Yohanes 15 - Porjanjian Boharu Torjomahan Baso Dilakng Soari-ari

Yesus samo agatn kondukng anggur obai Sionam sumber kohidupan

¹ Lopas nian Yesus bopandir, “Aku ninam samo agatn kondukng anggur inyo bondar. Bopai-Ku nam puku' kobutn huatan inyo morawat somuo tontanaman anggur nantai.

² Sotiap dahatn inyo ado di Aku inyo kinyo bobuah, Bopai-Ku momancapnyo lalu mombuakan dahatn nantai. Apo, sotiap dahatn inyo bobuah, Bopai-Ku momborosihi dahatn nantai oca'nyo bobuah lobat.

³ Kaitn udah borosih obai kaitn pocayo agatn la'apo inyo Ku pandiran ko kaitn.

⁴ Kaitn gola' totap bosatu agatn Aku, lalu Aku paca'an totap bosatu agatn kaitn. Aman dahatn kinyo bosatu agatn kondukngnyo, jadi dahatn nantai culihnyo bobuah sonsiku'annyo. Ubo nian jam, kaitn culih bobuah aman kaitn co totap bosatu agatn Aku.

⁵ Aku ninam kondukng anggur. Kaitn nam samo sama'an dahatnnyo. Urakng gola' totap bosatu agatn Aku, lalu Aku paca'an bosatu agatn io. Aman ubo nian, io paca'an bobuah lobat. Obai, aman kaitn co bosatu agatn Aku, jadi kaitn culih bulah la'apo pan inyo boi'.

⁶ Somuo urakng inyo kinyo bosatu agatn Aku, sia' samo sama'an boko dahatn inyo dibuakan, lalu monjadi ranggau. Boko ranggau ubo nantai paca'an dikumpulan, dibuakan lalu dicucul ko api.

⁷ Kaitn gola' bosatu agatn Aku huatan pomandiran-Ku gola' ado di dalapm hati kaitn. Aman ubo nian, minto ja'am lapo ja' inyo kaitn kohonda'i, lalu kaitn paca'an dionji'inyo.

⁸ Aman kaitn bobuah lobat, lalu kaitn monunju'an obai Bopai-Ku mulia. Agatn ubo nian, kaitn maho bondaram monjadi boko murid-Ku.

⁹ Samo sama'an Bopai mongasihi Aku, ubo nian jam Aku mongasihi kaitn. Kohonda'nyo kaitn totap hidup samo sama'an urakng inyo Ku kasihi.

¹⁰ Aman kaitn monuruti boko porintah-Ku, Aku pan totap hala mongasihi kaitn. Samo sama'an Aku monuruti porintah Bopai-Ku, huatan Sio pan totap hala mongasihiKu jam.

¹¹ Aku momandiran somuo nantai oca' sonang-nyaman-Ku ado di dalapm hati kaitn, ongko sonang kaitn monjadi sompurna.

¹² Ni'in porintah-Ku: Kaitn gola' totap hala mongasihi, samo sama'an Aku mongasihi kaitn.

¹³ Urakng inyo kotakan mongasihi pokawalannyo ia'an io inyo monyorahan nyaonyo pakai' sia'.

¹⁴ Kaitn nam boko pokawalan-Ku, ia'an aman kaitn molabuhan la'apo inyo Ku porintahan ko kaitn.

¹⁵ Aku co ija' monyobut kaitn ‘hulutn’. Obai, hulutn co tohu la'apo inyo dikorojoan habakngnyo. Apo, Aku monyobut kaitn ‘kawal’. Obai, Aku udah momadahannyo ko kaitn boko la'apo pan inyo Kudinga' doi' Bopai-Ku.

¹⁶ Bukainyo kaitn inyo momilih Aku, apo Akunam inyo momilih kaitn. Aku moutus kaitn oca' kaitn botula' ongko bobuah lobat, ia'an buah inyo tahatn somanah-manahnyo. Aman kaitn molabuhan nantai lalu, Bopai paca'an moonji'i kaitn lapo inyo kaitn minto doi' Sio dalapm damo-Ku.

¹⁷ Ninam porintah inyo Ku onju' ko kaitn: Kaitn gola' totap hala mongasihi.”

Boko urakng di dunia inyo co pocayo paca'an bonci'an boko murid Yesus

¹⁸ “Aman boko urakng di dunia bonci'an kaitn, jangan hiratn obai sia' komai pan bonci' agatn Aku.

¹⁹ Soandainyo kaitn ija' bosatu agatn boko urakng di dunia, pasti sia' mongasihi kaitn obai sokolompok agatn sia'. Apo, kaitn co bosatu agatn boko urakng di dunia. Aku udah momilih kaitn doi' sia'. Nantai sobabnyo sia' bonci'an kaitn.

²⁰ Ingantcam pomandiran-Ku ni'in ko kaitn komai: Siku' urakng hulutn kinyo lobih pontikng doi' habakngnyo. Aman sia' udah mondorako'i Aku, jadi sia' pan paca'an mondorako'i kaitn. Apo aman sia' monuruti pomandiran-Ku, jadi sia' pan paca'an monuruti pomandiran kaitn.

²¹ Ado inyo paca'an mondorako'i kaitn obai kaitn ni'inan murid-Ku, obai sia' co mongonal Bopai inyo moutus Aku.

²² Aku udah datakng monyampaian ko sia' pomandiran inyo bondar doi' Allah. Apo sia' co pocayo ko aku. Soandainyo Aku co molabuhan nantai, jadi sia' co bodosa. Apo watu ni'in sia' conyiant ado alasan agi' pakai' dosa sia'.

²³ Urakng inyo bonci'an Aku, boroti io bonci' jam agatn Bopai-Ku.

²⁴ Aku udah molabuhan boko pogota'an di antaro sia' inyo bolupm kalo dilabuhan urakng bukai. Soandainyo Aku co molabuhan nantai, jadi sia' co bodosa. Apo ni'in biar pan sia' udah moniant somuonyo nantai, sia' ija' bonci'an Aku huatan Bopai-Ku.

²⁵ Apo nantai tojadi oca' pomandiran ni'in monjadi nyata. Pomandiran ni'in ditulis dalapm Hukupm Torat sia', ia'an ‘sia' bonci'an Aku conyiant ado alasannyo.’

²⁶ Aku paca'an moutus Ponulukng ko kaitn, ia'an Roh inyo boasal doi' Allah. Roh Allah nantai inyo monunju'an somuo inyo bondar. Sio paca'an bosasi mongona'i Aku.

²⁷ Kaitn pan gola' bosasi mongona'i Aku obai kaitn udah bosamo agatn Aku doi' mulo polayatan-Ku.