2 SAMUEL 13 - Hakcipta - Biatah Bidayuh

Amnon ngga Tamar

¹ Anak David adi dŭn Absalom biyŭn sude dayung adi ramus, buang gibayuh banan. Amnon, ndi so bara anak David adi bŭkŭn, awang ayŭh.

² Amnon ruai awang Tamar ndŭg ka birandam, amai rah gaya-i mating aran-i tungang dapu ayŭh. Ayŭh dayung tibŭn, ka dŭh dog bada bidapŭd ngga dari.

³ Pak ayŭh biyŭn ndi naan jerā dŭn Jonadab, adi pitar darŭm atin arap-i, anak Shammah jurud David.

⁴ Jonadab nang di Amnon, “Kuu inŭh anak raja, pak mani barang andu aku kiris kuu susah. Ani har?” “Aku awang Tamar, sude Absalom adi madis ku,” ayŭh nam.

⁵ Jonadab nang di ayŭh, “Kuu ngakar sungoh ka di guring. Kan sama mu mandŭg tudu kuu, nang di ayŭh, ‘Turung bada sude ku Tamar mandŭg di sabu aku. Aku raan ayŭh ndai pinguman digiti di yŭn aku tungang kiris ayŭh, ka komŭnŭ adŭp-i ngidang aku.’ ”

⁶ Jadi Amnon ngakar sungoh ka di guring. Raja David tudu ayŭh, ka Amnon nang di ayŭh, “Turung bada Tamar mandŭg ka ndai kue digiti di yŭn aku tungang kiris ayŭh, ka komŭnŭ adŭp-i ngidang aku.”

⁷ Jadi David pait pinganang ka Tamar di istana: “Di ka ramin Amnon ka ndai pinguman yŭn-i.”

⁸ Tamar di kamanŭ ka kiris Amnon guring di pangō. Ayŭh tambit kada tibaduk, kunyu-i, ka ndai kue diginŭ di yŭn Amnon tungang kiris ayŭh. Ayŭh ndai kue

⁹ ka kadi-i so kuari ka ngidang Amnon, pak ayŭh abah man. Amnon nang, “Bada sopŭrŭg daya bu” Ngara duwŭh mbŭh sadi diginŭ.

¹⁰ Komŭnŭ Amnon nang di ayŭh, “Taban kue anŭ kamati di pangō ku ka adŭp mu sabu aku.” Ayŭh tambit kue anŭ ka di ka yŭn-i.

¹¹ Darŭm Tamar sabu ayŭh, ayŭh tama Tamar ka nang, “Ja guring ngga aku!”

¹² “Abah aku,” Tamar nang. “Dŭhnyah takan aku ndai kayuh adi pimangŭh adŭp nŭh! Arap pingandai adi mun anŭ!

¹³ Simuki aku re kiren raŭn ku di sirung jawin daya bagŭ te? Mun kuu, kuu re dog ngamun di dupan daya Israel. Turung kidaan di raja, ayŭh tatu bisa nggen aku di kuu.”

¹⁴ Pak Amnon dŭh an tunda pinganang-i; ka amai ayŭh bake so Tamar, ayŭh muak ayŭh ka miragag ayŭh.

¹⁵ Komŭnŭ Amnon biyŭn atin ruai tiru di Tamar; ayŭh tiru di Tamar madin rabis dŭ so pinyiawang-i di ayŭh dawŭ-i. Amnon nang di ayŭh, “Bu so ti!”

¹⁶ “Dŭh,” ayŭh nam. “Bada aku bu mun anŭ inŭh kayuh adi rabis sarah so kayuh adi kuu bauh ko ndai!” Pak Amnon dŭh piduri kayuh adi nang-i;

¹⁷ ayŭh bagan daya gaji-i buang nang, “Taban dayung ati bu so ti! Taran ayŭh ka sapa ka ngusi tiban!”

¹⁸ Daya-gaji na ayŭh ka sapa ka ngusi tiban. Tamar nēn jipo-ambu adi ambu tangan-i, siraru-i piraka adi anak raja adi bayuh banan pakai di jaman anŭ.

¹⁹ Ayŭh ngabu apŭk di ubak-i, nyiratak jipo ambu-i anŭ, ka ngga tangan-i nutu jawin-i ayŭh bu buang sien.

