Yohanes 5 - Porjanjian Boharu Torjomahan Baso Dilakng Soari-ari

Watu ari Sabat, Yesus monyamani siku' urakng lumpuh di kolapm Betesda

¹ Lopas nantai, ado ari rayo urakng Yahudi. Jadi, Yesus botula' ko Yerusalem pakai' morayaan nantai.

² Di Yerusalem ado sobuah pintu gerbakng mansu' kota, damonyo Pintu Gerbakng Domba. Dampikng di siatn tai ado sobuah kolapm. Dalapm baso Ibrani kolapm nantai disobut ‘Betesda’. Kolapm nantai ado lima' polantaran.

³ Banya' urakng sakit diulit'an di boko polantaran nantai: Ado boko urakng buto, boko urakng timpakng, boko urakng lumpuh. [Boko urakng sakit nantai monantian sampai ara'i di kolapm nantai bogolumbakng.

⁴ Obai, sowatu-watu ado molekat Tuhatn inyo turutn lalu monggolumbakan ara'i di kolapm nantai. Sopo ja' inyo lobih holu mansu' ko dalapm ara'i nantai lopas jadi digolumbaki, lalu urakng nantai nyamanam doi' ponyakit la'apo pan.]

⁵ Di santai ado siku' urakng inyo sakit udah tigo puluh dolapatn tohutn manahnyo, culihnyo bojalatn.

⁶ Yesus moniant io moulit'an di santai, huatan tohu obai io nantai udah sakit manaham. Jadi Yesus botakutn ko io, “Kolai honda' nyaman?”

⁷ Timbas urakng sakit nantai ko Sio, “Bopai, conyiant ado urakng inyo ulih monulukng mouluran ku ko dalapm kolapm nantai pas ara'inyo mula'i bogolumbakng. Watu ku bousaha monuju ko kolapm nantai, urakng bukai udah mansu' holuam.”

⁸ Kato Yesus ko io, “Bodiritn cam, angkat tikar kolai nan, lalu bojalatncam!”

⁹ Watu nian jam urakng nantai nyamanam. Io moangkat tikarnyo lalu bojalatn. Apo ari nantai ia'an ari Sabat.

¹⁰ Obai nianam, boko pomimpitn agama Yahudi bopandir ko urakng inyo hoyu' nyamanam nantai. Kato sia', “Sari ni'in ari Sabat. Jadi kolai culih mombaba' tikar kolai.”

¹¹ Apo io monimbasi sia', “Urakng inyo monyamanan aku, Sio momandiran ko aku: ‘Angkatcam tikar kolai, lalu bojalatncam.’ ”

¹² Sia' botakutn ko io, “Sopo inyo monyiuh kolai pakai' moangkat tikar kolai ongko bojalatn?”

¹³ Apo io co tohu sopo inyo monyamaninyo. Obai, Yesus udah kinyo kotiat'an di antaro urakng banya' inyo ado di santai.

¹⁴ Kohobu' kolusoannyo, Yesus botomu agatn urakng inyo dinyamani nantai di tongahlamanan Rumah Allah. Kato Yesus ko io, “Dinga'ancam! Ni'in kolai udah nyamanam. Jangan bulah dosa agi' oca' kolai co kona' la'apo pan inyo lobih buru'.”

¹⁵ Urakng nantai borangkat ko boko pomimpitn agama Yahudi nantai, lalu momadahannyo ko sia' obai urakng inyo monyamaninyo ni'in Yesus.

¹⁶ Jadi, boko pomimpitn agama Yahudi nantai bousaha honda' mondorako'i Yesus. Obai, Sio molabuhan boko hal ubo nantai watu ari Sabat.

¹⁷ Apo Sio bopandir agatn sia', “Sampai watu ni'in, Bopai-Ku kinyo botongga' bokorojo. Sama'an nian jam, Aku pan bokorojo jam.”

¹⁸ Obai pomandiran Yesus nantai, lalu boko pomimpitn agama Yahudi mongkitn bousaha pakai' mombunuh-Nyo. Bukainyo aja' obai Sio molanggar poraturan ari Sabat, apo obai Sio momandiran obai Allah nantai Bopai-Nyo. Agatn ubo nian, Sio monyamoan diri-Nyo agatn Allah.

Yesus bopandir obai Allah inyo moonji'i kuaso ko Io

¹⁹ Ongko Yesus monimbas boko pomimpitn agama Yahudi nantai. Kato-Nyo, “Pondinga'ancam bobondar, inyo Ku pandiran ni'in: Ana' kinyo molabuhan boko la'apo doi' kohonda' diri-Nyo siku'. Ana' ongkah molabuhan la'apo inyo Io tiat doi' Bopai. Obai, la'apo inyo dilabuhan Allah Bopai, nantai jam inyo dilabuhan Ana'.

²⁰ Obai, Bopai mongasihi Ana'. Sio monunju'an la'apo pan inyo Sio labuhan ko Io. Malah, Sio paca'an monunju'an ko Ana'nyo boko porbuatan inyo lobih hebat agi', jadi nononyo kaitn paca'an hiratn.

²¹ Bopai bulah boko urakng mati lalu bobali' hidup, huatan moonji'i sia' kohidupan inyo sobondarnyo. Ubo nian jam Ana' moonji'i kohidupan inyo sobondarnyo ko sopo ja' sosuai kohonda'-Nyo.

²² Bopai co mohakipi sopo pan. Apo somuo kuaso pakai' mohakipi udah dionju' ko Ana'.

