Yohanes 3 - Porjanjian Boharu Torjomahan Baso Dilakng Soari-ari

Yesus bokisah agatn Nikodemus

¹ Ado siku' pomimpitn agama Yahudi doi' kolompok Farisi, damonyo Nikodemus.

² Watu malapm, io datakng ko Yesus. Katonyo, “Guru, koi tohu obai Duatn ninam guru inyo diutus Allah. Obai, Duatn molabuhan boko mujisat nantai. Conyiant urakng inyo mampu molabuhan lou' sama'an nantai aman co ado potulukan doi' Allah.”

³ Timbas Yesus, “Porotiancam! Bobondar inyo Ku pandiran ni'in: Conyiant ado urakng inyo ulih moniant Koraja'an Allah aman io co dilahiran agi'.”

⁴ Kato Nikodemus ko Sio, “Ubo apo siku' urakng ulih dilahiran agi' aman io udah tuho? Ubo apo io bobali' mansu' ko dalapm kandukan indainyo lalu dilahiran sokali agi'?”

⁵ Timbas Yesus, “Porotiancam! Bobondar inyo Ku pandiran ni'in: Conyiant ado urakng inyo ulih monjadi anggota Koraja'an Allah aman io co dilahiran doi' ara'i agatn Roh Allah.

⁶ La'apo inyo dilahiran socaro jasmani bosipat jasmani huatan la'apo inyo dilahiran doi' Roh Allah bosipat Rohani.

⁷ Jangan kolai hiratn obai aku bopandir ko kolai, kolai gola' dilahiran agi'.

⁸ Angin muput ko mono aja' io kohonda'i. Urakng ulih mondinga' bunyinyo, apo co dapat mongotohu'i doi' mono angin nantai datakng damo ko mono angin nantai botula'. Ubo nian jam agatn urakng inyo dilahiran doi' Roh Allah.”

⁹ Nikodemus bopandir ko Sio, “Ubo apo nantai ulih tojadi?”

¹⁰ Timbas Yesus, “Kolai ninam guru urakng Israel. Hibo kolai co mongotohu'inyo?

¹¹ Porotian cam! Koi bopandir mongona'i boko hal inyo koi kotohu'i. Koi momadahan mongona'i boko hal inyo udah koi tiat. Apo kaitn co honda' monorima' kosasian koi nantai.

¹² Kaitn co pocayo watu Aku mongajar mongona'i boko hal doi' dunia ni'in. Aman ubo nian, ubo apo kaitn pocayo aman Aku mongajar mongona'i boko hal doi' sorugo?

¹³ Conyiant ado siku' pan inyo kalo noi' ko sorugo solaitn Ana' Monsio, inyo turutn doi' sorugo ko dunia ni'in.

¹⁴ Samo sama'an komai Musa moninggian ular tombago ditihakng kayu dipadakng pasir. Samo ubo nantai jam agatn Ana' Monsio paca'an ditinggian

¹⁵ oca' somuo urakng inyo pocayo ko Sio, sia' mondapat'an kohidupan somanah-manahnyo.

¹⁶ Obai, Allah kotakng mongasihi boko urakng di dunia ni'in. Sampai, Sio udah monyorahan Ana'-Nyo inyo tunggal. Allah molabuhan nantai, oca' somuo urakng inyo pocayo ko Ana'-Nyo, sia' co bonaso di noraka, apo sia' dapat hidup somanah-manahnyo di sorugo.

¹⁷ Obai, Allah moutus Ana'-Nyo ko dunia ni'in pakai' monyolamant'an boko urakng, bukainyo pakai' mohukupm boko urakng.

¹⁸ Boko urakng inyo pocayo ko Sio, sia' co dihukupm. Apo boko urakng inyo co pocayo ko Sio, udah ado koputusan sia' paca'an dihukupm, obai sia' co pocayo ko damo Ana' Allah inyo tunggal.

¹⁹ Hukupan nantai tojadi obai ni'in: Torakng udah datakng ko dunia. Apo monsio lobih sonang agatn golap daripado torakng. Sia' lobih sonang agatn golap obai boko porbuatan sia' jahat.

²⁰ Somuo urakng inyo bulah kojahatan, sia' bonci'an torakng. Sia' co datakng ko torakng obai torakng bulah porbuatan sia' inyo jahat kotiat'an.

²¹ Apo, somuo urakng inyo bulah boko hal inyo bondar, sia' datakng ko torakng. Oca' kotiat'an obai porbuatan sia' sosuai agatn la'apo inyo dikohonda'i Allah.”

Yohanes Pombaptis momadahan obai Yesus nam Rajo Inyo Dijanjian Allah

²² Lopas jadi nantai, Yesus agatn boko murid-Nyo botula' ko tanah Yudea. Di santai, Sio diapm bosamo agatn sia'. Sio mombaptis boko urakng,

²³ apo Yohanes mombaptis boko urakng di Ainon, dampikng Salim. Io mombaptis di santai obai ado ara'i. Boko urakng datakng ko io minto dibaptis.

²⁴ (Watu nantai, Yohanes bolupm ditamoan ko dalapm ponjara.)

²⁵ Boko murid Yohanes botikakng agatn siku' urakng Yahudi mongona'i poraturan agama mongona'i pomborosihan.

²⁶ Jadi, sia' datakng ko Yohanes. Kato sia' ko io, “Guru, ija' ingant cadoai Urakng nantai inyo bosamo agatn duatn di soborakng Sungai Yordan, ia'an Sio inyo duatn padahan. Porotian cam. Ni'in, Sio mombaptis jam. Somuo urakng monuju ko Sio.”

²⁷ Timbas Yohanes, “Conyiant siku' urakng pan inyo ulih monguti' la'apo pan aman Allah kinyo moonju'nyo.

²⁸ Kaitn udah mondinga' aku bopandir, ‘Aku bukainyo Rajo Ponyolamant. Aku diutus mondoholu'i Sio.’

²⁹ Pongantitn botina' ia'an umputn pongantitn lolaki. Kawal pongantitn lolaki nantai bayo bodiritn mondampiki huatan mondinga'an, huatan io sonang aman mondinga'an saro pongantitn lolaki. Sama'an nian jam agatn aku. Watu ni'in aku sonang bondar.

³⁰ Sio gola' mongkitn dipontikan, apo aku mongkitn co pontikng.

³¹ Urakng inyo datakng doi' sorugo urakng nanam inyo bokuaso doi' la'apo pan. Urakng inyo boasal doi' dunia ninam monsio biaso, ongkah bopandir mongona'i boko hal duniaam. Yesus datakng doi' sorugo. Sionam inyo bokuaso doi' la'apo pan.

³² Sio momadahan mongona'i somuo inyo Sio tiat huatan Sio dinga'. Apo, conyiant ado urakng inyo pocayo agatn pomandiran-Nyo.

³³ Apo, somuo urakng inyo pocayo agatn pomandiran-Nyo, sia' moaku'i obai Allah bondar.

³⁴ Obai urakng inyo diutus Allah monyampaian boko pomandiran Allah, obai Roh Allah udah dionju' ko Sio soponuhnyo.

³⁵ Allah, Bopai mongasihi Ana'-Nyo. Allah udah moonju' ko Sio kuaso dipucu' la'apo pan.

³⁶ Boko urakng inyo pocayo ko Ana' Allah, mondapat'an kohidupan somanah-manahnyo. Apo boko urakng inyo kinyo monaati Ana' Allah, co mondapat'an kohidupan nantai. Sia' ija' kona' hukupan doi' Allah.”