Yohanes 7 - Porjanjian Boharu Torjomahan Baso Dilakng Soari-ari

Pomandiran Yesus somanah ari rayo Pondu' Doutn Yesus monula' watu boko somadikan-Nyo monyiuh oca' Sio monjadi tokonal (7:1-9)

¹ Lopas jadi nantai, Yesus bojalatn mongoliliki doerah Galilea. Sio co honda' ko doerah Yudea obai boko pomimpitn agama Yahudi di santai honda' mombunuh Sio.

² Watu nantai, dampikam ari rayo urakng Yahudi, ia'an Ari Rayo Pondu' Doutn.

³ Boko somadikan Yesus bopandir ko Sio, “Botula'cam doi' si'itan. Botula'cam ko Yudea oca' boko murid Duatn ulih moniant boko mujisat inyo Duatn labuhan.

⁴ Aman urakng honda' monjadi tokonal, io kinyo moombakan lapo inyo dipulahnyo. Jadi, aman Duatn bulah mujisat, tunju'ancam diri Duatnko somuo urakng di dunia.”

⁵ (Boko somadikan-Nyo bopandir ubo nantai obai sia' pan co pocayo ko Sio.)

⁶ Kato Yesus ko sia', “Watu inyo Allah tontuan pakai' Aku bolupm datakng. Apo hala ado watu inyo pas pakai' kaitn.

⁷ Boko urakng di dunia conyiant alasan pakai' bonci'an kaitn. Apo dunia bonci'an Aku obai Aku hala momadahannyo ko sia' obai porbuatannyo jahat.

⁸ Kaitn ja'am botula' ko pogai nantai. Aku co botula' ko su'utan obai bolupm watu Ku.”

⁹ Lopas jadi bopandir ubo nantai, Yesus totap diapm di Galilea.

Yesus botula' ko Yerusalem socaro diapm-diapm (7:10-13)

¹⁰ Apo, lopas jadi boko murid-Nyo botula' ko pogai nantai, lalu Sio hingkas jam, apo soi-botapu' oca' boko urakng co mongotohu'i nantai.

¹¹ Boko pomimpitn agama Yahudi boriso'i Sio di pogai nantai. Kato sia', “Di mono kiro Urakng nantai?”

¹² Boko urakng mula'i boko bongkucapan mongona'i Sio. Ado inyo bopandir, “Sio urakng boi' hati.” Apo inyo bukai bopandir, “Sio kinyo boi'! Sio monyosat'an boko urakng.”

¹³ Apo, conyiant ado urakng inyo borani bopandir torakng-torakan mongona'i Sio obai sia' gola' agatn boko pomimpitn agama Yahudi.

Pomandiran Yesus bondar-bondar doi' Allah (7:14-24)

¹⁴ Watu tongahan poraya'an nantai, Yesus botula' mongajar di tongahlamanan Rumah Allah.

¹⁵ Boko pomimpitn agama Yahudi hiratn bondar. Kato sia', “Ubo apo Urakng ni'in ulih tohu hala? Sio co jumpat sokolah husus Hukupm Torat.”

¹⁶ Kato Yesus ko sia', “Ajaran-Ku co boasal doi' diri-Ku siku', apo doi' Allah inyo udah moutus Aku.

¹⁷ Somuo urakng inyo honda' molabuhan kohonda' Allah, sia' paca'an tohu aman ajaran-Ku ni'in bondar-bondar doi' Allah, kata'an bayo doi' diri-Ku siku'.

¹⁸ Urakng inyo mongajar agatn pomandiran doi' dirinyo siku', io bayo goyap kohormatan pakai' dirinyo siku'. Apo urakng inyo goyap kohormatan pakai' Sio inyo moutusnyo, urakng nantai bujur bondar. Io kinyo monipu urakng bukai.

¹⁹ Musa udah moonju' ko kaitn Hukupm Torat. Apo conyiant sikuꞌ urakng pan di antaro kaitn inyo monaatinyo. Hibo kaitn honda' mombunuh Aku?”

²⁰ Urakng banya' nantai monimbas, “Duatn gogilo obai dirasu'i roh jahat! Conyiant ado urakng inyo honda' mombunuh Duatn!”

²¹ Yesus monimbas sia', “Aku bayo molabuhan sobuti' porbuatan watu ari Sabat, lalu somuo kaitn hiratn.

²² Musa moonji'i kaitn poraturan oca' bosunant. (Sobondarnyo, poraturan nantai bukainyo doi' Musa apo doi' angki-bayatn kito sobolupm Musa.) Obai nantai, kaitn totap monyunant biar pan watunyo botopatan agatn ari Sabat.

²³ Aman kaitn totap monyunant watu Ari Sabat, kaitn molabuhan nantai oca' kaitn co molanggar poraturan Musa nantai. Jadi, soharusnyo kaitn jangan godi agatn Aku pas Aku monyamani bukakng-tubuh siku' urakng watu Ari Sabat!

²⁴ Jangan mohakipi monurut inyo kotiat'an, apo monurut inyo bondar.”

Urakng gangga'-gua'an aman Yesus nam Rajo Inyo Dijanjian Allah (7:25-36)

²⁵ Lopas jadi nantai, boboropo urakng Yerusalem bopandir, “Pasti urakng ninam urakng inyo honda' dibunuh pomimpitn kito pan?

²⁶ Apo, porotian bo! Sio bopandir di pohadapan urakng banya' kotakan bebas. Sia' co mongatoan lapo pan molawatn Sio. Mungkitn bai sia' udah tohu obai Sio nam Kristus, Rajo Inyo Dijanjian Allah?

²⁷ Apo watu Kristus datakng, co nyiant ado siku' urakng pan inyo paca'an tohu doi' mono asal-Nyo. Apo somuo kito tohu doi' mono asal Urakng ni'in.”

