1 SAMUEL 31 - Hakcipta - Biatah Bidayuh

Saul ngga Bara Anak Dari-I Kabŭs

¹ Bara daya Philistine bisaad ngga bara daya Israel di Darŭd Gilboa. Bagŭ daya Israel dog siŭ diginŭ, ka adi bŭkŭn, samŭn Raja Saul ngga anak anak dari-i, bu pirupas adŭp ngara.

² Pak bara daya Philistine nyandat ngara ka siŭ anak anak Saul adi taruh madis, Jonathan, Abinadab, ka Malchishua.

³ Pinganyu bana nyerang Saul, ka reja reja-panah so pinganyu dog ayŭh ka ayŭh mbŭh bana biragan.

⁴ Ayŭh nang di sianŭ adi tukang digŭng sinyata-i, “Nyitak pedang mu ka siŭ aku, isa daya Philistine ati adi dŭh puan Tapa dŭh tawŭh aku ka siŭ aku.” Pak daya anŭ mbŭh ruai dŭh birani re ndai simŭnŭ. Jadi Saul nyitak pedang adŭp-i ka sagan adŭp-i dieh.

⁵ Daya anŭ adi tukang digŭng sinyata Saul kiris Saul mbŭh kabŭs, sagan gŭh adŭp-i di pedang adŭp-i ka samah kabŭs ngga Saul.

⁶ Ka simŭnŭ inŭh Saul, ngga taruh madis anak dari-i, samŭn dari adi tukang digŭng sinyata-i, kabŭs. Sopŭrŭg daya adi ayō Saul kabŭs andu anŭ.

⁷ Kan daya daya Israel adi di parad mandi rubān Jezreel ka adi di parad tura ka timor Yang Jordan dingah bara soldadu Israel mbŭh bu mangān pinganyu ka Saul ngga anak anak dari-i mbŭh dog siŭ, ngara bu tagan kupo kupo ngara. Ka daya Philistine mandŭg ka ngisi-i.

⁸ Di andu ripas biperang daya Philistine di mirupak sinyata daya Israel adi mbŭh kabŭs, ka ngara dapŭd tadang Saul ngga tadang tadang taruh madis anak-i prigure di Darŭd Gilboa.

⁹ Ngara kapŭg ubak Saul, pirukos jipo perang-i, ka bada bara pinyisung taban-i ka ndi tarun tarun tana Philistia ngga piagah agah kana di tibudo tibudo ngara samŭn di daya ngara.

¹⁰ Komŭnŭ ngara na sinyata-i di bari-sambah tapa Astart, ka tadang-i ngara masak di sindung kupo Beth Shan.

¹¹ Kan daya di kupo Jabesh di Gilead dingah kayuh adi daya Philistine mbŭh ndai di tadang Saul,

¹² ngara adi siabo birani matak ka panu ndi ngarŭm ngarŭm nuju Beth Shan. Ngara tambit tadang Saul ngga tadang tadang anak-i ka taban-i pari ka Jabesh, ka badang-i diginŭ.

¹³ Komŭnŭ ngara nguruk turang ngara ka kubur-i di ribo ndi tŭngŭn kayuh tamarisk di kupo, ka bipusa ju andu.