²⁰ Kan jurud dari-i Absalom kiris ayŭh, Absalom siken, “Agi kah Amnon ngaso kuu? Ko sien, sude, dŭhnyah bada kayuh adi mun anŭ bana nyusah kuu. Ayŭh anŭ kaka mu, ka dŭhnyah kidaan di tadŭ tadŭ daya pasar kayuh anŭ.” Jadi Tamar rŭŭ di ramin Absalom, susah buang nyadi adŭp-i.

²¹ Kan Raja David dingah kayuh adi mbŭh jadi, ayŭh mbŭh ruai bangok.

²² Absalom mbŭh raru tiru di Amnon amai-i ko miragag sude-i Tamar ndŭg ka dŭh an minyu ngga ayŭh.

Absalom Maras Dendam

²³ Duwŭh sawa ripas anŭ Absalom gumbak buruh biri-i di Baal Hazor, dŭh jo so kupo Ephraim, ka ayŭh bagan sopŭrŭg anak dari raja bada di kamanŭ.

²⁴ Ayŭh di ka yŭn Raja David ka nang, “Tuan Raja, aku ndai gawai gumbak buruh biri ku. Bisa kah kaam ngga bara pinurung mai mandŭg ka gawai anŭ?”

²⁵ “Dŭh tungang nak,” raja nam. “Dŭh gŭh-i kana di kuu kambŭi sopŭrŭg ami di.” Absalom darah mite, pak raja babŭ gŭh nang adŭp-i dŭh tungang di; gŭgŭh-i bada Absalom maad adŭ.

²⁶ Pak Absalom nang, “Kambŭi sakanŭ, piji ka kaam bada jurud ku Amnon di?” “Ani sah ayŭh di?” raja siken.

²⁷ Pak Absalom darah mite ndŭg ka David bada adŭ Amnon ngga sopŭrŭg jurud-i adi bŭkŭn di ngga Absalom. Absalom ndai gawai bās adi situgu yŭn raja

²⁸ ka muko nakit kidaan di daya gaji-i: “Nakit ngatin sinde Amnon nok bagŭ, ka komŭnŭ kan aku nggen pinganang ku, angān siŭ ayŭh. Dŭhnyah taru. Adŭp ku re dapu tanggong. Dŭhnyah taru, ndai adŭ!”

²⁹ Jadi bara daya-gaji tunda pinganang Absalom ka siŭ Amnon. Sopŭrŭg anak David adi bŭkŭn maad kuda ngara adi pinakan kaldi ka babak bu.

³⁰ Atan ngara babŭ di aran mbŭh re ndŭg arŭn, David agi dog kidaan: “Absalom mbŭh siŭ sopŭrŭg anak mai; ndi naan mating gŭh dŭm!”

³¹ Raja rasu mijog, nyiratak piraka-i darŭm susah, ka taran adŭp-i ka tana. Bara daya-gaji adi agi diginŭ nyiratak gŭh piraka ngara.

³² Pak Jonadab, anak jurud David, Shammah, nang, “Tuan Raja, ngara dŭh siŭ sopŭrŭg anak mai. Kaŭs-i Amnon adŭ adi kabŭs. Kaam bisa puan so Absalom adi muko nang adŭp-i muko ndai pikir-i re ndai simŭnŭ so andu Amnon miragag sude-i Tamar.

³³ Jadi dŭhnyah sabah agah adi nang sopŭrŭg anak mai mbŭh dog siŭ; kaŭs-i Amnon adŭ adi dog siŭ.”

³⁴ Sitadŭn anŭ, Absalom mbŭh bu di bisukan. Nganŭ gŭh soldadu adi aŭn bijaga kiris bara daya bagŭ mandŭg mūn sandah di aran so Horonaim. Ayŭh di ka yŭn raja ka kidaan kayuh adi-i kiris.

³⁵ Jonadab nang di David, “Anŭ bara anak mai mandŭg, sak adi nang ku tejah.”

³⁶ Dŭh tui ripas ayŭh ko nang sakanŭ, bara anak David mŭrŭt; ngara rasu sien, ka David ngga bara pinurung-i samah nyisakuk sien.

^37-38 Absalom bu ka di ka yŭn raja Talmai anak Ammihud di Geshur, ka rŭŭ diginŭ tian taruh sawa. David tui muās anak-i Amnon;

³⁹ pak kan ayŭh muko ngurid Amnon, ayŭh jabŭng di anak-i Absalom.