²⁸ Jadi, watu Yesus mongajar di tongahlamanan Rumah Allah, Sio bopandir agatn saro borakng, “Kaitn konal Aku huatan doi' mono asal-Ku! Apo Aku datakng kinyo kohonda'-Ku siku'. Aku diutus Sio inyo bondar. Kaitn co tohuan Sio.

²⁹ Apo Aku konal agatn Sio obai Aku datakng doi' Sio. Sionam inyo moutus Aku.”

³⁰ Obai nantai, sia' bousaha monangkap Yesus, apo conyiant ado siku' urakng pan inyo ulih moncama'-Nyo, obai watunyo nantai bolupm datakng.

³¹ Apo, di antaro urakng banya' nantai ado banya' jam inyo pocayo ko Yesus. Kato sia', “Aman Kristus datakng nononyo, apo ulih bai Io bulah mujisat lobih doi' Urakng ni'in?”

³² Boboropo pomimpitn agama Yahudi doi' kolompok Farisi mondinga' urakng banya' nantai bongkucapan mongona'i Yesus. Jadi, sia' bosamo-samo agatn boko imam kopala' monyiuh boboropo ponjago Rumah Allah oca' botula' monangkap Yesus.

³³ Jadi, Yesus bopandir ko urakng banya', “Ija' sobontar cam Aku bosamo agatn kaitn. Lopas jadi nantai, Aku paca'an bobali' ko Sio inyo moutus Aku.

³⁴ Kaitn paca'an monggoyapi Aku, apo kaitn co paca'an botomu agatn Aku. Obai, kaitn culih datakng ko tompat Aku nononyo.”

³⁵ Obai nantai, boko pomimpitn agama Yahudi bopandir ko siku'-monyiku', “Sio ni'in honda' botula' ko mono jadi kito culih monomuan Sio? Kata'an Sio honda' botula' ko boko urakng Yahudi inyo diapm di porantauan kironyo, di antaro urakng Yunani, lalu mongajar urakng Yunani?

³⁶ La'apo masud Sio bopandir, Kaitn paca'an monggoyapi Aku, apo kaitn co paca'an botomu agatn Aku. Kaitn culih datakng ko tompat Aku nononyo?”

Yesus samo agatn ara'i inyo moonji'i kohidupan (7:37-44)

³⁷ Ari toahir doi' pogai Pondu' Doutn nantai udah datakng watunyoam. Nantai ari inyo kotakan pontikng doi' pogai nantai. Di tongahlamanan Rumah Allah, Yesus bodiritn lalu bopandir borakng, “Sopo aja' inyo korahakan, datakng ko Aku pakai' minum!

³⁸ Sopo aja' inyo pocayo ko Aku, io samo sama'an pomandiran ni'in inyo totulis di Buku Suci: ‘Boko aliran ara'i inyo moonji'i hidup paca'an mongalir doi' dalapm hatinyo.’ ”

³⁹ (Agatn pomandiran nantai, Yesus bomasud Roh Allah. Somuo urakng inyo pocayo ko Yesus paca'an monorima' Roh Allah. Apo watu nantai, Roh Allah bolupm ditorima' sia' obai Yesus bolupm dimuliaan.)

⁴⁰ Boko urakng mondinga' pomandiran Yesus nantai. Ado boboropo inyo bopandir, “Pasti Sio ninam Nabi inyo koi tantian!”

⁴¹ Inyo bukai bopandir, “Pasti Sio ni'inan Kristus, Rajo Inyo Dijanjian Allah!” Apo inyo bukai agi' bopandir, “Bukai! Kristus nantai kinyo datakng doi' Galilea.

⁴² Buku Suci mongatoan obai Kristus nantai koturutan Rajo Daud. Buku Suci pan mongatoan obai Kristus boasal doi' laman Betlehem, kampukng laman Daud.”

⁴³ Jadi, urakng banya' botikakng agatn siku'-monyiku' mongona'i Sio.

⁴⁴ Boboropo urakng honda' monangkap Sio, apo conyiant siku' urakng pan inyo ulih moncama'-Nyo.

Boko pomimpitn urakng Yahudi kinyo pocayo obai Yesus nam doi' Allah (7:45-52)

⁴⁵ Timpu boko ponjago Rumah Allah nantai datakng agi', imam kopala' huatan kolompok urakng Farisi nantai bopandir ko sia', “Mapo kaitn co mombaba' Io kosi'itan?”

⁴⁶ Timbas boko ponjago nantai, “Bolupm kalo ado urakng inyo mongajar momadahan boko hal ubo Sio nantai!”

⁴⁷ Boko urakng Farisi bopandir ko sia', “Kata'an kaitn pan disosatan Io jam ai?

⁴⁸ Conyiant ado siku' urakng pan di antaro boko pomimpitn damo urakng Farisi inyo pocayo ko Sio.

⁴⁹ Apo urakng banya' ni'in inyo co mongonal Hukupm Torat, Allah paca'an mohukupm sia'!”

⁵⁰ Lalu, ado di antaro sia', Nikodemus, salah siku' urakng Farisi inyo kalo datakng ko Yesus. Kato Nikodemus ko kolompok pomimpitn nantai,

⁵¹ “Monurut Hukupm Torat, kito culih mohukupm siku' urakng pan sobolupm kito mondinga' huatan mongotohu'i la'apo porbuatan-Nyo.”

⁵² Timbas sia', “Kata'an kolai ni'in doi' Galilea jam? Poriso'icam Buku Suci. Kolai paca'an tohu obai conyiant nabi inyo datakng doi' doerah Galilea!”

Botina' inyo bomporajoan

⁵³ Lopas jadi nantai, sia' pulakng ko rumahnyo masikng-masikng.