Yohanes 18 - Porjanjian Boharu Torjomahan Baso Dilakng Soari-ari

Yesus ditangkap

¹ Lopas jadi Yesus momandiran somuonyo nantai, Sio botula' ko soborakng sungai Kidron bosamo agatn boko murid-Nyo. Di santai ado kobutn. Sio agatn boko murid-Nyo mansu' ko kobutn nantai.

² Obai Yesus hala bokumpul di santai agatn boko murid-Nyo. Yudas ia'an murid Yesus inyo mohianati Sio pan tohu tompat nantai.

³ Yudas datakng ko santai mombaba' kolompok urakng pakai' monangkap Yesus. Ado boboropo ponjago Rumah Allah inyo disiuh boko imam kopala' huatan boko pomimpitn agama Yahudi doi' kolompok Farisi. Ado jam pasukan tontara Romawi. Kolompok urakng nantai datakng agatn mombaba' obor huatan sonjato.

⁴ Apo, Yesus udah mongotohu'i boko hal inyo paca'an tojadi tohadap diri-Nyo. Jadi, Sio mohampiki sia', lalu botakutn, “Kaitn monggoyapi sopo?”

⁵ Timbas sia', “Koi monggoyapi Yesus doi' laman Nazaret.” Kato Yesus, “Aku ninam Io nantai.” (Yudas inyo honda' monyorahan Yesus, ko boko musuhnyo, io pan bodiritn bosamo agatn sia').

⁶ Watu Yesus momadahan “Aku ninam Io nantai,” jadi sia' somuo mundur, ongko tokorobah.

⁷ Yesus botakutn sokali agi' ko sia', “Kaitn monggoyapi sopo?” Kato sia', “Koi monggoyapi Yesus doi' laman Nazaret.”

⁸ Timbas Yesus, “Udah-Ku padahan ko kaitam Aku ninam Io nantai. Jadi, aman kaitn monggoyapi Aku, longahan boko murid-Ku ni'in botula'.”

⁹ (Nantai tojadi oca' pomandiran Yesus tontai monjadi nyata, ia'an pomandiran Yesus timpu Io bodoa ko Allah Bopai-Nyo. Kato-Nyo, “Doi' boko urakng inyo Duatn onju' ko aku, co nyiant inyo bonaso.”)

¹⁰ Watu nantai Simon Petrus ado podakng. Io moncabut podakng nantai, ongko molabuhi siku' urakng polayatn Imam Agukng. Damo polayatn nantai Malkus. Petrus momopat kolindakan buai kanannyo sampai pogat.

¹¹ Apo Yesus bopandir ko io, “Sarukan podakng nan ko sarukngnyo. Apo bai kolai pikir Aku co paca'an minum doi' cangkir pondorita'an inyo dionju' Bopai ko Aku?”

Yesus diadili Imam Agukng huatan rasul Petrus bopandir co io mongonal Yesus

¹² Lopas nian, komandatn pasukan bosamo agatn somuo rombokan nantai monangkap Yesus lalu mongobat longan-Nyo.

¹³ Mulonyo sia' mombaba' Yesus ko Hanas, obai Hanas montuho lolaki Kayafas, huatan Kayafasnam Imam Agukng watu tohutn nantai.

¹⁴ Kayafasnam inyo kalo bopandir ko boko pomimpitn urakng Yahudi, katonyo, “Lobih boi' aman siku' urakng ja'am mati pakai' banso kito.”

¹⁵ Simon Petrus huatan siku' murid inyo bukainyo mombodapan Yesus. Murid inyo bukai mongonal Imam Agukng. Jadi, io mansu' ko tongah lamanan rumah Imam Agukng nantai bosamo agatn Yesus agatn rombokan nantai.

¹⁶ Apo Petrus tinggal di luar mo, dampikng sambakng lawakng pagar rumah nantai. Jadi, murid inyo bukai nantai bobali' ko luar, lalu bopandir agatn polayatn botina' inyo monjago lawakng nantai. Lalu, io ulih mombaba' Petrus mansu' ko tongahlamanan rumah nantai jam.

¹⁷ Botina' polayatn nantai sampat botakutn ko Petrus, “Kolai ni'in pan murid Urakng inyo ditangkap nantai pan?” Timbas Petrus, “Cado!”

¹⁸ Malapm nantai kotakan dingin bondar. Jadi, boko polayatn Imam agatn boko ponjago Rumah Allah udah monyalo'i api doi' harakng. Sia' botindu. Petrus bodiritn bosamo agatn sia' botindu jam.

¹⁹ Watu nantai, Imam Agukng botakutn ko Yesus mongona'i boko murid-Nyo huatan mongona'i ajaran-Nyo.

^20-21 Apo Yesus bopandir ko io nantai, “Hibo kolai botakutn ko Aku? Aku hala bopandir torus-torakng di muka' umum. Aku hala mongajar di boko rumah sombayakng, huatan di Rumah Allah jam, tompat somuo urakng Yahudi bokumpul. Kinyo kalo Ku bumbutn. Takutan ja'am ko sia' inyo udah mondinga' boko ajaran-Ku. Pasti sia' tohu lapo inyo Ku katoan.”

