2 THESSALONICA 3 - Hakcipta - Biatah Bidayuh

Simayang yŭn Kieh

¹ Sikasŭn-i, bara dingan, simayang yŭn kieh siŭn agah so Tuhan babŭ raju kambang ka dog kambat ngga stabi di barang yŭn, nimun-i mbŭh di dupan ngan.

² Simayang gŭh mite Tapa nyiramat kieh so daya adi ginaka ka adi arap; amai dŭh sopŭrŭg daya sabah di agah anŭ.

³ Pak Tuhan taŭn-I tŭtŭd; Ayŭh re nyibake angān ka bada angān pagŭng so Daya Ginaka anŭ.

⁴ Ka Tuhan inŭh adi bada kieh biyŭn atin-sabah di angān; ka kieh puan angān ndai ka re babŭ ndai kayuh adi kieh bada angān ndai.

⁵ Isa-i Tuhan kuka atin ngan da rabis mirati pinyirindu Tapa samŭn pinyitŭtŭd atin adi Kristus ko nggen.

Nŭŭh Patut Nyiraja

⁶ Bara dingan, kieh pesan angān ngga adŭn Tuhan ta Jesus Kristus, da pijo adŭp ngan so dingan adi tibanga ngga adi dŭh an tunda pinyitayan adi kieh ko nggen di ngara.

⁷ Adŭp ngan mbŭh puan angān patut tunda suto danding ami. Kieh dŭh tibanga di andu kieh bigaur ngga angān.

⁸ Kieh bŭn trima pinguman so daya kambŭi dŭh ngga bibayar. Pak adŭp ami mbŭh bandar nyiraja, sandu singarŭm ramŭn ami dŭh an nyusah angān.

⁹ Kieh ndai simŭnŭ, dŭh sabab kieh dŭh biyŭn hak re mite turung so angān; kieh ndai simŭnŭ siŭn jadi suto danding yŭn ngan.

¹⁰ Sitadŭn kieh bigaur ngga angān, kieh agi kidaan di angān, “Asi asi adi abah nyiraja dŭh siŭn man.”

¹¹ Kieh nang sakanŭ sabab kieh mbŭh dingah agi kada daya di dupan ngan adi tibanga, dŭh an ndai kayuh adŭ-i an mito kraja pingandai daya bŭkŭn.

¹² Ngga adŭn Tuhan Jesus Kristus kieh bakan ngara buang bada ngara panu aran pimudip adi tirase buang nyiraja ngga nyiran adŭp-i.

¹³ Pak angān, bara dingan, dŭh siŭn kawŭk ndai kana.

¹⁴ Agi kani daya diginŭ adi dŭh an tunda kayuh adi kieh nang di surat ati. Kambŭi agi, angān bisa ngatin ngara ka dŭhnyah bigaur ngga ngara, isa ngara mangŭh.

¹⁵ Pak dŭhnyah ndai ngara da mun pinganyu ngan; bakan buang ngajar ngara mun ngga dingan ngan adi sabah.

Sikasŭn Pinganang

¹⁶ Isa-i adŭp Tuhan, adi atak damai yŭn ta, nggen di angān damai di tadŭ nga-i ka darŭm tadŭ mun gaya-i. Tuhan agi ngga sopŭrŭg ngan.

¹⁷ Ngga tangan adŭp ku aku nuris ati: Tabi so Paul. Simŭnŭ inŭh tandā-tangan ku di tiap surat ka simuti inŭh aku nuris-i.

¹⁸ Isa-i pinyirasi-mandis Tuhan ta Jesus Kristus agi ngga sopŭrŭg ngan.