1 SAMUEL 20 - Hakcipta - Biatah Bidayuh

Jonathan Turung David

¹ Komŭnŭ David bu so Naioth di Ramah di ka yŭn Jonathan. “Ani mbŭh aku ndai?” ayŭh siken. “Ani sarah ku? Ani sarah mbŭh aku ndai adi bada sama mu an siŭ aku?”

² Jonathan nam, “Tapa dŭh re bada kuu dog siŭ! Sama ku kidaan di aku sopŭrŭg kayuh adi-i ndai, biguna bait dŭh, ka dŭh-i sukan so aku. Har anŭ dŭh-i sawŭ!”

³ Pak David nam, “Sama mu puan munki masam kuu ruai rindu aku, ka ayŭh mbŭh ndai pikir-i dŭh re bada kuu puan kayuh adi re-i ndai, sabab te kuu naman. Aku bipayu di kuu ngga adŭn TUHAN dŭm dŭh tui aku re kabŭs!”

⁴ Jonathan nang, “Aku re ndai ani ani adi raan mu.”

⁵ “Sipagi inŭh Gawai Anak Buran,” David nam, “ka aku sipatut-i sua man ngga raja. Pak kambŭi-i kana di pikir mu, aku re di bisukan di sapa tarun ndŭg singumi andu, andu girundi.

⁶ Kambŭi sama mu kiris aku mating sua guru man ngga ayŭh, kidaan di ayŭh aku muko mite pinyibandar so kuu nang aku an rikas mari ka Bethlehem, amai ati mbŭh tipuh adi ngga rawang ku jugan sadis adi ndi sawa ndi sidah.

⁷ Kambŭi ayŭh nang, ‘Dŭh har,’ aku siramat; pak kambŭi ayŭh baji, kuu puan nang ayŭh taŭn gruwŭn raan ida ida ngga aku.

⁸ Turung ndai simŭnŭ yŭn ku, ka ingat janji kudus adi kuu mbŭh ndai ngga aku. Pak kambŭi aku sarah, adŭp mu siŭ aku! Dŭhsah taban aku ka yŭn-i”

⁹ “Dŭhnyah pikir kayuh adi sakanŭ!” Jonathan nam. “Kambŭi aku sawŭ puan sama ku raan siŭ kuu, kuu pikir aku dŭh re kidaan?”

¹⁰ David rasu siken, “Asi meh re kidaan di aku kambŭi sama mu nam kuu ngga baji?”

¹¹ “Ja di ka sapa tarun,” Jonathan nam. Ka ngara di,

¹² ka Jonathan nang di David, “Isa-i TUHAN adi Tapa Israel jadi saksi ta! Ngga arong munti andu sipagi ka di andu girundi aku re siken sama ku. Kambŭi gaya-i ngga kuu kana, aku re pait pinganang ka kuu.

¹³ Pak kambŭi ayŭh taŭn raan kinaman kuu, isa-i TUHAN siŭ aku kambŭi aku dŭh nggen puan di kuu ka bada kuu bu ngga siramat!

¹⁴ Ka kambŭi aku gibabŭ udip, turung ingat janji kudus mu buang tŭtŭd ngga aku; pak kambŭi aku kabŭs,

¹⁵ kiren pinyitŭtŭd adi mun anŭ di rawang ku adu adu. Ka kan TUHAN mbŭh pirarap sopŭrŭg pinganyu mu,

¹⁶ isa-i janji ta duwŭh dŭh patŭd. Kambŭi-i patŭd, TUHAN re ngukum kuu.”

¹⁷ Ndi sidah dinge Jonathan bada David bijanji adŭp-i rindu ayŭh, amai Jonathan rindu David nimun-i rindu adŭp-i.

¹⁸ Komŭnŭ Jonathan nang di ayŭh, “Amai sipagi inŭh Gawai Anak Buran, taŭn-i re tatŭng kambŭi kuu mating mandŭg di sua guru man ngga raja.

¹⁹ Andu girundi taŭn-i re rabis tatŭng kuu mating mandŭg; jadi di ka tarun yŭn mu bisukan andu anŭ, bisukan di punok tugung batuh diginŭ.

²⁰ Nganŭ aku re nimbak taruh reja-panah dieh, bada-i mun kayuh adi sawŭ dog nŭtŭn.

²¹ Komŭnŭ aku re bada daya-gaji ku di jiroh-i. Ka kambŭi aku nang di ayŭh, ‘Tingga, reja-panah anŭ tura ka parad mati mu; tambit-i,’ rati-i kuu siramat ka bisa ruah. Aku bipayu ngga adŭn TUHAN adi udip kuu manŭn dŭh re mani mani.

