1 KRONIKEL 9 - Hakcipta - Biatah Bidayuh

Pimari Bara Daya adi Dog Taran

¹ Sopŭrŭg daya Israel dog nuris dŭn ngara nanyam ka rawang ngara, ka anŭ mbŭh dog rekod darŭm Surat bara Raja Israel. Daya Judah mbŭh dog taban ngga bu ka Babylon, dog ukum amai dosa ngara.

² Ngara adi diŭ pari ka tana adŭp ngara di kupo kupo inŭh samŭn daya saja, bara imam, bara daya Levi, ka ngara adi nyiraja di Ramin TUHAN.

³ Daya so tibaran tibaran-asar Judah, Benjamin, Ephraim, ka Manasseh pari di rŭŭ di Jerusalem.

^4-6 Agi 690 rawang so tibaran-asar Judah rŭŭ di Jerusalem. Bara sesang anak dari Judah adi dŭn Perez dog nguru Uthai, adi anak Ammihud ka sukuh Omri. Bara tayung babuk-i adi bŭkŭn inŭh samŭn Imri ngga Bani. Bara sesang anak dari Judah adi dŭn Shelah dog nguru Asaiah, adi pingubak rawang-i. Bara sesang anak dari Judah adi dŭn Zerah dog nguru Jeuel.

^7-8 Ngara ati inŭh bara daya so tibaran-asar Benjamin adi rŭŭ di Jerusalem: Salu anak Meshullam, adi anak Hodaviah anak Hassenuah, Ibneiah anak Jeroham, Elah, anak Uzzi ka sukuh Michri, Meshullam anak Shephatiah, adi anak Reuel anak Ibnijah.

⁹ Agi 956 rawang so tibaran-asar anŭ rŭŭ diginŭ. Sopŭrŭg dari adi mbŭh dog nyabŭt anŭ inŭh pingubak bara rawang.

Bara Imam adi Rŭŭ di Jerusalem

^10-12 Ati bara imam adi rŭŭ di Jerusalem: Jedaiah, Jehoiarib, ngga Jachin. Azariah anak Hilkiah (pingubak di Ramin TUHAN), ka tayung babuk-i inŭh samŭn Meshullam, Zadok, Meraioth, ngga Ahitub. Adaiah anak Jeroham, ka tayung babuk-i inŭh samŭn Pashhur ngga Malchijah. Maasai anak Adiel, adi tayung babuk-i inŭh samŭn Jahzerah, Meshullam, Meshillemith, ngga Immer.

¹³ Prungun bara imam adi jadi pingubak rawang inŭh 1,760 naan. Ngara anŭ raru pandai darŭm barang masam kraja adi dog ndai darŭm Ramin TUHAN.

Bara Daya Levi adi Rŭŭ di Jerusalem

^14-16 Ati bara daya Levi adi rŭŭ di Jerusalem: Shemaiah anak Hasshub; ka tayung babuk-i inŭh samŭn Azrikam ngga Hashabiah, so manak Merari. Bakbakkar, Heresh, ngga Galal. Mattaniah anak Mica, ka tayung babuk-i inŭh samŭn Zichri ngga Asaph. Obadiah anak Shemaiah, adi tayung babuk-i inŭh samŭn Galal ngga Jeduthun. Berechiah, anak Asa ka sukuh Elkanah, adi rŭŭ di tarun tana kupo Netophah.

Bara di Tukang Jaga Ramin TUHAN adi Rŭŭ di Jerusalem

¹⁷ Ngara ati adi tukang jaga Ramin TUHAN ka rŭŭ di Jerusalem: Shallum, Akkub, Talmon, ngga Ahiman. Shallum pingubak ngara.

¹⁸ Ndŭg jaman anŭ, ngara adi so manak ngara dog bada jadi tukang jaga di parad tura ka timor Tiban Raja Diŭ so anŭ ngara jaga di tiban di parad daya Levi bibari.

¹⁹ Shallum, anak Kore ka sukuh Ebiasaph, samah bara dingan-i adi so manak Korah, adi dapu tanggong jaga tiban Bari TUHAN, nimun tayung-babuk ngara di jaman ngara nyiraja di bari TUHAN.

²⁰ Phineas anak Eleazar ko tukang ngatur ngara di kraja. Isa-i TUHAN agi ngga ayŭh!

²¹ Zechariah anak Meshelemiah ko gŭh tukang jaga tiban Bari TUHAN.

