Yohanes 2 - Porjanjian Boharu Torjomahan Baso Dilakng Soari-ari

Yesus bulah mujisat morubah ara'i monjadi anggur

¹ Kotigo arinyo, ado pogai kawitn di laman Kana di propinsi Galilea. Indai Yesus ado di santai.

² Yesus huatan boko murid-Nyo dihundakng jam ko pogai kawitn nantai.

³ Watu pogai nantai ija' bolanjut, anggur udah habis. Jadi, indai Yesus bopandir ko Sio, “Sia' kohabisan anggur!”

⁴ Kato Yesus koindainyo, “Indai, Aku cuku campur tangan dalapm urusan nantai. Bolupm datakng watunyo Aku monunju'an kuaso-Ku.”

⁵ Apo indai Yesus bopandir ko boko hulutn di siatn nantai, “Haja' kato labuhan nam la'apo inyo Io padahan ko kaitn.”

⁶ Di santai ado onam buah roga' bosar tompat ara'i, inyo dipulah doi' batu. (Ara'i dalapm boko roga' nantai dipakai, pakai' kopontikan pobasu'an monurut adat urakng Yahudi.) Isi sotiap roga' nantai kiro-kiro [dolapatn puluh sampai soratus duo puluh liter.]

⁷ Yesus bopandir ko boko polayatn nantai, “Isi'i ara'i cam boko roga' nantai bisi-bisi.” Lalu, sia' moisi roga' nantai sampai bisi.

⁸ Lopas jadi nantai, Yesus bopandir ko sia', “Kuti'cam sodikit ara'i nantai ninam lalu baba' ko pomimpitn pogai.” Jadi, sia' molabuhan nantai.

⁹ Pomimpitn pogai nantai mooso'i ara'i inyo udah Yesus ubah monjadi anggur nantai. (Io co tohu doi' mono anggur nantai, apo boko hulutn inyo bogoyap ara'i nantai tohumo.) Pomimpitn pogai nantai moningkau pongantitn lolaki,

¹⁰ lalu bopandir ko io, “Biasonyo urakng mombagi anggur inyo kotakng boi' lobih doholu. Aman boko tamu' udah tokosiham minum, hoyu' urakng mombagian anggur inyo biaso. Apo kolai monyimpatn anggur inyo kotakng boi' sampai ni'in!”

¹¹ Yesus molabuhan mujisat nantai di laman Kana di propinsi Galilea. Nantai inyo potamo doi' somuo tando inyo monunju'an sopo Sio sobondarnyo. Agatn tando nantai, Yesus monunju'an komulia'an-Nyo. Lalu, boko murid-Nyo pocayo ko Sio.

Yesus mousir boko podagakng doi' tongahlamanan Rumah Allah

¹² Lopas jadi nantai, Yesus botula' ko kota Kapernaum bosamo-samo agatn indai-Nyo, boko somadikan-Nyo huatan boko murid-Nyo. Sia' diapm di santai bayo boboropo ari mo.

¹³ Watunyo udah dampikam urakng Yahudi morayaan Paskah. Jadi, Yesus botula' ko kota Yerusalem.

¹⁴ Di santai, Sio moniant ado boko podagakng di tongahlamanan Rumah Allah! Ado inyo monjual sapi, domba ongko burukng daro. Ado jam boko urakng inyo mohurupan duit inyo dudu' di siatn tai.

¹⁵ Jadi, Sio bulah sobuti' pohombat doi' tali lalu mousir somuo sia' nantai doi' Rumah Allah, tomansu' somuo domba ongko sapi sia'. Sio pan botikapm tikapan boko meja inyo dipakai boko urakng inyo mohurupan duit. Jadi, duit sia' dihambur ko mono-mono.

¹⁶ Sio pan bopandir ko boko urakng inyo monjual burukng daro nantai. Kato-Nyo, “Koluarancam somuo burukng ni'in. Rumah Bopai-Ku Jangan dipulah monjadi rumah tompat bodagakng!”

¹⁷ Hal nantai bulah boko murid Yesus toingant, pomandiran ni'in inyo totulis di dalapm Buku Suci: “Cinta-Ku pakai' Rumah Duatn, oi Allah moloburan hati-Ku.”

¹⁸ Boko pomimpitn agama Yahudi inyo ado di santai molawatn Yesus. Kato sia', “Butianbo aman Duatn ado hak pakai' molabuhan hal inyo ubo hoyu' Duatn labuhan nantai. Cubo Duatn mombulah mujisat oca' ado tando pakai' koi!”

¹⁹ Timbas Yesus, “Robahanbo Rumah Allah ni'in. Lalu, dalapm tigo ari, Aku paca'an mombangunnyo agi'!”

²⁰ Kato sia' ko Sio, “Rumah Allah ni'in dipulah somanah ompat puluh onam tohutn! Co mungkitn Kolai ulih mombangunnyo agi' dalapm tigo ari?”

²¹ Apo Yesus co bomasud Rumah Allah nantai. Agatn pomandiran ‘Rumah Allah’, masud Sio bukakng-Nyo siku'.

²² Boko murid-Nyo toingant pomandiran-Nyo nantai lopas jadi Sio hidup agi' doi' komatian. Jadi, sia' pocayo ko somuo pomandiran inyo totulis di Buku Suci huatan ko somuo pomandiran Yesus.

²³ Somanah Pogai Paskah nantai dirayoan, Yesus ada'an di Yerusalem. Sio mombulah boko mujisat sobagai tando inyo monunju'an sopo Sio sobondarnyo. Jadi, banya' urakng pocayo ko Sio obai sia' moniant boko mujisat-Nyo nantai.

²⁴ Apo Yesus siku' co pocayo agatn sia', obai Sio mongonal somuo monsio.

²⁵ Sio co pontikng siku' urakng pakai' momadahannyo ko Sio mongona'i monsio, obai Sio tohu somuo inyo ado di dalapm hati monsio.