²² Pak kambŭi aku nang di ayŭh, ‘Reja-panah anŭ tura ka parad majeh mu,’ kuu bu, sabab TUHAN bada kuu bu.

²³ Ka jeja ka janji adi ata muko samah ndai ngga dingan ta, TUHAN re natu ata samah ingat-i ndŭg jŭ.”

²⁴ Jadi David bisukan di sapa tarun. Di tika Gawai Anak Buran, Raja Saul mandŭg re di man

²⁵ ka guru di tarun yŭn-i ari guru sindŭk sindung. Abner guru sindŭk ayŭh, ka Jonathan guru situra jawin ngga ayŭh. Tarun yŭn David guru mating daya dieh,

²⁶ pak Saul mating nang ani ani andu anŭ, sabab ayŭh pikir, “Agi kayuh mbŭh jadi di ayŭh, buang-i ayŭh dŭh bisig nanyam ka adat.”

²⁷ Di andu anŭ ndi, andu adi ripas Gawai Anak Buran, tarun yŭn David guru babŭ engan, ka Saul siken Jonathan, “Mani David mating mandŭg sua guru man andu mijah ngga andu ati?”

²⁸ Jonathan nam, “Ayŭh mite aku nyibandar adŭp-i di ka Bethlehem.

²⁹ ‘Turung bada aku di,’ ayŭh nang, ‘sabab rawang ami man siramat gawai sadis di kupo, ka jurud ku bada aku dŭh siŭn dŭh mandŭg. Ka kambŭi kuu jerā ku, bada aku di isa aku bidapŭd ngga bara madis ku.’ Anŭ sabab ayŭh mating sua guru man di mija mai.”

³⁰ Saul mbŭh raru bangok di Jonathan ka nang di ayŭh, “Batur mun sindŭ mu kuu! Madin aku puan kuu marad ka David ka mbŭh pimangŭh adŭp mu ngga sindŭ mu anŭ!

³¹ Dŭh kah kuu puan nang sitŭkŭd David udip, kuu dŭh re dapŭd jadi raja rais ati? Madin, panu ka taban ayŭh kamati — ayŭh dŭh siŭn dŭh kabŭs!”

³² “Ani pada ayŭh kabŭs?” Jonathan nam. “Ani sarah-i?”

³³ Nganŭ, Saul nyigaru Jonathan ngga jarok-i an siŭ ayŭh, ka Jonathan rada sama-i taŭn sawŭ raan siŭ David.

³⁴ Jonathan makat, bu so mija buang baji ka dŭh man ani ani andu anŭ — andu adi duwŭh di Gawai Anak Buran. Ayŭh mbŭh raru susah pasar David adi sama-i Saul mbŭh pimangŭh.

³⁵ Isan isan andu jawa ndi, Jonathan di ka sapa tarun di dapŭd David, nanyam ka pekat ngara. Ayŭh taban ndi naan anak-anya dari ngga adŭp-i

³⁶ ka nang di ayŭh, “Bikaduh ka jiroh reja-panah adi aku nimbak.” Anak anŭ bikaduh, ka Jonathan nimbak ndi reja-panah bada rewan ayŭh.

³⁷ Kan anak anŭ mbŭh ndŭg tarun adi yŭn reja-panah anŭ rabu, Jonathan nang di ayŭh ngga sirŭŭn bana, “Reja-panah anŭ rabu jeh dijeh!

³⁸ Dŭh nŭŭh mijog diginŭ! Rikas!” Anak anŭ tambit reja-panah anŭ ka pari ka yŭn tuan-i,

³⁹ dŭh puan ani rati-i; kaŭs-i Jonathan ngga David adŭ puan.

⁴⁰ Jonathan nggen sinyata-i di anak anŭ ka bada ayŭh taban-i pari ka kupo.

⁴¹ Ripas anak anŭ mbŭh bu, David makat so punok tugung batuh, sidikang ka mutu ubak-i pitaruh kari. Ayŭh ngga Jonathan sien buang sium dingan-i; susah David bās dŭ so tung Jonathan.

⁴² Komŭnŭ Jonathan nang di David, “Tapa agi ngga kuu. TUHAN re natu kuu ngga aku, samŭn sesang mu ngga jaku, adu adu ingat janji kudus adi ata duwŭh mbŭh ndai.” Komŭnŭ David bu, ka Jonathan pari ka kupo.