2 JOHN 1 - Hakcipta - Biatah Bidayuh

¹ So aku adi nyamba eklisia nuju ndi naan dayung ngga bara anak-i, adi aku sawŭ rindu. Dŭh-i aku sadi adŭ pak sopŭrŭg daya adi puan Tapa rindu kuu,

² sabab Tapa agi darŭm atin ta ka re adu adu agi ngga ata.

³ Isa-i Tapa adi Sama ngga Jesus Kristus, adi Anak Sama, nggen di ata pinyirasi mandis-I, masi, ka damai; isa-i ata dapu sopŭrŭg-i ngga pinyawŭ ka pinyirindu.

Pinyawŭ ngga Pinyirindu

⁴ Raru sanang asŭng ku dingah agi so bara anak mu udip darŭm nundok di ajar Tapa, nimun adi Sama ko pesan di ata.

⁵ Jadi aku ngaja kuu: Ja ata sopŭrŭg rindu dingan ta. Ati adi aku nuris nuju kuu dŭh-i pinyipesan adi bauh, pak pinyipesan adi taŭn mbŭh tui ata biyŭn so sibungas-i.

⁶ Pinyirindu adi aku nang, rati-i ata dŭh siŭn dŭh an udip nanyam ka pinyipesan Tapa. Pinyipesan ati, nimun adi sopŭrŭg ngan ko dingah so sibungas-i, sirati-i sopŭrŭg ngan dŭh siŭn dŭh an udip darŭm pinyirindu.

⁷ Bagŭ pingadong mbŭh bijaruh di ong, ngara adi abah sabah Jesus Kristus ko mandŭg darŭm gayŭn manusia. Daya adi mun anŭ taŭn-i pingadong ka mbŭh Pinganyu Kristus.

⁸ Bijaga meh, isa kuu ngga bara anak mu dŭh kinanyap kayuh adi kieh ko ndai yŭn ngan; kambŭi angān dŭh kinanyap-i, angān re kambat upah ngan ngga sipuno-i.

⁹ Daya adi dŭh bidigŭng di ajar Kristus, ka mbŭh miriseu, daya anŭ dŭh biyŭn Tapa. Asi asi adi bidigŭng dieh, biyŭn Sama ngga Anak.

¹⁰ Jadi meh, kambŭi agi daya mandŭg ka angān dŭh ngga ajar Jesus, dŭhnyah kambat ngara di arŭn ngan; dŭhnyah gŭh nang, “Damai ka angān.”

¹¹ Amai tadŭ tadŭ daya adi nggen tabi damai di ngara mbŭh jadi dingan ngara darŭm pingandai arap ngara.

Sikasŭn Pinganang

¹² Bagŭ kayuh an ku kidaan di angān, pak kana dŭ dŭh pakai surat. An dŭ aku di tudu angān ka minyu pasar-i ngga angān, isa ata jadi sukup gaŭn.

¹³ Bara anak Jurud dayung mu pait tabi ka kuu.