1 CORINTH 2 - Hakcipta - Biatah Bidayuh

Agah Pasar Kristus dog Masak di Rigang

¹ Bara dingan ku! Di andu aku mandŭg ka angān di nyuse atur-pinyiraan Tapa adi gibayuh ong puan, aku dŭh pakai pinganang adi mbar daya mirati puan kah pakai pinyibijak ong.

² Amai sitadŭn aku agi ngga angān, aku mbŭh ndai pikir ku an kambŭt sopŭrŭg kayuh adŭ-i Jesus Kristus ka rabis-i pinyikabŭs-I di atuh rigang.

³ Jadi kan aku mandŭg ka angān, aku agi ramah buang kimŭtŭr darŭm taru,

⁴ ka ajar ngga Agah Kana adi aku taban dŭh-i dog nggen ngga pinganang adi nakit dog nyusun so ka pinyibijak manusia, pak so ka kuasa Roh Tapa.

⁵ Jadi pinyabah ngan, dŭh-i bisangan di pinyibijak manusia pak di kuasa Tapa.

Pinyibijak Tapa

⁶ Sunggu mŭnŭ aku babŭ gŭh minyu pasar pinyibijak di ngara adi mbŭh sukup mirati darŭm pimudip roh. Pak-i dŭh pinyibijak adi so ong ati puan kah so kuasa adi mritah ong ati; kuasa adi mritah ong ati mbŭh re mungan.

⁷ Pinyibijak adi aku piagah inŭh pinyibijak Tapa adi dog sukan so manusia, pak adi-I ko mien yŭn bragah ta diŭ so ong dog napa.

⁸ Bara adi mritah ong ati dŭh puan pasar pinyibijak anŭ. Kambŭi ngara puan, ngara dŭh masak Tuhan Bragah di atuh rigang.

⁹ Pak sunggu mŭnŭ, sak adi nang Surat-kudus, “Kayuh adi bŭn daya kiris puan kah dingah, kayuh adi bŭn daya pikir re jadi, mbŭh tigŭrŭ kayuh adi Tapa sidia yŭn ngara adi rindu Ayŭh.”

¹⁰ Pak Tapa ko ngga Roh-I kidaan di ata rusia-I. Roh-I anŭ nyarap sopŭrŭg kayuh, ndŭg atur-pinyiraan Tapa adi bisukan ani.

¹¹ Kaŭs-i roh adi darŭm ata inŭh adi puan sopŭrŭg kayuh pasar ata; simŭnŭ gŭh Roh Tapa, Ayŭh sadi adŭ adi puan sopŭrŭg kayuh pasar Tapa.

¹² Pak Tapa mbŭh nggen di ata Roh Kudus. Ka anŭ inŭh sabab ata dŭh bipikir mun daya adi di ong ati bipikir. Anŭ gŭh sabab ata natŭng sopŭrŭg kayuh adi Tapa mbŭh nggen di ata.

¹³ Ngapŭi meh, kieh dŭh minyu ngga bang bang piminyu adi dog ngajar so ka pinyibijak manusia, pak ngga bang bang piminyu adi dog ngajar Roh Kudus, darŭm kieh ngajar kayuh adi sawŭ pasar Ayŭh di ngara adi mbŭh biyŭn Roh Kudus.

¹⁴ Asi asi adi dŭh biyŭn Roh Kudus dŭh bisa kambat pinganggen adi mandŭg so Roh Tapa. Daya adi mun anŭ dŭh-i mirati pinganggen anŭ, ka taŭn re nang-i kayuh au-tarun, sabab guna pinganggen anŭ adŭ-i dog puan so ka gaya roh.

¹⁵ Pak asi asi adi biyŭn Roh Kudus, ayŭh dapŭd kiris kana sopŭrŭg kayuh, pak mating daya tungang nyabŭt arap kana Roh Kudus.

¹⁶ Sak adi nang Surat-kudus, “Asi puan pikir Tuhan? Asi tungang pitayan Ayŭh?” Pak ata inŭh, adi biyŭn pikir Kristus.