Yohanes 19 - Porjanjian Boharu Torjomahan Baso Dilakng Soari-ari

¹ Lalu, Pilatus mansu' ongko monyiuh oca' Yesus dihombat.

² Boko projurit nantai moanyam lou' sama'an mahkota duri, lalu mongona'an di pucu' kopala'-Nyo. Sia' mongona'an jubah ungu ko Sio.

³ Opat bondar sia' datakng ko Sio, mouyu'-uyu' Sio. Kato sia', “Hidup, Rajo urakng Yahudi!” Lalu, sia' monompilikng mato-muho-Nyo.

⁴ Pilatus koluar agi' doi' istananyo lalu bopandir ko urakng banya' di santai. Katonyo, “Dinga'ancam! Aku mombaba' Urakng ni'in ko luar, ko kaitn. Oca' kaitn tohu obai aku co mondapat'an sobuti' kosalahan pan doi'-Nyo.”

⁵ Ongko, Yesus dibaba' koluar ija' momakai mahkota duri huatan jubah ungu nantai. Kato Pilatus ko sia', “Tiatbo Urakng nantai!”

⁶ Pas boko imam kopala' huatan boko ponjago Rumah Allah moniant Yesus, sia' mondongkakng-mondorah, “Hukupm mati cam Sio di kayu salib! Hukupm mati cam Sio di kayu salib!” Kato Pilatus ko sia', “Kuti' Io lalu hukupm mati cam di kayu salib. Obai, aku co bodapat sobuti' kosalahan pan doi'-Nyo.”

⁷ Kato boko urakng Yahudi nantai ko io, “Koi ado poraturan agama. Monurut poraturan nantai, Sio gola' dihukupm mati. Obai, Sio mongatoan diri-Nyo Ana' Allah!”

⁸ Pas Pilatus mondinga' pandir nantai, io mongkitn gola' moadili pokaro nantai.

⁹ Jadi, io mansu' agi' ko dalapm istana. Lopas Yesus dibaba' mansu' jam, Pilatus botakutn ko Sio, “Kolai boasal doi' mono?” Apo Yesus co monimbasi.

¹⁰ Jadi, Pilatus bopandir ko Sio, “Co Kolai honda' bopandir agatn aku, bai!? Kolai gola' tohu obai aku bokuaso pakai' mombebasan Kolai. Aku pan bokuaso pakai' bulah Kolai dihukupm mati di kayu salib!”

¹¹ Timbas Yesus, “Kolai bokuaso tohadap Aku obai Allah inyo moonji'i kolai kuaso nantai. Obai nantai, urakng inyo monyorahan Aku ko kolai, io udah bulah dosa inyo lobih bosar daripado dosa inyo tajahan kolai pulah.”

¹² Tangga'i nantai, Pilatus honda' molopasan Yesus. Apo, boko urakng Yahudi mondorah, “Urakng ni'in mongatoan diri-Nyo rajo. Sotiap urakng ubo nian molawatn Kaisar, Rajo Roma. Jadi, aman kolai molopasan-Nyo, boroti kolai pan molawatn Kaisar.”

¹³ Pas Pilatus mondinga' pandir nantai, io monyiuh oca' Yesus dibaba' ko luar. Pilatus dudu' di krosi tompat io moadili pokaro inyo tolota' di tompat inyo bodamoan ‘Lantai Batu’. (Damo tompat nantai dalapm baso Ibrani Gabata.)

¹⁴ Watu nantai hampir japm duo bolas tongah ari watu ari Jumat, ia'an ari urakng Yahudi monyodia'an posiapan pakai' Ari Rayo Paskah. Pilatus bopandir ko boko urakng Yahudi nantai, “Tiatbo! Ninam rajo kaitn!”

¹⁵ Sia' mondongkakng-mondorah, “Hukupm mati Io! Hukupm mati Io di kayu salib!” Kato Pilatus ko sia', “Kata'an kaitn honda' aku mohukupm mati rajo kaitn di kayu salib bai?” Timbas boko imam kopala', “Ongkah Rajo Roma am rajo koi!”

^16a Koponsuahannyo Pilatus monyorahan Yesus ko sia' oca' Sio dihukupm mati di kayu salib.

Yesus dipaku di kayu salib

^16b Jadi, sia' mombaba' Yesus ko luar kota Yerusalem.

¹⁷ Yesus siku' mo momikul kayu salib-Nyo ko tompat inyo disobut “Tompat Tongkorak”. (Dalapm baso Ibrani tompat nantai disobut “Golgota”.)

¹⁸ Di santai Sio dipaku di kayu salib. Timpu nantai pan ado duo urakng bukai dipaku di kayu salib, siku' di sopia' kanan ongko siku' di sopia' kiba' Yesus.

¹⁹ Pilatus udah monyiuh pakai' momasakng tulisan ni'in di dipucu' kayu salib nantai. Bunyinyo, “Ninam Yesus, urakng Nazaret, Rajo urakng Yahudi.”

²⁰ Banya' urakng Yahudi inyo mombaco tulisan nantai obai tompat Yesus disaliban dampikng kota mo. Solaitn nantai, pomandiran nantai ditulis dalapm baso Ibrani, baso Latin ongko baso Yunani.

²¹ Boko imam kopala' bopandir ko Pilatus, “Jangan monulis ‘Rajo urakng Yahudi’. Apo tulis ja' ubo ni'in, ‘Urakng ni'in mongatoan Sio ninam Rajo urakng Yahudi.’ ”

²² Apo timbas Pilatus, “Inyo udah ku siuh pakai' ditulis, kinyo paca'an ku ubaham!”