²³ Bopai molabuhan nantai oca' somuo urakng mohormati Ana' samo sama'an sia' mohormati Sio. Sopo ja' inyo co mohormati Ana', boroti io kinyo mohormati Allah Bopai inyo moutus-Nyo.

²⁴ Pondinga'ancam bobondar inyo Ku pandiran ni'in: Somuo urakng inyo monuruti pomandiran-Ku huatan pocayo ko Allah inyo moutus Aku, sia' co dihukupm apo mondapat'an hidup somanah-manahnyo. Obai, sia' udah pindah doi' komatian somanah-manahnyo huatan mansu' ko dalapm kohidupan inyo bondar huatan somanah-manahnyo.

²⁵ Pondinga'ancam bobondar inyo Ku pandiran ni'in: Tajahan datakng watunyo malahan udah datakam watunyo boko urakng mati paca'an mondinga' saro Ana' Allah. Sia' inyo mondinga'annyo paca'an hidup.

²⁶ Obai, Bopai moonji'i kuaso ko Ana' pakai' moonji'i hidup, samo sama'an Sio ado kuaso pakai' moonji'i hidup.

²⁷ Sio udah moonji'i kuaso ko Io pakai' mohakipi, obai Io nam inyo disobut Ana' Monsio.

²⁸ Jangan kaitn hiratn agatn hal ni'in. Obai, paca'an datakng watunyo somuo urakng mati paca'an mondinga' saro-Nyo.

²⁹ Sia' paca'an koluar doi' pasaran. Urakng inyo bulah koboi'an paca'an mondapat'an hidup somanah-manahnyo di sorugo. Apo urakng inyo bulah kojahatan paca'an dihukupm di noraka.”

³⁰ “Aku culih-Ku bulah boko lapo doi' kohonda'-Ku siku'. Aku mohakipi sosuai agatn lapo inyo Aku dinga' doi' Bopai-Ku. Somuo koputusan-Ku adil, obai Aku co monuruti kohonda'-Ku siku', apo Aku monuruti kohonda' Sio inyo moutus Aku.

³¹ Aman bayo Aku siku' momadahan mongona'i diri-Ku, urakng bukai bolupm tohu aman pomandiran-Ku bondar.

³² Apo ado inyo bukai inyo momadahan mongona'i Aku. Aku tohu obai pomandiran-Nyo bondar.

³³ Kaitn udah moutus rombokan ko Yohanes Pombaptis. Io momadahan mongona'i Aku agatn bondar.

³⁴ (Sobondarnyo Aku co momontikan monsio pakai' bosasi mongona'i Aku. Apo Aku moingant'an kaitn mongona'i kosasian Yohanes oca' kaitn dapat disolamant'an.)

³⁵ Yohanes samo sama'an pompolitoan inyo bonyalo huatan bocohayo. Kaitn sonang monorima' cohayonyo nantai apo bayo somontaro mo.

³⁶ Apo Aku ado buti inyo lobih kuat daripado pomandiran Yohanes. Allah Bopai udah moonji'i pokoroja'an ko aku. Aku molabuhan boko pokoroja'an nantai watu ni'in. Somuo porbuatan-Ku nantai mombutian obai Bopai udah moutus Aku.

³⁷ Bopai inyo moutus Aku, Sio siku' udah momadahan mongona'i Aku. Apo kaitn co kalo mondinga' saro-Nyo huatan co kalo moniant rupo-Nyo.

³⁸ Kaitn co monyimpatn Pomandiran Allah dalapm hati kaitn obai kaitn co pocayo Aku inyo diutus-Nyo.

³⁹ Kaitn bolajar Buku Suci obai kaitn monyangko obai ado hidup somanah-manahnyo di dalapmnyo. Apo Buku Suci nantai momadahan mongona'i Aku.

⁴⁰ Biar pan ubo nian, kaitn co honda' datakng ko Aku pakai' mondapat'an hidup nantai.

⁴¹ Aku co bogoyap pujian doi' monsio.

⁴² Apo Aku mongonal kaitn. Kaitn co bobondar mongasihi Allah dalapm hati kaitn.

⁴³ Aku datakng dalapm damo Bopai-Ku, apo kaitn monula' Ku. Padohal, soandainyo ado urakng bukai inyo datakng bayo mowakili dirinyo siku', kaitn tajahan monorima' io.

⁴⁴ Nantai obai kaitn gala' hala bogoyap kohormatan doi' sosamo kaitn mo. Apo kaitn co kalo goyap pujian doi' Allah inyo satu-satunyo inyo bondar. Aman ubo nian, pasti kaitn co pocayo agatn Aku!

⁴⁵ Jangan kaitn bopikir obai Aku paca'an monyalahan kaitn di hadapan Bopai. Urakng inyo monyalahan kaitn nan Musa. Kaitn boharap kaitn paca'an disolamant'an obai kaitn monaati porintah Allah inyo ditulis Musa. Apo, justru Musanam inyo monyalahan kaitn.

⁴⁶ Obai, sobondarnyo kaitn co pocayo agatn io. Soandainyo kaitn bobondar pocayo ko Musa, lalu soharusnyo kaitn pan pocayo agatn Aku. Obai, io udah monulis mongona'i Aku.

⁴⁷ Apo nyatonyo kaitn co pocayo lapo inyo ditulisnyo. Jadi, co mungkitn kaitn paca'an pocayo lapo inyo Ku padahan?”