HOSEA 7 - Hakcipta - Biatah Bidayuh

¹ “Tiap kari Aku raan pibua daya Ku Israel ka bada ngara pari mujur, kayuh adi Aku kiris batur-i udip ginaka ka pingandai arap ngara. Ngara nipu dingan ngara; ngara mŭrŭt ramin daya ka naku; ngara mirupak daya di aran raya.

² Bŭn ngara rada Aku re ingat sopŭrŭg pingandai arap anŭ; pak dosa ngara mbŭh marut ngara ndŭg ka Aku mbŭh kiris-i.”

Pekat Arap darŭm Istana

³ TUHAN nang, “Daya nipu raja ngga bara pinurung-i pakai pekat arap ngara.

⁴ Sopŭrŭg ngara anŭ ruai arap ka dŭh tŭtŭd. Atin tiru ngara mbŭh keya ka bireh bam apui darŭm oven-tana, adi dog tandah tukang ruti ndŭg ka tibaduk mbŭh kambang ka masak.

⁵ Di andu raja bigawai, ngara bada raja ngga bara pinurung-i mabuk ka budo bada wain.

⁶ Sawŭ, ngara mbŭh paras bireh bam apui mun oven-tana ngga pekat ngara. Ndi ngarŭm atin baji ngara mbŭh bireh, ka ngga isan isan baji anŭ rutop jadi apui.

⁷ “Darŭm paras baji ngara, ngara siŭ pimritah ngara. Raja raja mbŭh dog siŭ ndi ngga ndi, pak mating daya bidua ka Aku mite turung.”

Israel ngga dudu Bangsa Bŭkŭn

⁸ TUHAN nang, “Daya Israel inŭh keya ka ndi baru ruti adi sitangah masak. Ngara bisangan di bangsa bangsa adi maning ngara

⁹ ka dŭh rada bisangan di bangsa bŭkŭn batur-i bada pinyibake ngara manyap. Andu ngara dog mirang, pak ngara ngaŭn dŭh puan.

¹⁰ Uap-sambuh daya Israel mbŭh manŭn ka mbŭh jadi taksi yŭn sarah ngara. Bagŭ kayuh mbŭh jadi, pak ngara dŭh pari ka Aku, adi TUHAN Tapa ngara.

¹¹ Israel mbŭh keya ka manuk asang adi budo. Sibungas-i daya Israel mite turung so Egypt, ka komŭnŭ so Assyria!

¹² Pak Aku re tŭŭn jaring ka nakap ngara mun manuk. Aku re ngukum ngara amai arap adi ngara mbŭh ndai.

¹³ “Mbŭh payah inŭh ngara! Ngara mbŭh tingge Aku ka rawan Aku. Ngara re dog pirabur. Aku raan nyiramat ngara, pak ngara dŭh ngga sawŭ atin-i nyambah Aku.

¹⁴ Ngara bidua ka Aku dŭh ngga atin batur. Ngara sipŭŭb di tana ka sien mun daya adi dŭh puan Tapa. Kan ngara bidua mite gandom ngga wain, ngara nidi adŭp ngara mun daya adat karŭm. Ngara rawan Aku!

¹⁵ Sunggu Aku adi nyiran ngara bada ngara baga ka bake, ngara bipekat rawan Aku.

¹⁶ Ngara ngandŭ nyipunok Aku an tunda tapa adi dŭh bikuasa. Ngara dŭh bisa dog sabah mun bawŭh panah adi bidikok. Sabab bara pinguru ngara minyu sambuh, ngara re kabŭs dog siŭ, ka daya Egypt re tawŭh ngara.”