EKLISIASTIS 2 - Hakcipta - Biatah Bidayuh

¹ Aku mbŭh ndai pikir ku an pimunos adŭp ku yŭn ku an puan ani anŭ pinyanang. Pak mbŭh mating rati-i aku ndai simŭnŭ.

² Aku puan tawŭh inŭh kayuh adi budo, ka udip rami inŭh kayuh adi dŭh kana di nŭŭh.

³ Ruai raan biyŭn pinyibijak, aku pimunos atin ku ngga wain ka nyipawŭn adŭp ku. Aku pikir kadŭ-i simuti inŭh gaya adi kana adi ngga daya pakai tipuh udip-i adi purok di ong.

⁴ Aku mujur di bagŭ kraja pingandai adi kana. Aku pijog ramin ku ka ndai teya anggor.

⁵ Aku ndai teya ka risŭn, ngga bagŭ masam tŭngŭn pimuruh dieh;

⁶ Aku ndai aran piin ngga misa-i.

⁷ Aku miris urun, ka agi gŭh urun adi dog biranak darŭm arŭn ku. Aku biyŭn rabis bagŭ dāng kudip so tung daya bŭkŭn adi rŭŭ di Jerusalem.

⁸ Aku nguruk pirak ngga mas so pinyirikŭn rais adi darŭm kuasa ku. Dari ngga dayung agi tukang biragu yŭn ku, ka sopŭrŭg dari bait dayung adi aku biguna, sadi agi.

⁹ Sawŭ, aku daya bās, bās so tadŭ daya bŭkŭn adi mbŭh rŭŭ di Jerusalem, ka pinyibijak ku bŭn dŭh turung aku.

¹⁰ Tadŭ kayuh adi aku raan, aku tungang dapŭd. Aku bŭn bitan adŭp ku so pinyirami. Aku mingangŭn di sopŭrŭg kayuh adi aku mbŭh dapŭd, ka sopŭrŭg anŭ inŭh upah ku.

¹¹ Komŭnŭ aku bipikir pasar sopŭrŭg-i adi aku mbŭh ndai, ka munki masam bandar bandar aku nyiraja ngga pijadi-i, aku rada-i dŭh biyŭn rati. Kraja ku anŭ mbŭh au-tarun, keya ka tadak sabak.

¹² Amai sawŭ, raja kaŭs-i bisa ndai kayuh adi raja adi diŭ mbŭh ndai. Jadi aku piguru bipikir ani anŭ nŭŭh bijak, puan kah nŭŭh udip gira-gira, puan kah budo.

¹³ Aku puan, “Pinyibijak inŭh kana dŭ so pinyibudo, nimun jawa inŭh kana dŭ so karŭm.

¹⁴ Daya bijak dapŭd kiris kamaki nuju pimanu ngara, pak daya budo dŭh.” Pak aku puan bait-i ata bijak puan kah budo, pinŭbŭn ta agi samah.

¹⁵ Aku nang darŭm asŭng ku, “Pinŭbŭn ku agi samah ngga tung daya budo. Jadi ani meh utung dapŭd ku kambŭi aku bijak?” “Mating,” aku nam, “mating guna-i pinyibijak.”

¹⁶ Mating daya ingat daya bijak, ka mating daya ingat daya budo. Di tipuh adi re, sopŭrŭg ata re dog kambŭt. Ata dŭh siŭn dŭh kabŭs, adi bijak ngga adi budo.

¹⁷ Jadi di aku pimudip inŭh au-tarun, sabab sopŭrŭg kayuh adi aku kinyam kaŭs-i pinyusah. Sopŭrŭg-i dŭh biyŭn rati, keya ka tadak sabak.

¹⁸ Sopŭrŭg kayuh adi aku mbŭh dapŭd so turang udas adŭp ku ngga anŭ adi aku mbŭh trima inŭh au-tarun di aku, sabab aku puan aku re tingge-i di daya adi gati aku,

¹⁹ ka kadŭ ayŭh re daya adi bijak, puan kah adi budo! Pak ayŭh re dapu sopŭrŭg kayuh adi aku mbŭh dapŭd, sopŭrŭg adi aku mbŭh dapŭd di ong so pinyibijak ku. Sopŭrŭg-i dŭh biyŭn rati.

²⁰ Jadi aku nyesar aku mbŭh bandar nyiraja.

²¹ Nŭŭh an dapŭd kayuh ka nyiraja pakai sopŭrŭg pinyibijak, pinyipuan, ka pimandai, ka komŭnŭ nŭŭh tingge sopŭrŭg-i di daya bŭkŭn adi dapŭd-i dŭh so ka turang udas adŭp-i. Mating rati-i, ka-i dŭh batur!

²² Nŭŭh bandar bandar nyiraja buang gapang sitŭkŭd umbur nŭh, ka ani utung-i?

²³ Sitŭkŭd umbur nŭŭh udip, sopŭrŭg kayuh adi ndai nŭh kaŭs-i taban atin gapang ngga atin susah adŭ. Ndŭg singarŭm, pikir nŭh dŭh pandai rŭŭ. Sopŭrŭg-i dŭh biyŭn rati.

²⁴ Pingandai manusia adi siabo kana inŭh man ka nok ka pimunos adŭp nŭh ngga kayuh adi mbŭh nŭŭh dapŭd. Pak, aku rada ndŭg ka kayuh ati gŭh mandŭg so Tapa.

²⁵ Munki boh dinge nŭŭh dapŭd man ka udip kambŭi Tapa mating?

²⁶ Tapa nggen pinyibijak, pinyipuan, ka pinyanang di ngara adi pimunos asŭng-I, pak Ayŭh bada daya bidosa nyiraja, trima gaji ngara ka nyikŭn duit, isa kayuh adi ngara dapŭd bisa dog nggen di ngara adi pimunos asŭng-I. Sopŭrŭg-i dŭh biyŭn rati, keya ka tadak sabak.