²³ Lopas jadi boko projurit momaku Yesus di kayu salib nantai, sia' monguti' pakai'an-Nyo. Pakai'an nantai dibagi ompat, tiap projurit mondapat sobirat. Sia' pan monguti' jubah-Nyo. Jubah nantai conyiant ado sambukan johitan, apo ditenun doi' pucu' ko babah.

²⁴ Boko projurit nantai bopandir ko siku'-monyiku', “Jangan kito birat-birat jubah ni'in. Mara kito boundi pakai' monontuan sopo inyo mondapat'annyo.” Nantai tojadi oca' lapo inyo ditulis di Buku Suci digonapi. Bunyi tulisannyo ni'in: “Sia' mombagi-bagi pakai'an-Ku. Sia' boundi pakai' jubah-Ku.” Hal nantai inyo dilabuhan boko projurit.

²⁵ Indai Yesus bodiritn di dampikng kayu salib-Nyo. Di santai jam bordiritn somadikan indai-Nyo, Maria (bini Klopas), ongko Maria Magdalena.

²⁶ Di dampikng indai Yesus ado murid inyo kotakng dikasihi Yesus. Pas Yesus moniant sia' duo, Sio bopandir ko indai-Nyo, “Indai, anggap ja'am io ana' duatn watu ni'in!”

²⁷ Sio jam bopandir ko murid-Nyo nantai, “Watu ni'in Sio monjadi ubo indai kolai!” Soja' doi' nantai, murid-Nyo nantai monorima' indai Yesus diapm di rumahnyo.

Yesus mati

²⁸ Yesus tohu obai boko pokoroja'an-Nyo udah tuntukam. Obai nantai, Sio bopandir, “Aku korahakan!” Sio mongatoan nantai oca' pomandiran inyo ditulis di Buku Suci digonapi.

²⁹ Di santai ado tompat boisi ara'i anggur mansapm. Ado projurit inyo moncolupan somacapm sosuatu monyorap ara'i anggur nantai. Ongko di bolit'an ko batakng hisop, lalu dijulukan ko nyao Yesus.

³⁰ Lopas Yesus mominum ara'i anggur nantai, Sio bopandir, “Tuntukam!” Lalu, Sio monundu'an kopala'-Nyo, monyorahan kosih-Nyo.

³¹ Ari nantai ari Jumat, ia'an nantai ari pakai' posiapan sobolupm ari Sabat. Boko pomimpitn urakng Yahudi kinyo honda' boko bangkai nantai totap ado di kayu salib watu ari Sabat, hususnyo obai ari Sabat watu nantai am Ari Rayo Paskah. Jadi, sia' datakng ko gubernur Pilatus mominto oca' kaki boko urakng nantai dipatahan, oca'nyo copat mati. Lalu, boko bangkainyo hoyu' diturutan sobolupm ari Sabat mula'i watu malapm nantai.

³² Jadi, boko projuritnyo botula' ko tompat boko urakng inyo dihukupm mati di kayu salib. Sia' momatahan kaki urakng inyo potamo lalu momatahan kaki urakng inyo koduo inyo di hukupm mati di kayu salib timpu samo agatn Yesus.

³³ Apo, pas sia' sampai ko Yesus, sia' moniant obai Sio udah mati. Jadi, sia' kinyo momatahan kaki-Nyo.

³⁴ Apo ado projurit inyo monumba' porut Yesus. Darah agatn ara'i lansukng mongalir koluar.

³⁵ (Urakng inyo momboritoan mongona'i nantai udah moniantnyo agatn mato kopala'nyo siku'. Sio tohu kojadian nantai bondar-bondar tojadi. Io momboritoannyo agatn bondar oca' kaitn pan pocayo).

³⁶ Nantai tojadi ko bangkai Yesus oca' lapo inyo ditulis di Buku Suci digonapi. Ni'in pomandirannyo: “Conyiant tulakng-Nyo inyo dipatahan.”

³⁷ Ado jam ditulis di Buku Suci: “Sia' paca'an moniant Sio inyo udah sia' tumba'.”

Yesus dipasar di dalapm gua (19:38-42)

³⁸ Lopas jadi nantai, Yusuf datakng ko gubernur Pilatus minto ijitn pakai' monurutan bangkai Yesus oca' dipasar. (Yusuf nantai boasal doi' kota Arimatea. Io nantai pan murid Yesus, apo kinyo socaro torakng-torakan, obai io gola' agatn boko pomimpitn Yahudi.) Pilatus moijitan io. Jadi, io botula' momocaki bangkai Yesus.

³⁹ Nikodemus pan datakng ko santai. (Io inyo holu datakng monomu'i Yesus watu malapm.) Nikodemus mombaba' campuran minya' mur ongko minya' garu pakai' bangkai Yesus, sokitar tigo puluh kilu.

⁴⁰ Sia' monguti' bangkai Yesus, lalu momututnyo agatn koitn putih borosih bosamo agatn rorompahan nantai. Nantai sosuai agatn caro urakng Yahudi monyiap'an bangkai pakai' dipasar.

⁴¹ Dampikng tompat Yesus disaliban ado kobutn. Di dalapm kobutn nantai ado gua tompat pasaran inyo bolupm kalo dipakai.

⁴² Sia' gola' hagar momasar Yesus obai ari Sabat hampikam. Jadi, obai pasaran nantai dampikngmo, ongko sia' momasar Yesus di santaiam.