²² Prungun ngara, 212 naan dog mien jadi daya tukang jaga tiban-bās. Dŭn ngara dog pibŭrŭt nanyam ka anak anak kupo adi so ngara mandŭg. Raja David ngga nabi Samuel inŭh adi bada tayung-babuk ngara dapu tanggong di kraja anŭ.

²³ Ngara ngga sesang ngara pijuu jaga tiban tiban-bās Ramin TUHAN.

²⁴ Agi 4 tiban-bās: ndi di parad tura ka utara, ndi di parad tura ka siratan, ndi di parad tura ka timor, ka ndi di parad tura ka barat; ka barang tiban-bās biyŭn ndi naan pingubak daya adi tukang jaga.

²⁵ Bara adi tukang jaga anŭ dog turung madis madis ngara, adi rŭŭ di anak anak kupo ka adi bikires jaga ju andu darŭm ndi saba.

²⁶ Pat naan pingubak ngara adi tukang jaga anŭ inŭh daya Levi ka biyŭn pinanggong adi tatap. Ngara gŭh dapu tanggong yŭn birit birit darŭm Ramin TUHAN ka yŭn dudu barang adi dog nyikŭn diginŭ.

²⁷ Ngara rŭŭ sindŭk Ramin TUHAN, sabab kraja ngara inŭh tukang jaga-i ka tukang kuka tiban tiban bās-i barang isan.

Bara Daya Levi adi Bŭkŭn

²⁸ Bara daya Levi adi bŭkŭn dapu tanggong di dudu pingakas adi dog pakai di tika bisambah. Ngara pirasa pingakas anŭ kan-i dog piruah yŭn pakai, ka kan-i dog pari yŭn nyikŭn.

²⁹ Ngara adi bŭkŭn tukang sita pingakas kudus adi bŭkŭn, samŭn tibaduk, wain, inyo kanā, kimanyan, ka rapah rapah.

³⁰ Pak kraja pingandai adi gaur rapah rapah inŭh tung bara imam.

³¹ Ndi naan daya Levi dŭn Mattithiah, anak pinuai Shallum, so manak Korah, inŭh dapu tanggong sidia pinganggen adi dog ndai.

³² Bara manak Kohath inŭh dapu tanggong sidia ruti kudus yŭn Ramin TUHAN barang andu Sabbath.

³³ Agi kada rawang daya Levi dapu tanggong jadi pinyanyi di Ramin TUHAN. Bara pingubak rawang anŭ rŭŭ di kudu kudu ramin di Ramin TUHAN dŭh ndai kraja bŭkŭn, sabab ngara nyiraja sandu ngga singarŭm.

³⁴ Bara daya adi ko dog nyabŭt anŭ inŭh bara pingubak rawang daya Levi. Ngara pinguru nanyam ka susud taris tibaran-asar ngara adi rŭŭ di Jerusalem.

Tayung-Babuk ngga Sesang Raja Saul

³⁵ Jeiel pijog kupo Gibeon ka rŭŭ diginŭ. Dŭn sawŭn-i Maacah.

³⁶ Anak pinuai-i Abdon, ka bara anak dari-i adi bŭkŭn inŭh, Zur, Kish, Baal, Ner, Nadab,

³⁷ Gedor, Ahio, Zechariah, ngga Mikloth,

³⁸ adi sama Shimeah. Bara sesang ngara rŭŭ di Jerusalem, bisindŭk ngga rawang manak ngara adi bŭkŭn.

³⁹ Ner inŭh sama Kish, ka Kish inŭh sama Saul. Saul biyŭn pat madis anak dari: Jonathan, Malchishua, Abinadab, ngga Eshbaal.

⁴⁰ Jonathan inŭh sama Meribbaal adi sama Micah.

⁴¹ Micah biyŭn pat madis anak dari: Pithon, Melech, Tarea, ngga Ahaz.

⁴² Ahaz inŭh sama Jarah, adi sama taruh madis anak dari: Alemeth, Azmaveth, ngga Zimri. Zimri inŭh sama Moza, ka

⁴³ Moza sama Binea, Binea sama Rephaiah Rephaiah sama Eleasah, ka Eleasah sama Azel.

⁴⁴ Azel biyŭn nŭm madis anak dari: Azrikam, Bocheru, Ishmael, Sheariah, Obadiah, ngga Hanan.