²² Ado ponjago inyo bodiritn di santai. Pas Yesus bopandir bunyi nantai, io monompilikng mato-muho Yesus. Katonyo, “Jangan bopandir ubo nian agatn Imam Agukngnan!”

²³ Timbas Yesus, “Soandainyo, Aku mongatoan sosuatu inyo salah, tunju'anbo salah-Ku. Apo, aman Aku mongatoan inyo bondar, hibo kolai monompilikng Aku?”

²⁴ Lopas nian, Hanas monyiuh oca' Yesus dibaba' ko Kayafas, Imam Agukng. Watu nantai, longan Yesus ija' dikobat.

²⁵ Simon Petrus ija' botindudi santai. Ado boboropo urakng inyo bopandir ko io, “Kolai ni'in pan murid Urakng inyo ditangkap nantai bai?” Apo Petrus monyangkal. Katonyo, “Cado!”

²⁶ Lalu, ado polayatn Imam Agukng di santai. Io ado hubukan koluarga agatn polayatn inyo Petrus popat kolindakannyo. Io bopandir, “Tontai aku moniant kolai di kobutn nantai bosamo-samo agatn Sio. Bondaram pan?”

²⁷ Apo Petrus bopandir agi' obai io co konal agatn Yesus. Watu nantai jam, manu' bokuku'.

Yesus dibaba' mohadap Gubernur Pilatus

²⁸ Sunsukng pukau, boko sia' urakng Yahudi nantai mombaba' Yesus doi' rumah Kayafas ko istana gubernur, pomorintahan Romawi. Sia' co mansu' ko dalapm istana nantai. Sia' co honda' monjadi kotor socaro agama obai sia' honda' jumpat makatn pas Ari Rayo Paskah.

²⁹ Obai nantai, gubernur Pilatus koluar monomu'i sia'. Io botakutn, “La'apo tuduhan kaitn ko Urakng ni'in?”

³⁰ Timbas sia', “Soandainyo Urakng ni'in co bosalah koi co mombaba'-Nyo ko duatn.”

³¹ Kato Pilatus ko sia', “Kaitn ja' mombaba' Io lalu moadili Io sosuai agatn hukupm kaitn.” Apo boko urakng Yahudi nantai bopandir, “Pomorintah Romawi morarakng banso koi mohukupm mati urakng.”

³² (Nantai tojadi oca' pomandiran Yesus monjadi nyata, ia'an nantai pomandiran Yesus mongona'i caronyo Sio paca'an mati).

³³ Pilatus mansu' agi' ko dalapm istananyo lalu monyiuh oca' Yesus dibaba' mansu'. Pilatus botakutn ko Sio, “Kata'an kolai ni'in rajo urakng Yahudi ai?”

³⁴ Timbas Yesus, “Potakutan nantai doi' kolai siku', kata'an ado urakng bukai inyo udah momadahan ko kolai mongona'i Aku ai?”

³⁵ Kato Pilatus, “Aku bukainyo urakng Yahudi! Banso kolai siku' huatan boko imam kopala' inyo monyorahan kolai ko aku. Kosalahan lapo inyo udah kolai labuhan?”

³⁶ Timbas Yesus, “Koraja'an-Ku kinyo boasal doi' dunia ni'in. Soandainyo Koraja'an-Ku doi' dunia ni'in, jadi boko urakng inyo molayati Aku udah bojuakng oca' Aku co disorahan ko boko pomimpitn Yahudi. Apo memang Koraja'an-Ku bukainyo doi' dunia ni'in!”

³⁷ Lalu Pilatus botakutn ko Yesus, “Aman ubo nian kolai memang rajo ai?” Timbas Yesus, “Kolai mo inyo monyobut obai Aku ninam rajo. Ninam alasan Aku lahir, Aku datakng ko dalapm dunia ni'in. Ia'an, oca' Aku momadahan mongona'i lapo inyo bondar. Somuo urakng inyo honda' hidup dalapm kobondaran, sia' monuruti pomandiran-Ku.”

^38a Kato Pilatus ko io, “Lapo kobondaran nantai?”

Koputusan pakai' Yesus dihukupm mati

^38b Lopas jadi Pilatus mongatoan nantai, io koluar agi', monomu'i boko urakng Yahudi nantai. Katonyo ko sia', “Aku udah momoriso Urakng nantai. Aku co botomu sobuti' kosalahan pan di Inyo.

³⁹ Apo, biasonyo, sotiap Ari Rayo Paskah, aku molopasan siku' urakng tahatan pakai' kaitn, urakng Yahudi. Honda' cadoai kaitn oca' ku molopasan Urakng nantai, Rajo urakng Yahudi?”

⁴⁰ Apo, sia' mondongkakng-mondorah, “Jangan! Jangan dilopasan Sio nan. Lopasan ja'am Borabas!” (Nah, Borabas ninam porampok inyo molawatn pomorintah Romawi.)