ISAIAH 43 - Hakcipta - Biatah Bidayuh

Tapa Bijanji an Nyiramat Daya-I

¹ Israel, TUHAN adi napa kuu nang, “Dŭhnyah taru — Aku re nyiramat kuu. Aku mbŭh bagan kuu ngga dŭn mu; kuu inŭh jaku.

² Kan kuu mutas rawŭt adi tŭrŭp, Aku re agi ngga kuu; pinyusah mu re dŭh ngarah kuu. Kan kuu mutas apui, kuu re dŭh sau; pisuba adi bat adi dog kuu re dŭh kandam kuu.

³ Amai Aku TUHAN adi Tapa mu, Tapa kudus Israel, adi nyiramat kuu. Aku re nyerah Egypt ngga nubos kuu; Aku re nyerah Ethiopia ngga Seba.

⁴ Aku re nyerah ndi bangsa bangsa ngga nyiramat asŭng mu, sabab kuu brega yŭn Ku ka sabab Aku rindu kuu ka katuh kuu.

⁵ Dŭhnyah taru — Aku agi ngga kuu! “Jeh so timor ka jeh so barat, Aku re taban daya mu ngga pari.

⁶ Aku re kidaan di rais di utara bada pirupas ngara ka rais di siratan bada dŭh bitan ngara. Tandah daya Ku mari so rais rais adi jo, so barang parad di ong.

⁷ Ngara inŭh daya Ku, ka Aku adi napa ngara yŭn bragah ku.”

Israel inŭh Saksi TUHAN

⁸ Tapa ngan, “Bagan daya Ku ka yŭn bisara. Ngara biyŭn batŭh, pak ngara karak; ngara biyŭn kajit, pak ngara bangam!

⁹ Bagan bangsa bangsa yŭn dog suba. Tapa ngara aki ndi adi bisa ninjau kayuh adi re jadi jŭ? Aki ndi so ngara adi ko awar kidaan kayuh adi mbŭh jadi madin? Bada tapa tapa anŭ taban saksi ngara ngga kiren ngara batur, ngga kiren kayuh adi ngara nang agi sawŭ.

¹⁰ “Daya Israel, angān inŭh saksi Ku; Aku mien angān bada jadi urun Ku, isa angān puan Aku ka sabah di Aku ka mirati Aku sadi adŭ adi Tapa. Ripas so Aku mating tapa adi bŭkŭn; mbŭh mating ka taŭn re mating.

¹¹ “Aku sadi adŭ adi TUHAN, adi sadi adŭ adi dapŭd nyiramat angān.

¹² Aku ninjau kayuh adi re jadi, ka komŭnŭ Aku mandŭg di turung angān. Mating tapa saruh mbŭh ndai kayuh mun anŭ; angān inŭh saksi Ku.

¹³ Aku ati Tapa, madin ka ndŭg situi tui. Mating daya dapŭd rupas so kuasa Ku; mating daya dapŭd nukar kayuh adi Aku ndai.”

Israel dog Pirupas so Babylon

¹⁴ Tapa kudus Israel, adi TUHAN adi nyiramat angān, nang, “Ngga nyiramat angān, Aku re pait ndi bara tibaran soldadu rawan Babylon; Aku re mape tiban-bās kupo, ka sirais bara daya-i re marui jadi sien.

¹⁵ Aku ati TUHAN, adi Tapa kudus ngan. Aku napa angān, Israel, ka Aku raja ngan.”

¹⁶ Ndun jah TUHAN ndai aran mutas rawŭt, aran mutas piin bās.

¹⁷ Ayŭh pirabur bara tibaran soldadu adi bās, bara tibaran soldadu krita kuda ngga soldadu pinunggang kuda. Ngara kabŭs, dŭh re pari makat, ngara kabŭs mun apui di sumbu prita pura!

¹⁸ Pak TUHAN nang, “Dŭhnyah ingat kayuh adi mbŭh ripas puan kah bidigŭng di kayuh adi mbŭh jadi ndun jah.

¹⁹ Pirati kayuh bauh adi Aku re ndai. Kayuh anŭ mbŭh jadi — angān dapŭd kiris-i madin! Aku re ndai aran mutas tarun tana-pajam ka nggen di angān anak anak sungi diginŭ.

²⁰ Ndŭg ka dāng dāng tarun gŭh re stabi di Aku; kasong tarun ngga manuk onta re muji Aku kan Aku bada sungi sungi aman di tarun tana-sumat yŭn nggen piin di daya adi mbŭh Aku mien.

²¹ Ngara inŭh daya adi Aku mbŭh ndai yŭn adŭp Ku, ka ngara re nang ragu ngga muji Aku!”

Dosa Israel

²² TUHAN nang, “Pak angān mbŭh reju di Aku, Israel; angān dŭh nyambah Aku.

²³ Angān dŭh taban ka Aku biri ngan ndu sadis badang; angān dŭh stabi di Aku ngga sadis ngan. Aku dŭh pijera angān darŭm Aku mite sadis bait pirarah angān darŭm Aku mite kimanyan.

²⁴ Angān dŭh miris kimanyan yŭn Ku bait pimunos Aku ngga ramak dāng ngan. Tibarik-i angān nyusah Aku ngga dosa ngan; angān pirarah Aku ngga sarah adi angān ndai.

²⁵ Pak, Aku ati Tapa adi apun dosa ngan, ka Aku ndai simŭnŭ sabab anŭ tibiat adŭp Ku. Aku dŭh re ingat dosa ngan.

²⁶ “Ja ata di ka yŭn bisara; nyarah Aku diginŭ! Minyu ka kiren adŭp ngan batur!

²⁷ Tayung-babuk ngan adi diŭ bidosa, pinguru ngan bidosa rawan Aku,

²⁸ ka pimritah ngan nyembar yŭn pinyirŭŭ Ku. Jadi Aku bada pinyirusag nyatŭk Israel; Aku tandah daya Ku dog pimangŭh.”