1 THESSALONICA 4 - Hakcipta - Biatah Bidayuh

Aran Pimudip adi Pimunos Asŭng Tapa

¹ Sikasŭn-i, bara dingan, angān muko birajar so kieh simuki patut udip ngga pimunos asŭng Tapa. Sawŭ, anŭ taŭn mbŭh aran pimudip ngan. Ka madin kieh mite buang ngatat angān, ngga adŭn Tuhan Jesus, ndai rabis so adi mbŭh.

² Amai angān taŭn puan pinyitayan adi kieh ko nggen di angān ngga kuasa Tuhan Jesus.

³ Amai pinyiraan Tapa inŭh, angān jadi kudus, buang jo so pimudip adi dŭh tatu darŭm pingandai kais.

⁴ Barang naan angān adi dari patut puan munki angān patut udip ngga sawŭn ngan ngga aran pimudip adi kana ka batur,

⁵ dŭh ngga pinyiripong adi sarah mun daya adi dŭh puan Tapa.

⁶ Di kayuh ati, meh, daya dŭh siŭn ndai sarah di dingan-i adi samah Kristen puan kah nyibudo ngara. Kieh muko kidaan kayuh ati di angān dawŭ-i, ka bandar bakan angān nang Tuhan re ngukum sinadan daya adi ndai simŭnŭ.

⁷ Tapa dŭh-I bagan ata da udip darŭm pimudip adi dŭh tatu darŭm pingandai kais, pak darŭm pimudip adi pimunos asŭng-I.

⁸ Jadi meh, asi asi adi tirawan ajar ati dŭh-i tirawan manusia, pak Tapa, adi nggen di angān Roh Kudus-I.

⁹ Dŭhsah kieh nuris ka angān pasar munki angān patut rindu dingan ngan adi samah Kristen ngga angān. Adŭp ngan mbŭh dog ngajar Tapa munki angān patut rindu dingan ngan.

¹⁰ Sibandar-i, angān taŭn mbŭh mun anŭ di sopŭrŭg dingan ta di ndi tarun tana Macedonia. Jadi kieh mite angān, adi bara dingan ami, ndai rabis so adi mbŭh.

¹¹ Gruwŭn adŭp ngan dŭh ndai dudu kamati kamanŭ, pak piguruh di kraja pingandai adŭp ngan, buang jiroh biranja adŭp ngan, nimun adi ko kieh kidaan di angān prajah.

¹² Simuti inŭh daya adi dŭh Kristen bisa bisaya di angān, ka angān dŭh re sah bisangan di tadŭ daya yŭn kayuh adi angān biguna.

Pimandŭg Tuhan Jesus

¹³ Bara dingan, kieh raan angān puan munki kayuh di ngara adi mbŭh kabŭs, isa angān dŭh susah, mun ngara adi mating pingarap.

¹⁴ Kieh sabah Jesus kabŭs ka mbŭh makat udip bauh. Kieh sabah gŭh Tapa re taban pari ngga Jesus sinadan ngara adi sabah di Ayŭh sibayuh ngara kabŭs.

¹⁵ Anŭ adi kieh ngajar di angān madin inŭh ajar adŭp Tuhan: ata adi babŭ udip di andu Tuhan mandŭg dŭh re panu diŭ so ngara adi mbŭh kabŭs.

¹⁶ Re agi dog dingah pinganang so pingubak malaikat darŭm sirais, jawŭn trompet Tapa, ka adŭp Tuhan re mūn so shorga. Ngara adi mbŭh kabŭs adi sabah di Kristus re diŭ makat udip bauh;

¹⁷ komŭnŭ ata adi udip di tika anŭ re dog nguruk ngga ngara di abun siŭn bidapŭd ngga Tuhan di rangit. Jadi ata meh re siraru agi ngga Tuhan.

¹⁸ Ngapŭi meh, ngatat dingan ngan ngga pinganang sakati.