ISAIAH 18 - Hakcipta - Biatah Bidayuh

Tapa re Ngukum Ethiopia

¹ Di pah mandi sungi sungi Ethiopia agi tarun tana adi yŭn jawŭn urad dog dingah.

² So tarun tana anŭ bara pingarun mūn pakai arud adi dog ndai so tŭngŭn tŭngŭn reed aman Yang Nile. Mari angān bara pinyisung adi daras! Taban agah pari ka tarun tana adi dog kutung dudu sungi, ka bangsa ngan adi bake ka bikuasa, ka daya adŭp ngan adi bigatung ka duduh kurit, adi dog taru sopŭrŭg daya di ndi ong ong.

³ Dingah, barang naan adi rŭŭ di ong! Kajŭn binira tandā adi re dog pijog di tibung darŭd! Kajŭn jawŭn trompet dog mambak!

⁴ TUHAN nang di aku, “Aku re pajam tingga ka sagān so shorga keya ka sipot-abun adi timbur di ngarŭm adi paras di tipuh ngatŭm, ka keya ka batŭh andu nyekar ngga yun kumbeng.

⁵ Diŭ so buwa anggor dog sun, kan sera-i mbŭh abo rabu ka buwa-i mbŭh masak, pinganyu re sanang pirabur daya Ethiopia mun sinda kapŭg daan so tŭngŭn-i.

⁶ Tadang bara soldadu ngara re dog tingge yŭn manuk manuk ngga dāng tarun. Di tipuh paras manuk re man tadang ngara, ka di tipuh madud dog man dāng tarun.”

⁷ Tipuh-i re mandŭg kan TUHAN Bisa-pŭrŭg re trima sadis so tarun tana anŭ adi dog kutung dudu sungi, so bangsa adi bake ka bikuasa, daya adi bigatung ka duduh kurit, adi dog taru sopŭrŭg daya di ndi ong ong. Ngara re mandŭg so Sandah Zion, di yŭn TUHAN Bisa-pŭrŭg dog nyambah.