DANIEL 1 - Hakcipta - Biatah Bidayuh

Dundan Daniel ngga bara Dingan-I 1.1—6.28 Bara Bujang Dari Di Istana Nebuchadnezzar

¹ Di sawa adi taruh di jaman Jehoiakim jadi raja di Judah, Raja Nebuchadnezzar so Babylonia nyerang Jerusalem ka kirurung-i.

² TUHAN tandah ayŭh nakap Raja Jehoiakim ka sirapas kada rata Ramin TUHAN. Ayŭh taban kada daya-takap pari ngga adŭp-i ka bari-sambah tapa adŭp-i di Babylon, ka na rata adi ko dog sirapas di birit pinyirikŭn bari-sambah.

³ Raja mritah Ashpenaz, pingubak pinurung-i, bada mien so dupan bara daya Israel adi dog taran kada dari adi mara so rawang raja ngga adi so asar rawang daya adi bās.

⁴ Ngara an daya adi piayong, pitar, biyŭn bigatung sikura, rikas mirati kayuh, ka adi pidanah pŭrŭng ganan-i, isa ngara dapŭd nyiraja di istana. Ashpenaz an ngajar ngara basa ka nuris piminyu Babylonia.

⁵ Raja bada gŭh ngara dog nggen pinguman ngga wain adi brimun ngga anŭ adi dog nggen di ngara adi manak raja. Ripas taruh sawa dog pirates simŭnŭ ngara siŭn tatŭng di sirung jawin raja.

⁶ Di dupan ngara adi dog mien inŭh Daniel, Hananiah, Mishael, ka Azariah, sopŭrŭg adi so tibaran-asar Judah.

⁷ Pingubak pinguru anŭ nggen di ngara dŭn adi bauh: Belteshazzar, Shadrach, Meshach, ka Abednego.

⁸ Daniel ndai pikir-i dŭh re kinais adŭp-i ngga pinguman ka wain adi dog nitah yŭn raja, jadi ayŭh mite Ashpenaz turung adŭp-i,

⁹ ka Tapa bada Ashpenaz biyŭn atin masi di Daniel.

¹⁰ Pak Ashpenaz taru di raja, jadi ayŭh nang di Daniel, “Raja mbŭh natu ani adi re mu man ngga ani adi re mu nok, ka kambŭi kuu dŭh tatŭng tagap bake mun ngara adi bŭkŭn, ayŭh re siŭ kuu.”

¹¹ Jadi Daniel di ka daya adi tukang jaga adi Ashpenaz mbŭh bada jaga ayŭh ngga taruh naan jerā-i.

¹² “Kuu bisa suba kieh sitian simŭng andu,” ayŭh nang. “Nggen di kieh dawŭn kudos ngga piin, ndu ami pinguman ngga piin nok.

¹³ Komŭnŭ danding kieh ngga ngara adi mara adi bŭkŭn adi man pinguman raja, ka ndai pikir mu nanyam ka munki kieh kiris mu.”

¹⁴ Ayŭh situju ka nyibandar ngara suba ndai simŭnŭ sitŭkŭd simŭng andu.

¹⁵ Kan tipuh-i mbŭh ripuan, ngara tatŭng tiranah dŭ ka tagap bake dŭ so sopŭrŭg ngara adi man pinguman raja.

¹⁶ Jadi so nganŭ meh daya adi tukang jaga anŭ tandah ngara adu adu man dawŭn kudos, ka dŭh man pinguman ngga wain adi dog nggen raja.

¹⁷ Tapa nggen di pat naan dari adi mara anŭ pinyipuan, atin mirati yŭn surat adi ngara basa, ka aran birajar bagŭ masam kayuh, ka Daniel biyŭn pimandai kidaan rati kayuh adi dog kiris keya ka adi darŭm pŭmŭh samŭn barang masam pŭmŭh.

¹⁸ Di tŭbŭn taruh sawa adi muko dog miratak raja, Ashpenaz taban sopŭrŭg dari adi mara anŭ ka yŭn Nebuchadnezzar.

¹⁹ Raja minyu ngga sopŭrŭg ngara, ka Daniel, Hananiah, Mishael, ngga Azariah adi rabis pimunos asŭng raja so ngara adi bŭkŭn. Jadi ngara dog bada nyiraja di istana raja.

²⁰ Dŭh mien ani ani kayuh adi raja siken puan kah ani ani har adi-i kidaan, pinyinam ngara adi pat naan anŭ simŭng kari rabis kana so tung bara adi pandai kidaan nasip ngga so tung bara pinanung di ndi tarun tana pritah-i.

²¹ Daniel babŭ nyiraja di istana raja ndŭg andu adi ngga Cyrus adi raja-empaya Persia ngarah Babylonia.