2 KRONIKEL 8 - Hakcipta - Biatah Bidayuh

Kraja Pingandai Solomon adi Bŭkŭn

¹ Duwŭh puru sawa Solomon pijog Ramin TUHAN ngga istana-i.

² Ayŭh gŭh pari pijog kupo kupo adi Raja Hiram mbŭh nggen di ayŭh, ka bada daya Israel rŭŭ diginŭ.

³ Ayŭh sirabut tarun tana Hamath ngga Zobah

⁴ ka pijog sindung kuta kupo Palmyra di tarun tana-pajam. Ayŭh pari pijog sopŭrŭg kupo-pinyirikŭn di Hamath ngga nyikŭn biranja man.

⁵ Solomon pari pijog gŭh kupo kupo ati: Beth Horon sijo ngga Beth Horon saba (kupo kupo adi bikuta ngga tiban tiban adi bisa dog nyikutang ngga parang),

⁶ kupo Baalath, sopŭrŭg kupo di yŭn-i nyikŭn biranja man, ka kupo kupo di yŭn dudu kuda ngga dudu krita kuda dog nyikŭn. Simŭnŭ gŭh ayŭh pijog ani ani adi-i raan di Jerusalem, di Lebanon, ka di ndi tarun tana adi-i mritah.

^7-8 Solomon bada bara sesang daya Canaan, adi daya Israel dŭh siŭ di tipuh ngara tambit tarun tana ngara, ndai kraja takan. Samŭn daya Hitti, Amor, Periz, Hivi, ngga daya Jebus; sesang ngara babŭ jadi urun ndŭg andu ati.

⁹ Daya Israel dŭh dog bada ndai kraja takan, pak jadi soldadu, jadi pingubak, jadi pingubak krita kuda, ka jadi soldadu pinunggang kuda.

¹⁰ Agi 250 naan pingubak adi nguasa bara mandor kraja takan di barang masam kraja piramin.

¹¹ Solomon mindah sawŭn-i, adi anak raja Egypt, so kupo David di ka ramin adi-i pijog yŭn-i. Ayŭh nang, “Ayŭh dŭh siŭn dŭh rŭŭ di istana Raja David adi raja Israel, sabab tarun adi ko yŭn Pati Simanya inŭh kudus.”

¹² Solomon jugan sadis ka TUHAN di tunduh mija-sambah adi-i muko pijog di jawin Ramin TUHAN.

¹³ Ayŭh jugan sadis badang nanyam adi mbŭh dog miratak darŭm Ukum-adat Moses yŭn barang gawai adi tatap: andu Sabbath, Gawai Anak Buran, ka taruh gawai sawa — Gawai Ruti dŭh-biragi, Gawai Pingatŭm, ka Gawai Bari-Dawŭn.

¹⁴ Nunda ka atur adi sama-i David muko miratak, ayŭh ngatur kraja barang andu bara imam ngga daya daya Levi adi turung imam biragu ka turung gŭh ngara ndai kraja. Ayŭh ngatur gŭh bara adi tukang jaga Ramin TUHAN ngga tibaran tibaran yŭn ndai kraja ngara di barang tiban, nanyam ka adi mbŭh dog pesan David, adi urun Tapa.

¹⁵ Pinyitayan adi David mbŭh nggen di bara imam ngga daya daya Levi jeja ka ramin pinyirikŭn ka har har adi bŭkŭn mbŭh abo dog tunda nanyam adi mbŭh dog ngatur.

¹⁶ Madin sopŭrŭg kraja piramin Solomon mbŭh abo dog ndai. So kraja na pinagap-rasan Ramin TUHAN ndŭg ka-i mbŭh batur mijog, sopŭrŭg kraja agi tirase buang kana.

¹⁷ Komŭnŭ Solomon di ka Eziongeber ngga Elath, pinyigŭn pinyigŭn di tabing Tanjung Aqaba, di tarun tana Edom.

¹⁸ Raja Hiram pait kapar kapar ka ayŭh di ribo kuasa bara pingubak adi di ribo adŭp-i ka dog taban bara adi mbŭh sukup pandai pimanu kapar. Ngara birayar ngga bara pingubak soldadu Solomon di ka tarun tana Ophir ka taban pari ka Solomon rabis so 15,000 kilogram mas.