2 THESSALONICA 2 - Hakcipta - Biatah Bidayuh

Manusia adi Arap

¹ Pasar pimandŭg Tuhan ta Jesus Kristus, ka adŭp ta adi dog nguruk siŭn agi samah ngga Ayŭh: Aku mite angān, adi bara dingan ku,

² dŭhnyah udah riruk, puan kah susah da pinganang daya adi nang Andu Tuhan mbŭh mandŭg. Kadŭ daya agi pikir kieh nang sakanŭ darŭm kieh minyu-binabi pasar kayuh adi re jadi, puan kah darŭm kieh ngajar, puan kah kieh agi nuris-i di surat adi kieh pait.

³ Dŭhnyah bada daya nyibudo angān. Andu anŭ dŭh re mandŭg ndŭg ka andu adi ngga daya bagŭ makat rawan Tapa, ka Manusia adi Arap anŭ adi taŭn re dog taran ka neraka, pinandŭng adŭp-i.

⁴ Ayŭh re rawan sopŭrŭg anŭ adi daya kadŭn tapa. Ayŭh re bada adŭp-i bikuasa dŭ so sopŭrŭg anŭ adi manusia nyambah. Rabis so anŭ, Ayŭh re mŭrŭt ka guru darŭm Ramin Tapa, ka kadŭn adŭp-i Tapa.

⁵ Ingat ngan kah dŭh? Aku ko kidaan sopŭrŭg kayuh anŭ di angān sitadŭn aku agi ngga angān prajah.

⁶ Pak agi kayuh adi bada-i dŭh tambus madin; angān puan ani anŭ. Di tipuh adŭp-i, meh, Manusia adi Arap anŭ re nandŭng.

⁷ Kuasa adi ndai kraja ginaka mbŭh piguru mirasang darŭm bisukan. Pak kayuh adi re jadi dŭh bisa jadi, siragi sianŭ adi matŭn-i bayuh dog kadi.

⁸ Komŭnŭ Manusia adi Arap anŭ re dog pinandŭng, pak kan Tuhan Jesus mandŭg, Ayŭh re siŭ ayŭh ngga asŭng adi ruah so baba-I ka pirabur ayŭh ngga pimandŭg-I adi bragah.

⁹ Manusia adi Arap anŭ re mandŭg ngga kuasa Shetan ka ndai barang masam pingandai-nginga ka pingandai-saruh adi dŭh sawŭ,

¹⁰ buang pakai barang masam tipu di tunduh ngara adi re rarap. Ngara re rarap sabab ngara dŭh kambat bait rindu di agah adi sawŭ so Tapa adi so ngara bisa dog nyiramat.

¹¹ Anŭ inŭh sabab Tapa pait ka ngara kuasa adi kinanyap isa ngara sabah di kayuh adi dŭh sawŭ.

¹² Pinŭbŭn-i, sopŭrŭg adi dŭh sabah di agah adi sawŭ anŭ, ka adi pimunos adŭp-i ngga dosa, re dog nunggu.

Angān Mbŭh dog Mien yŭn Pinyiramat

¹³ Kieh dŭh siŭn dŭh an siraru nggen trima kaseh di Tapa yŭn ngan bara dingan adi Tuhan rindu, amai Tapa mbŭh mien angān da jadi daya adi-I diŭ nyiramat. Ngga kuasa Roh Kudus ka ngga pinyabah ngan di agah-I adi sawŭ anŭ, Tapa mbŭh bada angān jadi daya-I adi kudus.

¹⁴ Tapa bagan angān pakai Agah Kana adi kieh nyuse di angān; Ayŭh bagan angān da dapŭd utung ngan darŭm bragah Tuhan ta Jesus Kristus.

¹⁵ Jadi meh, bara dingan, angān an tŭtŭd ka bidigŭng tagap di ajar ajar anŭ adi kieh ko nggen di angān, pakai piminyu puan kah pakai surat.

¹⁶ Isa-i adŭp Tuhan ta Jesus Kristus ka Tapa adi Sama ta, adi rindu ata ka adi ngga pinyirasi mandis-I mbŭh nggen di ata pinyibirani ngga pingarap adi tan,

¹⁷ ngatat angān ka nyibake angān da siraru ndai buang nang kayuh adi kana.