭng mu, ‘Asi biranak sopŭrŭg anak ati yŭn ku? Bara anak ku mbŭh mating ka aku dŭh re tia biyŭn anak. Aku ko dog taran ka dog pibu ka rais tami; asi nyiran anak anak ati ndŭg ka baga? Aku ko dog tingge sadi adŭp ku; so ki anak anak ati mandŭg?’ ”

²² TUHAN Raja nang di daya-I: “Aku re nggen tandā di bangsa bangsa, ka ngara re taban anak anak ngan ngga mari.

²³ Raja raja re keya ka sama di angān; rani rani re keya ka sindŭ. Ngara re mutu ubak ngara ka stabi di angān; ngara re pirapat adŭp ngara buang kiren stabi di angān. Ka angān re puan nang Aku ati TUHAN; mating daya adi kajŭn pinurung so Aku re asa.”

²⁴ Dapŭd angān sirabut kayuh sirapas so tangan soldadu? Dapŭd angān nyiramat daya-takap so daya adi ganas?

²⁵ TUHAN nam, “Anŭ inŭh kayuh adi re jadi. Daya-takap soldadu re dog taban ngga bu, ka kayuh sirapas daya ganas re dog tambit. Aku re rawan tadŭ tadŭ daya adi rawan angān, ka Aku re nyiramat anak anak ngan.

²⁶ Aku re bada bara adi kinanyuh angān bisiŭ dupan adŭp ngara; ngara re mabuk ngga deya adŭp ngara keya ka mabuk wain. Ngara re puan nang Aku ati Tapa Israel, Tapa adi bikuasa.”